Ali Abdul គឺជាតួអង្គបុរសស្មោះត្រង់និងមានចិត្តបរិសុទ្ធគួរឱ្យគោរពស្រលាញ់ដូច្នេះហើយ មិនបាក់នោះទេដែលតួអង្គមួយនេះអាចឆក់យកបេះដូងអ្នកទស្សនាឱ្យស្រលាញ់ចូលចិត្តរូបគេ។ សម្រាប់តួអង្គបុរសប៉ាគីស្ថាននៅក្នុងស៊េរី «Squid Game» ដ៏ល្បីល្បាញរូបនេះតាមពិតគឺជាជនជាតិឥណ្ឌា ហើយមានឈ្មោះពិតថា Anupam Tripathi។ តើបុរសឥណ្ឌារូបនេះជាអ្នកណា ចម្ងល់នេះត្រយងនឹងបង្ហាញជូនដូចខាងក្រោម៖
ស៊េរី «Squid Game» មិនត្រឹមតែល្បីល្បាញនិងទទួលបានការពេញនិយមច្រើននៅលើអ៊ិនធឺណិតនោះទេ សូម្បីតែនៅប្រទេសឥណ្ឌាដែលជាផ្ទះកំណើតរបស់តួអង្គ Ali Abdul (អាលី អាប់ឌុល) ក៏និយមគាំទ្រនិងទស្សនារឿងនេះយ៉ាងខ្លាំងដូចគ្នាដែរ ព្រោះមានតួអង្គជនជាតិឥណ្ឌាសម្ដែងក្នុងរឿងនេះ។
សូមចុចអាន Netflix សម្រេចចិត្តលុបលេខចោលព្រោះមានមនុស្សរាប់ពាន់នាក់ព្យាយាមតេរក Gong Yoo
Anupam Tripathi ទទួលបានការសរសើរយ៉ាងច្រើនព្រោះតែសមត្ថភាពសម្ដែងរបស់លោកនៅក្នុងសាច់រឿងដែលសម្ដែងជាតួអង្គ Ali ពលករប៉ាគីស្ថានដែលចំណាក់ស្រុកមកកាន់ប្រទេសកូរ៉េដើម្បីរកប្រាក់។ តារាសម្ដែងវ័យ៣២ឆ្នាំរូបនេះបានផ្លាស់មកកាន់ប្រទេសកូរ៉េកាលពីឆ្នាំ២០១០ ហើយលោកបានចូលរួមសម្ដែងក្នុងរឿងភាគរបស់កូរ៉េជាច្រើន ក្នុងនោះក៏មានភាពយន្តខ្នាតធំផងដែរ។
បុរសដែលមានដើមកំណើតឥណ្ឌារូបនេះទទួលបានអាហារូបករណ៍សិក្សាពីសកលវិទ្យាល័យវិចិត្រសិល្បៈកូរ៉េ (KARTs) មុនលោកផ្ទុះប្រជាប្រិយភាពសម្ដែងក្នុងរឿង «Squid Game»។ តាមពិតមុននឹងសម្ដែងជាតួអង្គ អាលី លោកធ្លាប់សម្ដែងរឿងជាច្រើនក្នុងឋានៈជាតារាសម្ដែងកិត្តិយសដូចជាភាពយន្ត «Ode to My Father»។
Anupam Tripathi បានបង្ហាញសេចក្ដីដឹងគោពចំពោះប្រជាប្រិយភាពដ៏មហាសាលដែលខ្លួនបានទទួលក្រោយមានឱកាសសម្ដែងក្នុងរឿងនេះតាមរយៈបណ្ដាញសង្គមថា៖ «ខ្ញុំមានអារម្មណ៍ដូចជាកំពុងតែសុបិន។ ខ្ញុំរកអ្វីមកជំនួសឱ្យការដឹងគុណរបស់ខ្ញុំចំពោះបងប្អូនប្រជាពលរដ្ឋនៅទូទាំងពិភពលោក ដែលស្រលាញ់និងជូនពរចំពោះតួអង្គ Ali និងរឿង Squid Game។ សូមអរគុណដែលបន្តតាមដានទស្សនានិងបន្តជូនពរចំពោះរឿងនេះ»។
សូមចុចអាន អ្នកដឹកនាំ «Squid Game» រង់ចាំអស់១០ឆ្នាំទើបមានអ្នកព្រមបោះទុននិងព្រមសម្ដែង!
នៅក្នុងបទសម្ភាសន៍មួយ Anupam Tripathi បានបង្ហើបឱ្យដឹងថាឪពុកខ្លួនមកពីគ្រួសារដែលមានឋានៈមធ្យម ហើយជឿជាក់ថាលោកត្រូវតែសិក្សា ហើយស្វែងរកការងារដើម្បីអាចរកប្រាក់បាន។ កាលពីឆ្នាំ២០១៧ Anupam បានបាត់បង់ឪពុករបស់ខ្លួន ប៉ុន្តែជាមួយនឹងភាពជោគជ័យនិងល្បីល្បាញនៃរឿង «Squid Game» ម្ដាយនិងបងប្អូនលោកកំពុងតែមានមោទកភាពចំពោះរូបលោក។
Ali Abdul គឺជាតួអង្គមួយដែលទទួលបានការស្រលាញ់និងចូលចិត្តខ្លាំងពីសំណាក់អ្នកទស្សនា ដែលបង្ហាញឱ្យឃើញថាពិភពលោកនេះនៅមានមនុស្សល្អ ព្រោះនៅត្រង់ភាគទីមួយ Ali គឺជាមនុស្សម្នាក់ដែលជួយជីវិតតួឯកប្រុសឱ្យគេចផុតពីសេចក្ដីស្លាប់ខណៈកំពុងតេលេងហ្គេម ប៉ុន្តែគួរឱ្យស្ដាយដែលតួអង្គរបស់ Ali បែរជាមិនអាចមានចុងបញ្ចប់មួយដ៏ស្រស់ស្អាតតាមការចង់បានរបស់អ្នកដែលស្រលាញ់តួអង្គនេះទៅវិញ៕
