ដំណឹងស្នេហាដែលធ្វើឱ្យមហាជនជាអ្នកគាំទ្របាល់ទាត់ ក៏ដូចចម្រៀងមានការភ្ញាក់ផ្អើល និងចាប់អារម្មណ៍ខ្លាំងរវាង តារាបាល់ទាត់សញ្ជាតិកូរ៉េខាងត្បូង Son Heung Min និងសំណព្វចិត្តយុវវ័យទូទាំងពិភពលោក Kim Jisoo សមាជិកក្រុម BlackPink ក្រោយមានលេចឮដំណឹងថា Super Star មកពីក្រុម tottenham hotspur បានឆ្លៀតហោះទៅកាន់ក្រុង Paris មុននឹងហោះមកកាន់ប្រទេសកំណើតដើម្បីត្រៀមខ្លួនជួយក្រុមជម្រើសជាតិក្នុងវគ្គប្រកួតជម្រុះ 2022 FIFA World Cup Asia Qualifier រវាងកូរ៉េខាងត្បូងនិងរុស្សី កាលពីថ្ងៃទី៧ ខែតុលា កន្លងទៅថ្មីៗនេះ ដោយខណៈនោះចៃដន្យ Jisoo ក៏បានហោះចេញពី Paris មកកាន់ប្រទេសកូរ៉េខាងត្បូងដូចគ្នា ក្រោយបានទៅចូលរួមក្នុងកម្មវិធី Paris FAshion Week 2021។
រឿងដែលកាន់តែគួរឱ្យចាប់អារម្មណ៍ទៀតនោះគឺ នៅលើបណ្ដាញសង្គមមានលេចចេញរឿង Jisoo និង Son មានខ្សែដៃស្រដៀងគ្នា ដោយខាងប្រុសតែងតែថើបខ្សែដៃក្រោយពេលទាត់បញ្ចូលទីបានសម្រេច ចំណែកខាងស្រីតែងតែពាក់ខ្សែដៃដូចគ្នានេះជាប់ខ្លួនរហូត។
ប៉ុន្តៃស្ថានីយទូរទស្សន៍ SBS បានចេញមកផ្សព្វផ្សាយថាដំណឹងចចាមអារ៉ាមខាងលើនេះមិនមែនជាការពិតនោះទេ ព្រោះ Jisoo និង Son Heung Min មិនស្គាល់ឬជិតស្និទ្ធិគ្នានោះទេ ថែមទាំងបង្ហាញភស្ដុតាងដោយយកឃ្លីបសម្ភាសន៍ចាស់ដែល Jisoo ធ្លាប់បកស្រាយកាលពីឆ្នាំ២០១៩ថា រូបខ្លួនជាប់ពាក់ព័ន្ធព័ត៌មានស្នេហាព្រោះតែទៅទស្សនាការប្រកួតដែល Son លេងឱ្យ tottenham hotspur ប៉ុន្តែការទៅនោះគឺទៅក្នុងឋានៈជាអ្នកគាំទ្របាល់ទាត់ម្នាក់ប៉ុណ្ណោះ ហើយសមីខ្លួនអះអាងថាមិនបានស្គាល់ជិតស្និទ្ធិជាមួយនឹង Son ឡើយ។
ទោះជាមានសំឡេងជាច្រើនចេញមកអះអាងនិងបដិសេធចំពោះដំណឹងស្នេហានេះ តែក៏មានក្រុមអ្នកគាំទ្រជាច្រើនបាននៅតែបន្ត Cheer ថែមទាំងអ្នកគាំទ្របានលើកឡើងទៀតថាបើគូនេះសេពគប់គ្នាគឺស័ក្ដិសមណាស់ព្រោះទាំងពីរនាក់ជាបុគ្គលល្បីលំដាប់ពិភពលោកដូចគ្នា ដូច្នេះត្រូវតែតាមដានជាបន្តនិងCheer បន្តទៀត។
ដំណឹងអាស្រូវស្នេហារបស់អ្នកទាំងពីរនេះ សម្រាប់ Jisoo គឺជាលើកទីមួយដែលមានព័ត៌មានតាមចុះផ្សាយ ប៉ុន្តែតារាបាល់ទាត់ល្បី Son វិញនោះ មិនមែនជាលើកទីមួយនោះឡើយ ព្រោះកន្លងមកគេធ្លាប់មានពាក់ព័ន្ធរឿងរ៉ាវស្នេហាជាមួយនឹងតារាស្រីល្បីៗ និងស្អាតៗរបស់កូរ៉េជាច្រើនរូបទៀត។
កាលពីឆ្នាំ ២០១៤ សារព័ត៌មាន TheFact ធ្លាប់បានបញ្ចេញរូបភាពលួចថតរវាង Son Oppa កំពុងតែដើរលេងជាគូជាមួយនឹង MinA សមាជិក Girl’Day តែក្រោយមកទៀតផលិតកម្មដែលគ្រប់គ្រងលើតារាចម្រៀងស្រីបានចេញមកបដិសេធ ហើយបញ្ជាក់ថារវាងអ្នកទាំងពីរគ្រាន់តែជាមិត្តភក្ដិ ធ្លាប់ជួបគ្នាបានម្ដងពីរដងប៉ុណ្ណោះ
បួនឆ្នាំក្រោយ ពោលគឺនៅឆ្នាំ ២០១៨ Son Heung Min បានជាប់ពាក់ព័ន្ធដំណឹងស្នេហាជាមួយនឹងតារាសម្ដែង Yoo So-young អតីតសមាជិកក្រុម After School ដោយអ្នកទាំងពីរធ្លាប់ស្រលាញ់គ្នាមុនល្បីល្បាញ រឿងនេះបានធ្វើឱ្យខាងស្រីបិទគណនី Instagram របស់ខ្លួនព្រោះតែមានអ្នកចូលមកជេរ និងរិះគន់ថាខាងស្រីបញ្ចេញព័ត៌មានស្នេហាព្រោះសង្ឃឹមតោង Son យកល្បី។
