ប្រវត្តិជួបគ្នា២ដង របស់ក្រុមជម្រើសជាតិកម្ពុជា ជាមួយក្រុមកោះហ្គាម គឺធ្លាប់ឈ្នះម្តងម្នាក់ ខណៈការជួបគ្នាដំបូងកាលពីខែមេសា ឆ្នាំ២០០៦ ក្រុមកម្ពុជា បានយកឈ្នះកោះហ្គាម ៣ទល់០ លើទីលានកីឡដ្ឋាន Bangladesh Army Stadium ក្នុងទីក្រុង Dhaka ប្រទេសបង់ក្លាដេស ក្នុងវគ្គជម្រុះពូល C នៃពានរង្វាន់ 2006 AFC Challenge Cup។
គ្រាប់បាល់ជ័យជម្នះរបស់ក្រុមកម្ពុជា លើកោះហ្គាម ក្រោមការកាត់សេចក្ដីពីសំណាក់អាជ្ញាកណ្ដាល Win Cho ជនជាតិមីយ៉ាន់ម៉ា នៅកាលនោះរកគ្រាប់បាល់បានដោយកីឡាករ សុខ ប៊ុនធាង នៅនាទី៣៧ កែវ កុសល រកគ្រាប់បាល់បាននៅនាទី៤០ និងកីឡាករ គួច សុកុម្ភៈ រកគ្រាប់បាល់បាននៅនាទី៦៣។ គួច សុកុម្ភៈ កាលនោះមានវ័យ១៩ឆ្នាំ។
សមាជិកដែលជួយកម្ពុជា យកឈ្នះកោះហ្គាម នៅគ្រានោះនៅសល់តែកីឡាករ គួច សុកុម្ភៈ (វ័យ៣៤ឆ្នាំ) ប៉ុណ្ណោះដែលជាប់ឈ្មោះក្នុងក្រុមជម្រើសជាតិកម្ពុជា ត្រៀមជួបគ្នានៅវេលាម៉ោង០០:៣០នាទីរំលងអាធ្រាត្រ ពោលគឺនៅយប់ថ្ងៃទី៩ ចូលថ្ងៃទី១០ខែតុលា ឆ្នាំ២០២១ នេះលើទីលានកីឡដ្ឋាន Khalifa Sports City Stadium ក្នុងទីក្រុង Isa Town ប្រទេសបារ៉ែន ដែលជាទឹកដីកណ្ដាល។ ការប្រកួតមានផ្សាយផ្ទាល់លើ Page របស់សហព័ន្ធកីឡាបាល់ទាត់កម្ពុជា ទាំង២ប្រកួត។
ការប្រកួតរវាងកម្ពុជា ជាមួយកោះហ្គាម នៅពេលនេះគឺដើម្បីស្វែងរកកៅអីឡើងទៅវគ្គជម្រុះជុំទី៣ នៃពានរង្វាន់បាល់ទាត់ជើងឯកទ្វីបអាស៊ី 2023 AFC Asian Cup ដែលមាន២២ក្រុមកំពង់រង់ចាំ។ ការប្រកួតជម្រុះនេះធ្វើឡើងចំនួន២ជើង គឺនៅថ្ងៃទី៩ ខែតុលា ឆ្នាំ២០២១ នេះ១លើក និងថ្ងៃទី១២ តុលា ឆ្នាំ២០២១ ចំនួន១លើកទៀត។ ក្រុមដែលរកបានគ្រាប់បាល់ច្រើនជាងគេនឹង ឈានទៅជុំទី៣ ជាបន្ត។
ដោយឡែកបញ្ជីឈ្មោះកីឡាករ ២៣នាក់របស់កម្ពុជា ត្រូវត្រៀមជួបកោះហ្គាម ទាំង២ប្រកួតនេះមានដូចជា៖
អ្នកចាំទី៖ កែវ សុខសិលា, ហ៊ុលគឹមហ៊ុយ
ខ្សែការពារ៖ សឿយ វិសាល,សារ៉េត គ្រីយ៉ា, ទេស សម្បត្តិ,ឆេង ម៉េង, កែន ច័ន្ទសុភ័ក្រ, ស រតនា, សឿត បារាំង, យ៉ើ សាហ្វី
ខ្សែបម្រើ៖ គួច សុកុម្ភៈ, សុះ ស៊ូហាណា, គួច ដានី, អន ចាន់ប៉ូលីន, ជួន ចាន់ចាវ, ច្រឹង ពលរដ្ឋ, សេត រ៉ស៊ីប, មិន រតនៈ
ខ្សែប្រយុទ្ធ៖ ជឿន ណាចា, លឹម ពិសុទ្ធ, សៀង ចន្ធា, កែវ សុខផេង និងចាន់ វឌ្ឍនាកា
តើគិតថាក្រុមជម្រើសជាតិកម្ពុជា នឹងរកគ្រាប់បាល់បានប៉ុន្មានគ្រាប់ក្នុងជំនួបជាមួយកោះហ្គាម នៅរាត្រីនេះ?
រូបថត៖ផ្ដល់ដោយលោក កែវ កុសល