ពានរង្វាន់បាល់ទះសម្រាប់ក្លិបជើងឯកប្រចាំទ្វីបអាស៊ី 2021 Asian Men’s Club Volleyball Championship ដែលកំពុងតែរៀបចំនៅខេត្ត Nakhon Ratchasima ប្រទេសថៃ បានរកឃើញក្រុមឡើងដល់វគ្គផ្ដាច់ព្រ័ត្រហើយ ដោយក្រុមAl-Arabi របស់កាតារ ជួបក្រុម Foolad Sirjan របស់អ៊ីរ៉ង់ ដើម្បីដណ្តើមជើងឯកប្រចាំឆ្នាំ។
តាមពិតពានរង្វាន់នេះគ្រោងរៀបចំឡើងនៅឆ្នាំ២០២០ កន្លងមកនោះទេ ប៉ុន្ដែដោយសារស្ថានភាពនៃជំងឺកូវីដ-១៩ ទើបមានការផ្លាស់ប្តូរកម្មវិធីប្រកួត។ ក្រុមចំនួន១០ មកពីជុំវិញទ្វីបអាស៊ី បានចូលរួមចាប់ពីថ្ងៃទី៨ ដល់១៥ ខែតុលា ឆ្នាំ២០២១។ ក្រុមដែលឈ្នះជើងឯកពានរង្វាន់នេះមានឈ្មោះតំណាងឱ្យទ្វីបអាស៊ី ទៅចូលរួមប្រកួតក្នុងពានរង្វាន់ជើងឯកពិភពលោក 2021 FIVB Volleyball Men’s Club World Championship។
ក្រុមដែលចូលរួមទាំង១០ បានបែងចែកជាពូល ដោយក្នុងនោះមាន ពូល A ក្រុមBurevestnik Almaty (កាហ្សាក់ស្ថាន) Nakhon Ratchasima QminC (ថៃ) South Gas (អ៊ីរ៉ាក់) Kazma (គុយវ៉ែត) CEB (ស្រីលង្កា)។ ពូល B មាន Foolad Sirjan (អ៊ីរ៉ង់) Al-Arabi (កាតារ) Diamond Food (ថៃ) AGMK (អ៊ូបេគីស្ថាន) និង Rebisco (ហ្វីលីពីន)។
ចំណែកលទ្ធផលវគ្គពាក់កណ្ដាលផ្ដាច់ព្រ័ត្រឃើញថា៖
- Burevestnik Almaty ២-៣ Al-Arabi (២៥-១៥,១៥-២៥,២៥-១៥,២៦-២៨,៩-១៥)
- Foolad Sirjan ៣-០ Nakhon Ratchasima QminC (២៥-១៩,២៥-២៣,២៥-២២)
កម្មវិធីប្រកួតដណ្តើមចំណាត់ថ្នាក់លេខ៣ ធ្វើឡើងនៅវេលាម៉ោង៣:៣០នាទីរសៀលថ្ងៃសុក្រ នេះដោយក្រុម Burevestnik Almaty ជួបក្រុម Nakhon Ratchasima QminC។
ចំណែកកម្មវិធីប្រកួតដណ្តើមជើងឯកវិញក្រុម Al-Arabi ជួបក្រុម Al-Arabi នៅវេលាម៉ោង៦:៣០នាទីល្ងាចថ្ងៃជាមួយគ្នា។
ពានរង្វាន់បាល់ទះ Asian Men’s Club Volleyball Championship រៀបចំឡើងដំបូងក្នុងឆ្នាំ១៩៩៩ មកម៉្លេះ រាល់១ឆ្នាំម្តង ហើយក្រុម Paykan Tehran មកពីអ៊ីរ៉ង់ ឈ្នះជើងឯកបានច្រើនជាងគេរហូតទៅ៧ដងម្នាក់ឯង និងឈ្នះជើងឯករងបាន២ដង៕
