នៅក្នុងស៊េរីកូរ៉េរឿង «Squid Game» មានឈុតមួយដែលតារាសម្ដែងដ៏ល្បីល្បាញ Gong Yoo បានបង្ហាញវត្តមានសម្ដែងជាកិត្តិយសក្នុងឋានៈជា Sale Man ដែល Delivery Card ឱ្យទៅតួឯកប្រុស Seong Gi Hun ដោយកាតនោះមួយចំហៀងមានសញ្ញា រង្វង់មូល ត្រីកោណនិងការ៉េ ចំណែកមួយចំហៀងទៀតជាលេខទូរស័ព្ទ។ នេះគឺជាដើមចមដែលបង្កឱ្យម្ចាស់លេខទូរស័ព្ទពិតផ្ទុះកំហឹងព្រមទាំងគំរាមប្ដឹងទៅកាន់ Netflix ព្រោះតែមានអ្នកយល់ច្រឡំហើយព្យាយាមតេទៅកាន់លេខរបស់ខ្លួនព្រោះគិតថាជាលេខរបស់ Gong Yoo។
ក្រោយស៊េរីកូរ៉េដ៏ល្បីល្បាញនេះបានបញ្ចាំងរួច ម្ចាស់លេខពិតបានប្រាប់ទៅកាន់សារព័ត៌មាន Koreaboo ថាខ្លួនទទួលបានការហៅទូរស័ព្ទនិងចំនួន Message ២៤ម៉ោងលើ២៤ម៉ោងជារៀងរាល់ថ្ងៃ ដែលធ្វើឱ្យប៉ះពាល់យ៉ាងខ្លាំងដល់ជីវិតរស់នៅប្រចាំថ្ងៃរបស់ខ្លួន។ «លេខទូរស័ព្ទនេះជាលេខដែលខ្ញុំបានប្រើប្រាស់អស់ជាង១០ឆ្នាំមកហើយ ដូច្នេះខ្ញុំពិតមានការភ្ញាក់ផ្អើលខ្លាំង មានលេខច្រើនជាង៤ពាន់លេខដែលខ្ញុំត្រូវលុបចេញពីក្នុងទូរស័ព្ទរបស់ខ្ញុំព្រោះតែមានមនុស្សជាច្រើនព្យាយាមទំនាក់ទំនងមកកាន់ខ្ញុំមិនខ្វល់ថាជាពេលយប់ឬពេលថ្ងៃ ព្រោះតែអ្នកទាំងនោះមានចម្ងល់ ដោយមិនខ្វល់ខ្វាយទេថា ទូរស័ព្ទខ្ញុំត្រូវអស់ថ្មហើយរលត់ឈឹងតែម្ដង»។
ក្រោយមានបញ្ហាបែបនេះកើតឡើង Netflix បានសម្រេចចិត្តលុប (Blur) លេខដែលមាននៅក្នុងស៊េរីរឿង «Squid Game» ដែលមានបង្ហាញនៅក្នុងភាគដំបូងចេញវិញ ដើម្បីឆ្លើយតបទៅនឹងបញ្ហាដែលកើតឡើងនេះ។
ស៊េរីដែលមានចំនួន៩ភាគនេះនិយាយពីមនុស្សដែលជំពាក់បំណុលម្នាក់ៗបានយកជីវិតទៅប្រថុយលេងល្បែងកូនក្មេង ដោយសង្ឃឹមយកឈ្នះទឹកប្រាក់៤៥,៦ពាន់លានវ៉ុន បានក្លាយជារឿងដែលល្បីល្បាញជាអន្តរជាតិក្រោយពីបានបញ្ចាំងនៅលើ Netflix កាលពីខែមុន។ Sarandos អ្នកតំណាងឱ្យ Netflix បានឆ្លើយតបនៅក្នុងបទសម្ភាសន៍បង្ហាញទិន្នន័យរឿងដែលមានការពេញនិយមនៅលើ App របស់ខ្លួនថា «ពួកយើងមិនបានដឹងទេថារឿងនេះនឹងទទួលបានប្រជាប្រិយភាពនិងពេញនិយមជាលក្ខណៈសកលលោកបែបនេះទេ»៕