អ្នកដឹកនាំរឿង Hwang Dong Hyuk បានចែករំលែករឿងរ៉ាវក្រៅឆាកពាក់ព័ន្ធនឹងកំពូលភាពយន្តជាស៊េរីដ៏ល្បីល្បាញប្រចាំ Netflix រឿង«Squid Game» ថាលោកបានសរសេរបញ្ចប់ Script (អត្ថបទភាពយន្ត) តាំងពីឆ្នាំ២០០៩មកម្ល៉េះ ប៉ុន្តែព្រោះតែមានបញ្ហាមួយទើបកាលណោះលោកមិនអាចថតរឿងនេះបាន។
នៅក្នុងបទសម្ភាសន៍ផ្ដាច់មុខជាមួយនឹងសារព័ត៌មានមួយ អ្នកដឹកនាំរឿង Hwang dong Hyuk បានបង្ហើបឱ្យដឹងថាលោកបានសរសេរអត្ថបទភាពយន្តនេះចប់តាំងពី១០ឆ្នាំមុន (២០០៩) ប៉ុន្តែរឿងនេះត្រូវបានវិនិយោគទុននិងតារាសម្ដែងបដិសេធមិនចូលរួមដផយសារតែគិតថាសាច់រឿង «ចម្លែកខុសគេ»។
Project របស់លោកអណ្ដែតត្រសែតអស់ជាង១០ឆ្នាំព្រោះតែគ្មានអ្នកចាប់អារម្មណ៍សោះ ដោយលោកបានលើកឡើងថា «មានមនុស្សជាច្រើនបានប្រាប់ខ្ញុំថា Squid Game គឺជារឿងដែលចម្លែកខុសគេហើយថែមទាំងគ្មានការពិតថែមទៀត។ ខ្ញុំត្រូវបានអ្នកបោះទុកវិនិយោគនិងតួសម្ដែងបន្តបដិសេធរហូតមក។»
Hwang Dong Hyuk បានបន្តទៀតថា៖ «ត្រលប់ទៅឆ្នាំ២០០៩ ពេលខ្ញុំទើបតែសរសេរបញ្ចប់អត្ថបទភាពយន្ត សាច់រឿងមានលក្ខណៈមួយប្លែកនិងមិនដែលធ្លាប់ជួបសម្រាប់សង្គមបរិយាកាសនាសម័យកាលនោះ។ក្រោយត្រូវបានអ្នកបោះទុនវិនិយោគបដិសេធខ្ញុំមានអារម្មណ៍ថាមិនទាន់ដល់ពេលវេលាស័ក្ដិសមនឹងបញ្ចេញសាច់រឿងមួយនេះទេ។ ១០ឆ្នាំក្រោយ ចន្លោះរវាងអ្នកមាននិងអ្នកក្រកាន់តែធំ ហើយមានកាន់តែលឿនតាមរយៈអំពើឧក្រិដ្ឋកាន់តែច្រើន ហើយជាទីពេញនិយម។ យោងតាមលក្ខខ័ណ្ឌអស់ទាំងនេះ ខ្ញុំគិតថានេះជាមូលហេតុដែលភាពយន្តភាគជាស៊េរីរឿងនេះបានចេញជារូបរាងនៅលើពិភពលោកនេះ»។
បច្ចុប្បន្ន «Squid Game» បានក្លាយជារឿងដែលល្បីល្បាញទូទាំងពិភពលោក ហើយកំពុងតែបោះជំហានទៅរកភាពជារឿងដែលមានចំនួនអ្នកទស្សនាច្រើនជាងគេនៅលើ Netflix៕
