កាលពីប៉ុន្មានថ្ងៃមុននេះតារាសម្ដែង Kim Seon Ho ទើបតែបាត់បង់ការងារព្រោះផលិតផល Pizza ដ៏ល្បីឈ្មោះមួយបានលុបវីដេអូផ្សព្វផ្សាយដែលមានរូបលោកចេញដោយដាក់ក្នុង Private ក្រោយផ្ទុះរឿងនារីម្នាក់ចេញមកចោទប្រកាន់តារាប្រុសកូរ៉េ ដោយសន្មតឈ្មោះថាលោក «K» បង្ខំឱ្យខ្លួនរំលូតកូនរួចដោះដៃ រហូតឈានមកដល់ថ្ងៃទី១៩ ខែតុលា ម្សិលមិញនេះ Kim Seon Ho បានប្រកាសលុបចោលការធ្វើសន្និសីទកាសែតរបស់ខ្លួនដែលនិយាយពីភាពយន្តភាគរបស់ទូរទស្សន៍ TVN រឿង «Hometown Cha Cha Cha» ដោយការធ្វើសន្និសីទនេះគឺធ្វើបន្តបន្ទាប់ពីតួឯកស្រី Shin Min Ah តួឯកស្រីរឿងនេះដូចគ្នា។
ភ្នាក់ងារសិល្បៈ Salt Entertainment បានប្រាប់មកកាន់សារព័ត៌មានថា « ដោយសារតែមានបញ្ហាខ្លះធ្វើឱ្យ Kim Seon Ho ចាំបាច់ត្រូវលុបចោលសន្និសីទសារព័ត៌មានសម្រាប់រឿង Hometown Cha Cha Cha »
ខណៈតារាសម្ដែង Lee Sang Yi ដែលត្រូវធ្វើសន្នីសីទកាសែតដូចគ្នានោះក៏លុបចោលការធ្វើសន្នីសីទកាសែតក្រោមហេតុផលដូចគ្នានឹង Kim Seon Ho ដែរ នេះបើយោងតាមក្រុមហ៊ុនគ្រប់គ្រងលើតារារូបនេះបានចេញសេចក្ដីប្រកាស។
ដើមឡើយ Kim Seon Ho បានកំណត់ធ្វើសន្និសីទការសែតនៅថ្ងៃទី២០ ខណៈដែល Lee Sang Yi នឹងធ្វើសន្នីសីទកាសែតនៅថ្ងៃទី២១ ប៉ុន្តែដោយសារតែបញ្ហាព័ត៌មានចចាមអារ៉ាមរឿងតារាសម្ដែងលោក «K» និង អតីតមិត្តស្រី កំពុងតែផ្ទុះការចាប់អារម្មណ៍លើបណ្ដាញអ៊ិនធឺណិតទើបធ្វើឱ្យកម្មវិធីផ្សេងៗពាក់ព័ន្ធនឹងរឿង «Hometown Cha Cha Cha» ពន្យារពេលរៀបចំក្នុងខណៈនេះសិន៕
