កាលពីរាត្រីថ្ងៃសៅរ៍ទី ៩ ខែ តុលា ឆ្នាំ ២០២១ ម្សិលមិញនេះ កម្មវិធីប្រកួតប្រជែងសម្រស់ដែលមានការគាំទ្រច្រើនពីប្រិយមិត្តអ្នកនិយមគាំទ្រ Miss Grand Cambodia 2021 បានរកឃើញម្ចាស់មកុដជយលាភីថ្មីរបស់ខ្លួនហើយ នោះគឺស្រីស្អាតរូបស្រស់ ប៉ូ គីមថេងសុតធីតា។ ប៉ុន្តែតើមានអ្នកណាដឹងខ្លះថា ទម្រាំតែអាចក្លាយជាម្ចាស់ជយលាភី ស្រីស្អាតញញឹមស្រស់រូបនេះ បានតស៊ូពុះពារខ្លាំងប៉ុណ្ណា លើវិថីប្រកួតប្រជែងផ្នែកសម្រស់?
ក្រមុំរូបស្រស់ម្នាក់នេះបានក្លាយជារាជិនីក្នុងរាត្រីគ្រងមកុដជាម្ចាស់ជយលាភីលេខមួយ Miss Grand Cambodia តាមរយៈការប្រកួតប្រជែងនិងបង្ហាញសមត្ថភាពដែលមានការផ្សាយផ្ទាល់ទាំងលើកញ្ចក់ទូរទស្សន៍និងលើបណ្ដាញសង្គម (Miss Grand Cambodia Page)។
យ៉ាងណាមិញ ការទទួលបានមកុដមកគ្រប់គ្រងនេះមិនមែនបានមកដោយសំណាងនោះឡើយ ប៉ុន្តែបានមកដោយការឧស្សាហ៍ព្យាយាម ប្រឹងប្រែង ហ្វឹកហាត់ បង្កើនសមត្ថភាពខ្លួនពីមួយកម្មវិធីទៅមួយកម្មវិធី រហូតធ្វើឱ្យស្រីស្អាត ប៉ូ គីមថេងសុតធីតា មានឱកាសឈ្នះក្លាយជាម្ចាស់ជយលាភីនៅក្នុងឆ្នាំ ២០២១នេះ។
ធីតា ធ្លាប់មានប្រវត្តិចូលរួមប្រកួតប្រជែង និងជោគជ័យច្រើនលើវិថីប្រកួត ប៉ុន្តែមិនធ្លាប់បានគ្រងមកុដជយលាភីឡើយ ព្រោះកន្លងមកបានត្រឹមជាប់ក្នុងចំណោម Top5 ប៉ុណ្ណោះ។ សម្រាប់បទពិសោធប្រកួតកន្លងមករបស់ធីតារូបស្អាតរូបនេះ មានច្រើនគួរឱ្យកត់សម្គាល់ ដែលមានទាំងការប្រកួតកម្រិតជាតិ និងការប្រកួតកម្រិតអន្តរជាតិផងដែរ។
ប៉ូ គីមថេងសុតធីតា ធ្លាប់ជាប់ចំណាត់ថ្នាក់លេខ៤ (Third Runner Up) ក្នុងកម្មវិធី Miss City Tourism World 2017 នៅប្រទេសចិនហើយក៏ធ្លាប់ជា Miss Asia Pacific International 2019 ហើយក៏ធ្លាប់ជាប់ជយលាភីលេខ៤ នៅក្នុងកម្មវិធីប្រកួត Miss Universe 2019 ផងដែរ។
តាមរយៈការទទួលបានជយលាភីពីកម្មវិធីប្រកួត ប៉ូ គីមថេងសុតធីតា នឹងក្លាយជាបវរកញ្ញា Miss Grand Cambodia ចេញទៅប្រកួតប្រជែងដណ្ដើមមកុដជយលាភីនៅប្រទេសថៃនាពេលខាងមុខនេះ៕
