សមាជិកនិងក្រុមការងារថតភាពយន្តខ្នាតធំរឿង «សុភាពបុរស» ឬ «Gentleman» ដែលសម្ដែងដោយបុរសសង្ហា Joo Ji Hoon និង Park Sung Hoon ត្រូវបានឃ្មុំទិច។
កាលពីថ្ងៃទី១៥ ខែតុលាម្សិលមិញនេះ សារព័ត៌មាន News1 បានរាយការណ៍ថាមានតួអង្គនិងក្រុមការងារថតរឿង «Gentleman» ត្រូវបានសត្វឃ្មុំវាយប្រហារក្នុងពេលកំពុងថត តែជាសំណាងល្អដែលមិនមានតួអង្គឯកទាំង៣រូប (Joo Ji Hoon, Choi Sung Eun និង Park Sung Woong) ត្រូវបានឃ្មុំទិចនៅក្នុងពេលដែលសត្វឃ្មុំបានវាយប្រហារទេនោះទេ។
យោងតាមការបញ្ជាក់ពីនាយកដ្ឋានអគ្គីភ័យបានឱ្យដឹងថាហេតុការណ៍នោះកើតឡើងតាំងពីថ្ងៃទី១៤ វេលាម៉ោងប្រមាណជា២.២១នាទីរសៀល ស្ថិតក្នុងខេត្ត Gyeonggi ដោយពេលនោះមានតួសម្ដែងប្រមាណ១៦នាក់ និង ក្រុមការងារថតត្រូវបានឃ្មុំទិច ហើយការដែលអ្នកទាំងនោះត្រូវឃ្មុំទិចដោយសារតែមានមនុស្សទៅរំខានសំបុកឃ្មុំទើបបណ្ដាលឱ្យអ្នកនៅក្បែរៗនោះត្រូវឃ្មុំទិចទាំងអស់។
ក្រោយហេតុការណ៍នេះចប់មនុស្សចំនួន៣នាក់ត្រូវបានសង្គ្រោះនៅកន្លែងកើតហេតុ ខណៈមនុស្ស១៣នាក់ផ្សេងទៀតត្រូវបានដឹកទៅព្យាបាលនៅមន្ទីរពេទ្យ ចំណែកសំបុកឃ្មុំត្រូវបានបុគ្គលិកនាយកដ្ឋានពន្លត់អគ្គីភ័យបោសស្អាតរួចរាល់ចេញពីទីនោះអស់ហើយ។
បើតាមប្រភពខាងក្នុងបានឱ្យដឹងថាក្រុមការងារថតទាំងអស់បានត្រលប់មកថតវិញដូចដើមហើយ ចំណែកការថតគ្រាន់តែពន្យារត្រឹមតែមួយឆាកសម្ដែងតែប៉ុណ្ណោះ។
«Gentleman» បានចាប់ផ្ដើមថតនៅខែកញ្ញា ឆ្នាំ២០២១ ហើយកំណត់កាលបរិច្ឆេទបញ្ចាំងនៅកំឡុងខែឧសភា ឆ្នាំ២០២២ ខាងមុខនេះ៕
