បទចម្រៀងថ្មីរបស់តារាចម្រៀងសំឡេងពីរោះ តន់ ចន្ទសីម៉ា ដែលមានចំណងជើងថា «Are You Ok» ត្រូវបានអ្នកឧកញ៉ា ឡេង ណាវ៉ាត្រា បញ្ជាទៅកាន់អ្នកគ្រប់គ្រងការផលិតឱ្យលុបបទនេះចេញពី Facebook page, Account Tiktok របស់ផលិតកម្ម Galaxy Navatra ជាបន្ទាន់។
យោងតាមសេចក្ដីប្រកាសរបស់អ្នកឧកញ៉ាវ័យក្មេងដែលបានបង្ហោះតាមរយៈផេករបស់លោក អ្នកឧកញ៉ា បានប្រាប់ឱ្យអ្នកគ្រប់គ្រងការផលិតរបស់ផលិតកម្ម Galaxy Navatra លុបបទនេះចេញ ព្រោះតែបទចម្រៀងនេះទទួលបាននូវការរិះគន់យ៉ាងខ្លាំងពីសំណាក់ហ្វេន ក៏ដូចជាសាធារណ ជន ព្រោះតែបទចម្រៀងនេះមានការតុបតែងខ្លួនជាកូនសិស្សក្នុងថ្នាក់ តែមានប្រើប្រាស់កាំភ្លើង ដែលសកម្មភាពនិងទង្វើនេះ អាចនឹងធ្វើឱ្យមានការយល់ខុសចំពោះសេចក្ដីថ្លៃថ្នូររបស់សិស្សនិស្សិតខ្មែរ។
ការបង្ហាញគោលជំហរឆ្លើយតបរបស់អ្នកឧកញ៉ា ចំពោះមតិរិះគន់ដើម្បីស្ថាបនានេះ ត្រូវបានសាធារណជនគោរពនិងកោតសរសើរចំពោះស្មារតីទទួលខុសរបស់អ្នកឧកញ៉ា យ៉ាងណាមិញក៏មានមតិមួយចំនួន បានស្នើឱ្យអ្នកឧកញ៉ា លុបចោលស្នាដៃបទចម្រៀង Are You Ok ដែលជាបទចម្រៀងមួយ ផលិតកម្ម Galaxy បានចំណាយថវិកាអស់ជាង១ម៉ឺនដុល្លារអាមេរិកទិញសិទ្ធិពីម្ចាស់ដើមនៅខេត្តកំពតចោលទាំងស្រុងតែម្ដង។
ប៉ុន្តែសំណើរនេះនឹងត្រូវបានសម្រេចយ៉ាងនោះ នៅមិនទាន់ដឹងនៅឡើយទេ តែជំហានបឋម វីដេអូខ្លី ដែលបង្ហោះដើម្បីផ្សព្វផ្សាបទចម្រៀងថ្មីរបស់កញ្ញា តន់ ច័ន្ទសីម៉ា អាចនឹងត្រូវលុបចេញពីគ្រប់បណ្ដាញផ្សព្វផ្សាយទាំងអស់មាន Tiktok, និង Facebook ជាដើម។
ខាងក្រោមនេះគឺជាសំណេរដែល អ្នកឧកញ៉ា ឡេង ណាវ៉ាត្រា បានធ្វើការបង្ហោះនៅលើហ្វេសប៊ុកផេកផ្លូវការរបស់លោកផ្ទាល់ នៅល្ងាច ថ្ងៃទី១១ ខែតុលា ឆ្នាំ២០២១ នេះ៖
«សូមអ្នកគ្រប់គ្រងការផលិត របស់ផលិតកម្ម Galaxy Navatra លុប Video trailer បទ are you ok ចេញពី Facebook page នឹង Account TikTok របស់ផលិតកម្ម Galaxy Navatra ចេញជាបន្ទាន់ ទៅតាមការស្នើសុំរបស់ អ្នកគាំទ្រ ហើយត្រូវពិនិត្យមើលចំណុចខ្វះខាតកែលម្អឡើងវិញ។»