លោក កែវ កុសល ជាម្ចាស់គ្រាប់បាល់១ ក្នុងចំណោម៣ គ្រាប់ដែលជួយក្រុមជម្រើសជាតិកម្ពុជា យកឈ្នះលើក្រុមបាល់ទាត់កោះហ្គាម នៅថ្ងៃទី៦ ខែមេសា ឆ្នាំ២០០៦ ក្នុងវគ្គជម្រុះពូល C នៃពានរង្វាន់ 2006 AFC Challenge Cup លើទីលានកីឡដ្ឋាន Bangladesh Army Stadium ក្នុងទីក្រុង Dhaka ប្រទេសបង់ក្លាដេស។
បុរសកាន់អាជ្ញាប័ណ្ណគ្រូបង្វឹកកម្រិតទ្វីបអាស៊ី A License រូបនេះបានផ្ដល់កិច្ចសម្ភាសន៍ជាមួយក្រុមការងារសារព័ត៌មានត្រយង ថា៖«ខ្ញុំនៅចាំបានខ្លះៗនៅកាលនោះ កោះហ្គាម គឺគេមានចំណុចខ្លាំងដូចជា គេមានកីឡាករក្មេងៗច្រើន គេមានកម្លាំង និងកាយសម្បទាល្អ ប៉ុន្តែអ្វីដែលក្រុមគេខ្វះខាតគឺលើបច្ចេកទេសផ្ទាល់ខ្លួនម្នាក់ៗ (ស្ទើរបច្ចេកទេស) និងខ្វះខាតការលេងសហការជាក្រុម»។
ជាមួយគ្នានេះបុរសដែលធ្លាប់ជួយកម្ពុជា លើកពានរង្វាន់ BIDC Cup ឆ្នាំ២០០៩ រូបនេះបានជូនពរឱ្យក្រុមជម្រើសជាតិកម្ពុជា នាពេលបច្ចុប្បន្នបំពេញបេសកកម្មនៅប្រទេសបារ៉ែន មានសុខភាពល្អបរិបូរណ៍ មានកម្លាំងពេញ និងពេលប្រកួតសូមឱ្យជោគជ័យជាស្ថាពរ។
ក្រុមជម្រើសជាតិកម្ពុជា អំឡុងពេលនោះដឹកនាំដោយលោកគ្រូបង្វឹក សាល់ សាឡាស់ខាន់ ដែលជាអតីតកីឡាករជម្រើសជាតិកម្ពុជា នាទសវត្សទី៨០ និងជាគ្រូបង្វឹកក្រុមខេមរាកីឡា និងបៀលប្រាយយូណាធីត ផងដែរ។
សូមបញ្ជាក់ថាជ័យជម្នះរបស់កម្ពុជា លើកោះហ្គាម រកបានដោយកីឡាករ សុខ ប៊ុនធាង នៅនាទី៣៧ កែវ កុសល រកគ្រាប់បាល់បាននៅនាទី៤០ និងកីឡាករ គួច សុកុម្ភៈ រកគ្រាប់បាល់បាននៅនាទី៦៣។ សុខ ប៊ុនធាង បច្ចុប្បន្នជាមន្រ្ដីយោធា ហើយ កែវ កុសល ជាមន្រ្តីនគរបាលជាតិ។ ដោយឡែក គួច សុកុម្ភៈ វិញនៅបន្តប្រកបអាជីពជាកីឡាករបាល់ទាត់នៅឡើយទេ។
លោក កែវ កុសល បានព្យួរស្បែកជើងនៅចុងឆ្នាំ២០០៩ ខណៈលោកធ្លាប់ជាសមាជិកក្រុមជម្រើសជាតិកម្ពុជា តាំងពីឈុតយុវជនក្រោមអាយុ១៧ឆ្នាំដល់ឈុតធំផងដែរ។ ចំណែកការប្រកបអាជីពក្នុងក្លិបបាល់ទាត់វិញ លោកធ្លាប់លេងឱ្យក្រសួងការពារជាតិ ខេមរាកីឡា និងព្រះខ័នរាជស្វាយរៀង។
ក្រុមជម្រើសជាតិកម្ពុជា នឹងជួបកោះហ្គាម ជាលើកទី៣ នៅវេលាម៉ោង០០:៣០នាទីរំលងអាធ្រាត្រ យប់ថ្ងៃទី៩ ចូលថ្ងៃទី១០ខែតុលា ឆ្នាំ២០២១ នេះលើទីលានកីឡដ្ឋាន Khalifa Sports City Stadium ក្នុងទីក្រុង Isa Town ប្រទេសបារ៉ែន ដែលជាទឹកដីកណ្ដាល។ ៣ថ្ងៃបន្ទាប់ក្រុមទាំង២ត្រូវជួបគ្នាជើងទី២បន្តទៀតដើម្បីរកអ្នកឈ្នះឡើងទៅវគ្គជម្រុះជុំទី៣ នៃពានរង្វាន់បាល់ទាត់ជើងឯកទ្វីបអាស៊ី 2023 AFC Asian Cup ដែលមាន២២ក្រុមកំពង់រង់ចាំ។ ការប្រកួតមានផ្សាយផ្ទាល់លើ Page របស់សហព័ន្ធកីឡាបាល់ទាត់កម្ពុជា ទាំង២ប្រកួត។
ជំនួប២ប្រកួតកន្លងមករវាងកម្ពុជា នឹងកោះហ្គាម ក្រៅពីកម្ពុជា យកឈ្នះកោះហ្គាម ៣-០ នៅឆ្នាំ២០០៦។ ប៉ុន្តែក្រុមកម្ពុជា បានបរាជ័យវិញនៅខែវិច្ឆិកា ឆ្នាំ២០១៣ ដោយលទ្ធផល ២ទល់០ លើទីលានពហុកីឡដ្ឋានជាតិ ក្នុងរាជធានីភ្នំពេញ ដែលជាជំនួបមិត្តអន្តរជាតិ៕
រូបថត៖ផ្ដល់ឱ្យ
