មើលទៅសាច់រឿងរវាងលោក ឌួង ឆាយ និងអតីតភរិយាហាក់មិនអាចរកទីបញ្ចប់បានដោយងាយៗនោះទេ ព្រោះភាគីទាំងសងខាងដូចជាមិនព្រមចប់ហើយសម្រុះសម្រួលគ្នាស្ងាត់ៗឡើយ ប៉ុន្តែភាគីទាំងសងខាងជ្រើសរើសវិធីសាស្ត្របកអាក្រាតចំណុចអវិជ្ជមានរបស់អតីតដៃគូខ្លួនជាសាធារណៈនៅលើបណ្ដាញសង្គមទៅវិញ។ ដូចជានៅល្ងាចថ្ងៃច័ន្ទ ទី១ ខែវិច្ឆិកា ឆ្នាំ២០២១ នេះ លោក ឌួង ឆាយ ដែលធ្លាប់អះអាងពីចរិតដើរលេងផឹកស៊ីយប់ចោលកូនរបស់អតីតភរិយា (អ្នកនាង ដេត ម៉ាលីណា) បានបញ្ចេញវីដេអូភស្តុតាងសំខាន់មួយដែលបង្ហាញឱ្យឃើញការពិតថាអ្វីដែលលោកតែងតែលើកឡើង នាពេលកន្លងមកនោះគឺមិនមែនជាការចោទប្រកាន់ទេ។
លោក ឌួង ឆាយ បានពោលរៀបរាប់ភ្ជាប់ជាមួយនឹងរូបថតព្រមទាំងវីដេអូភស្ដុតាងដែលបណ្ដាលឱ្យមានការចាប់អារម្មណ៍យ៉ាងខ្លាំងពីសំណាក់អ្នកលេងបណ្ដាញសង្គមថា៖
«ចេះខ្មាស់គេដែរបានខំដើរឱនមុខ។ សុខចិត្តអោយអ្នកបើកឡានជូនកូនស្រីពៅមកផ្ទះដើម្បីខ្លួនឯងប្រញាប់ទៅក្លឹបផឹកស្រវឹងជោគជាំដល់ម៉ោង 3 ភ្លឺ 2 ថ្ងៃជាប់គ្នា។ គ្រាន់ជូនកូនស្រីមកផ្ទះសិនក៏មិនបាន នេះហើយអ្នកម្តាយដូចឡាំយ៉ងមិនខុសសូម្បីបន្តិច។ សូមអរគុណពូមីងបងប្អូនជាច្រើនដែរបានផ្ញើមកខ្ញុំ និងលើកទឹកចិត្តខ្ញុំអោយប្តឹងទាមទារសិទ្ធិចិញ្ចឹមកូនៗមកវិញ។ ខ្ញុំសង្ឃឹមជឿជាក់តុលាការនឹងផ្តល់អទិភាពសំរាប់ខ្ញុំដើម្បីទទួលបានសិទ្ធិចិញ្ចឹមកូនៗត្រលប់មកវិញ ឌួង ឆាយ»
យោងតាមការរៀបរាប់របស់លោក ឌួង ឆាយ ខាងលើនេះបានបង្ហាញឱ្យឃើញពីចេតនាបញ្ចេញភស្ដុតាងរូបភាពនិងវីដេអូនាពេលនេះ ក្នុងក្ដីសង្ឃឹមថាតុលាការអាចនឹងផ្ដល់សិទ្ធិអាទិភាពដល់លោកឱ្យទទួលបានសិទ្ធិចិញ្ចឹមកូនៗត្រលប់មកវិញ៕