អ្នកប្រយុទ្ធ Rittewada Petchyindee Academy ដែលទើបចុះកុងត្រាប្រកួតនៅសង្វៀន ONE Champions នាដើមខែ តុលា នឹងឡើងបង្ហាញខ្លួនលើកដំបូងនាថ្ងៃទី ១២ វិច្ឆិកា ខាងមុខនេះកក្នុងកម្មវិធី ONE:NEXTGEN II។
កីឡាករចំណូលថ្មី Rittewada នឹងជួបជើងខ្លាំងមិត្តរួមជាតិ Saemapetch Fairtex ដែលនឹងផ្ដល់ភាពសប្បាយរីករាយខ្លាំងដល់អ្នកទស្សនាជាមិនខាន។ ក្នុងការប្រកួតទម្ងន់ Bantamweight សិស្សគុនមកពីក្លិប Petchyindee Academy អាចប្រកួតបានទាំងមួយថៃ និង ឃីកបុកសីង។ ប៉ុន្តែ ការជួបមិត្តរួមជាតិ គឺជាការប្រកួតមួយថៃ។
កីឡាករវ័យ ២៥ ឆ្នាំធ្លាប់ឲ្យដឹងបែបនេះ ៖«ខ្ញុំពិតជារីករាយណាស់ដែលបានក្លាយជាផ្នែកមួយចូលរួមនៅសង្វៀន ONE Championship ដែលជាស្ថាប័នលំដាប់កំពូលមួយ។ វាជាឱកាសមួយល្អសម្រាប់ខ្ញុំ ដើម្បីបង្ហាញជំនាញនៅសង្វៀនលំដាប់ពិភពលោក និងជួបកីឡាករខ្លាំងៗជុំវិញពិភពលោក។ គោលដៅរបស់ខ្ញុំ គឺប្រកួតទាំងមួយថៃ និង ឃីកបុកសីង»។
កីឡាករមួយសង្កត់ធ្ងន់ថា៖«ខ្ញុំត្រូវសម្របខ្លួនតាមស្ទិលវ៉ៃរបស់ខ្ញុំ និងហ្វឹកហាត់ដើម្បីធ្វើឲ្យអ្នកគាំទ្រកាន់តែចាប់អារម្មណ៍។ ខ្ញុំនឹងធ្វើឲ្យល្អបំផុតដើម្បីឈានដល់គោលដៅក្លាយជាជើងឯកពិភពលោក ONE World Champion»។
Rittewada គឺជាជើងឯកសង្វៀនល្បី Lumpinee Stadium ឆ្នាំ ២០១៧, ជើងឯក WMC World Champion ឆ្នាំ ២០១៦, ឈ្នះពានកីឡាករល្អប្រចាំប៉ុស្ដិ៍លេខ៧ថៃ ( Channel 7 Stadium Fighter of the Year) ឆ្នាំ ២០១៤ និង២០១៥, និង ជើងឯកសង្វៀន Channel 7 Stadium ឆ្នាំ ២០១៤។
គូប្រកួតក្នុងសមរភូមិ ONE: NEXTGEN II
- ជើងខ្លាំងថៃ Saemapetch Fairtex ជួបថៃដូចគ្នា Rittewada Petchyindee (ប្រកួតមួយថៃ)
- ជើងខ្លាំងចិន Tang Kai ជួបកូរ៉េខាងត្បូង Yoon Chang Min (ប្រកួតគុនចម្រុះ)
- ជើងខ្លាំងចិន Zhang Chunyu ជួបទីលុយអានី Dovydas Rimkus (ប្រកួតបម្រុងកម្មវិធីខ្សែក្រវាត់ឃីកបុកសីងទម្ងន់ Featherweight)
- ជើងខ្លាំងថៃ Jo Nattawut ជួបជើងខ្លាំងអាមេនី-រុស្ស៊ី Yurik Davtyan (ប្រកួតបម្រុងកម្មវិធីខ្សែក្រវាត់ឃីកបុងសីងទម្ងន់ Featherweight)
- ជើងខ្លាំងម៉ាឡេស៊ី Agilan Thani ជួបជើងខ្លាំងជប៉ុន Hiroyuki Tetsuka (ប្រកួតគុនចម្រុះទម្ងន់៨៦គីឡូក្រាម)
- ជើងខ្លាំងចិន Han Zi Hao ជួបជើងខ្លាំងបារាំង Victor Pinto (ប្រកួតមួយថៃ)
