ទោះបីជាយ៉ាងណាក្ដី ការផ្លាស់ប្ដូរឈ្មោះនេះមិនប៉ះពាល់ដល់ App ផ្សេងៗដែលស្ថិតក្នុងក្រុមហ៊ុនមេទេ ពោលគឺ ប្ដូរឈ្មោះសម្រាប់តែក្រុមហ៊ុនមេ ដែលជាម្ចាស់ពួកគេតែប៉ុណ្ណោះ។
លោក Mark Zuckerberg បានប្រកាសឈ្មោះថ្មីនេះ ខណៈដែលលោកបានបង្ហាញពីផែនការបង្កើត Metaverse ជាពិភពអនឡាញដែលមនុស្សអាចលេងហ្គេម ធ្វើការ និង ទំនាក់ទំនងក្នុងបរិយាកាសនិម្មិត Virtual reality (គឺជាអ្វីដែលយើងអាចមានអារម្មណ៍ថា ដូចពិតៗ) ដោយប្រើឧបករណ៍ VR។ ក្រុមហ៊ុន Facebook Inc ដែលបច្ចុប្បន្នបានប្ដូរឈ្មោះថា Meta គឺគ្រប់គ្រងលើបុត្រសម្ពន្ធមួយចំនួនទៀតដូចជា Facebook App, Messenger, Instagram, WhatsApp, Oculus, Workplace from Facebook, Portal និង Novi។
កាលពីថ្ងៃព្រហស្បតិ៍ ក្រុមហ៊ុនក៏បានដាក់បង្ហាញសញ្ញាថ្មីនៅទីស្នាក់ការកណ្ដាលរបស់ខ្លួននៅទីក្រុង Menlo Park រដ្ឋកាលីហ្វ័រញ៉ា ផងដែរ ដោយបានយកពាក្យ Meta មកជំនួសរូបសញ្ញាមេដៃ (Like)។
ពាក្យ Meta គឺជាពាក្យមកពីភាសាក្រិក ដែលមានន័យថា លើសពី។ ការកែប្រែនេះគឺជា សញ្ញាល្អសម្រាប់ដែលធ្វើឲ្យយើងអាចឈានទៅរស់នៅបែបយុគ្គសម័យថ្មីដ៏ទំនើប។ យើងសង្ឃឹមថា ពិភពនិម្មិតនេះ អាចត្រូវបានប្រើប្រាស់សម្រាប់អនុវត្តអ្វីៗទាំងអស់ ចាប់ពីការងារ ការលេង និងការប្រគុំតន្ត្រី រហូតដល់ការទំនាក់ទំនងផ្សេងៗ៕