Athena Chu ទើបតែអបអរសាទរខួប៥០ឆ្នាំកាលពីថ្ងៃទី២៥ ខែតុលា ឆ្នាំ២០២១ កន្លងទៅថ្មីៗនេះ នៅលើបណ្ដាញសង្គម Weibo ដែលជាបណ្ដាញសង្គមដ៏ធំនិងពេញនិយមមួយរបស់ចិន។ អ្នកគាំទ្រជាច្រើនបានចូលមកអបអរសាទរនិងជូនពរក្នុងថ្ងៃដ៏ពិសេសនេះ ប៉ុន្តែលើសពីនោះអ្នកគាំទ្រភាគច្រើនបានកោតសរសើរទៅលើរូបសម្រស់ដែលស្ទើតែមិនប្រែប្រួលរបស់តួឯកស្រីដ៏ល្បីល្បាញរូបនេះ និយាយបានថាពេលវេលាដូចជាមិនដើរទៅមុខសោះសម្រាប់រូបសម្រស់ដ៏ល្អឯកនេះ។ តើតារាឯកស្រីជើងចាស់រូបនេះមានអាថ៌កំបាំងពិសេសអ្វីខ្លះ?
យោងតាម Sohu តួឯកស្រីពីភាពយន្ត «ទេពឥន្ទ្រីសេនាក្លាហាន» ឆ្នាំ១៩៩៤ រូបនេះ នៅតែក្មេងជាងវ័យរហូតមកព្រោះតែលោកស្រីរស់នៅបែបស្រលាញ់សុខភាព ដោយមិនតឹងរ៉ឹងចំពោះខ្លួនឯងពេក។ កាលពីជំនាន់នៅសម្ដែងលោកស្រីធ្វើការដល់យប់ៗដូច្នេះលោកស្រីត្រូវកម្រិតរបៀបរបបញ៉ាំអាហារពេលយប់។ រៀងរាល់ពេលឆ្នាំអាហារ លោកស្រីញ៉ាំមានកម្រិត ពេលញ៉ាំរួចមិនចូលគេងភ្លាមៗនោះទេ តែទុកពេលឱ្យក្រពះបានរំលាយអាហារ។
ផ្លែឈើគឺជាចំណីដែលលោកស្រីពេញចិត្ត ព្រោះមានទាំងវីតាមីននិងជួយចម្អែតក្រពះបានយូរមិនធ្វើឱ្យលោកស្រីញ៉ាំអាហារដែលមានសារជាតិខ្លាញ់និងធាត់។ ប្រសិនបើថ្ងៃណាមិនរវល់ទេនោះ លោកស្រីនឹងចូលគេងរៀងរាល់ម៉ោង៩យប់ ហើយញ៉ាំអាហារត្រឹមតិចតួចដើម្បីចៀសវាងឡើងគីឡូ។
រូបមន្តអាថ៌កំបាំងមួយទៀតនោះគឺញ៉ាំទឹកមួយកែវ ឬញ៉ាំទឹកលាយទឹកឃ្មុំ ក្រោយពេលភ្ញាក់ពីគេង។ យោងតាមលោកស្រីវិធីសាស្ត្រនេះជួយលាងសម្អាតប្រព័ន្ធរំលាយអាហារ ធ្វើឱ្យរាងកាយស្រាល និងស្រួលខ្លួន។ បន្ថែមលើសពីនោះទឹកឃ្មុំជួយសំអាតបំពង់ក ធ្វើឱ្យសំឡេងស្រឡះល្អ។
អាថ៌កំបាំងដ៏ធំមួយទៀតនោះគឺហុតទឹកស៊ុបដែលមានសារធាតុប៉ូវ ក្នុងនោះតួស្រីដ៏ស្រស់សោភាពីភាពយន្ត «ស្ដេចស្វាទិនហ្វី» រូបនេះចូលចិត្តអាហារចំអិនពីផ្លែប៉ោមក្រហម ផ្សិតទឹកកក ជួនកាលញ៉ាំសំបុកត្រចៀកកាំ ព្រោះសំបុកត្រចៀកកាំជួយបង្កើនប្រូតេអ៊ិនក្នុងរាងកាយ ជួយកាត់បន្ថយភាពចាស់ជាងវ័យ។ លោកស្រី Anthena ចូលចិត្តវិធីថែសម្រស់តាមបែបធម្មជាតិ ប៉ុន្តែត្រូវការពេលវេលាយូរនិងខិតខំអនុវត្តជាបន្តបន្ទាប់។
ដូចបានលើកឡើងពីខាងដើមតារាសម្ដែងជើងចាស់តែរូបសម្រស់មិនចាស់តាមអាយុកាលរូបនេះមិនសូវចូលចិត្តកីឡាប្រើកម្លាំងនោះទេ ប៉ុន្តែលោកស្រីចូលចិត្តហែលទឹក ដូច្នេះមួយសប្ដាហ៍លោកស្រីហែលទឹក៣ដង ម្យ៉ាងវិញទៀតប្រទេសកីឡាបែបនេះជួយដុតបំផ្លាញខ្លាញ់បានលឿន ជួយឱ្យសុខភាពរឹងមាំ ពិសេសជួយឱ្យត្រគាកនិងសាច់ដុំភ្លៅរឹងមាំ។
ក្រៅពីនេះវិធីអស់ទាំងនេះ លោកស្រីក៏ជាមនុស្សម្នាក់ដែលចូលចិត្ត Skin Care ផងដែរ ព្រោះក្នុងផ្ទះលោកស្រីមានផលិតផលថែរក្សាស្បែកជាច្រើនមុខរៀបចំទុកដាក់នៅកន្លែងផ្សេងៗគ្នា។ ឧទាហរណ៍ដូចជាពេលរដូវរងាត្រូវប្រើផលិតផល តែនៅពេលផ្លាស់ប្ដូរចូលរដូវក្ដៅត្រូវប្ដូរមកប្រើផលិតផលមួយទៀត។ល។
យ៉ាងមិញ Anthena Chu បែរជាមានជំនឿមុតមាំមួយទៀតថាក្ដីស្រលាញ់ដែលស្វាមីមានចំពោះលោកស្រីគឺជាឱសថដ៏ស័ក្ដិសិទ្ធិដែលធ្វើឱ្យសម្រស់លោកស្រីនៅតែស្អាត។
នៅក្នុងកម្មវិធី«The King of Cards» នាឆ្នាំ២០១៧ តារាស្រីរូបស្រស់ម្នាក់នេះធ្លាប់បានពោលថា «បើសិនជាអ្នកសម្លឹងមើលទៅក្នុងកញ្ចក់ ហើយឃើញរូបសម្រស់របស់អ្នកកាន់តែស្អាតជាងមុន នោះបានសេចក្ដីថាអ្នកស្រលាញ់មនុស្សត្រូវ»។ នៅក្នុងកម្មវិធី Venus អ្នកម្ដាយកូនមួយរូបនេះក៏ធ្លាប់បាននិយាយដែរថាភាពរីករាយធ្វើឱ្យមនុស្សក្មេងជាងវ័យ ហើយលោកស្រីក៏ទទួលស្គាល់ដែរថាលោកស្រីនៅតែត្រូវរៀបការជាមួយនឹងមនុស្សដែលលោកស្រីស្រលាញ់ទោះជាយឺតពេលបន្តិចក្ដី។ បើជីវិតអ្នកមិនរីករាយទេនោះ គ្មានវិធីថែរក្សាសម្រស់ណាមានប្រសិទ្ធិភាពនោះទេ៕