បន្ទាប់ពីទទួលបានលិខិតអនុញ្ញាត (ទិដ្ឋាការ) ពីក្រសួងវប្បធម៌និងវិចិត្រសិល្បៈ នៅព្រឹកថ្ងៃទី៤ ខែវិច្ឆិកានេះ វីដេអូខ្លីផ្សព្វផ្សាយបទ «Are You OK» ថ្មី ត្រូវបានយកមកបង្ហោះនៅលើផេកផលិតកម្ម Galaxy Navatra ប៉ុន្តែសង្កេតឃើញថាម្ដងនេះសាធារណជន ពិសេសអ្នកគាំទ្របានបញ្ចេញនូវចំណាប់អារម្មណ៍ខុសប្លែកពី MV ទីមួយដែលរងនូវការរិះគន់យ៉ាងចាស់ដៃពីបណ្ដាអ្នកលេងបណ្ដាញសង្គម។ តើសាធារណជន ក៏ដូចជាអ្នកគាំទ្រយល់ឃើញបែបណាពេលឃើញ MV បទចម្រៀង ថ្មី?
«Are You OK?» បទចម្រៀងដែលធ្វើឱ្យផ្ទុះការមិនពេញចិត្តមួយប្រាវពីសំណាក់ប្រិយមិត្តអ្នកស្ដាប់ព្រោះតែនៅក្នុង MV បទចម្រៀងនោះមានដាក់បញ្ចូលតួសម្ដែងស្លៀកសំលៀកបំពាក់សិស្ស មានឈុតបាញ់កាំភ្លើងក្នុងថ្នាក់រហូតអ្នកឧកញ៉ា ឡេង ណាវ៉ាត់ត្រា ដែលជា CEO នៅក្នុងផលិតកម្ម Galaxy Navatra ចេញបញ្ជាឱ្យដកវីដេអូផ្សព្វផ្សាយចេញពី Channel ផ្លូវការទាំងអស់របស់ផលិតកម្មមួយនេះមិនថាជា Youtube, Facebook និង Tiktok នោះទេ។
យ៉ាងណាមិញបទចម្រៀងដែលច្រៀងដោយកញ្ញា តន់ ចន្ទសីម៉ា នេះត្រូវបានយកទៅថតកែសម្រួលឡើងវិញ ត្រង់ចំណុចដែលមានការរិះគន់និងមិនពេញចិត្តពីសំណាក់អ្នកគាំទ្រនិងមហាជន។ បទចម្រៀងថ្មីនេះបានប្រើប្រាស់ត្រឹមតែពាក្យ «Are You Ok?» ហើយដកចោលចេញវិញនូវពាក្យ «Can You Go in the Classroom ផ្លាប់ ផ្លាប់ ផ្លាប់ With me» ហើយក៏បានដក (លុប) ចោលឈុតឆាកដែលតួប្រុសលោក ប៊ឺរី ប្រើប្រយោគនេះសួរទៅកាន់តួស្រីកញ្ញា តន់ ចន្ទសីម៉ា ដែលជាម្ចាស់បទ។ ជាងនោះទៀតបទចម្រៀងនេះក៏បានប្ដូរឈុតបាញ់កាំភ្លើងវែងក្នុងថ្នាក់ មកនៅត្រឹមមានឈុតស្រីៗបាញ់កាំភ្លើងជ័របាញ់ទឹកវិញ។
ក្រឡេកមកមើលមតិសាធារណជន នៅពេលបានឃើញបទចម្រៀងខារ៉ាអូខេ (MV) ថតថ្មីនេះបានបង្ហោះនៅលើ Facebook ក៏ដូចជាបង្ហោះជា Full Video នៅលើឆាណែលថ្មីរបស់ផលិតកម្ម Galaxy Navatra ដែលមានឈ្មោះថា Cam-Pop Galaxy Navatra ទទួលបានការសរសើរច្រើនពីសំណាក់ហ្វេន (អ្នកគាំទ្រ)។
TopHuntie ទំរាំនឹងបានចេញបទនេះ រឿងរ៉ាវមិនតិចទេ តែសប្បាយចិត្តពេលឃេីញបទនេះបានចេញដោយជោគជ័យ ️️
ពិជ័យ សម្បត្តិ បើអ៊ីចឹងមកមានអ្នកណាគេថាអី!
Dol Sodavy ថតប្លង់ដូចកូរ៉េចឹង
នេះគ្រាន់តែជាមតិលើកឡើងខ្លះៗ ដែលសារព័ត៌មានត្រយងបានដកស្រង់ចេញពីការយល់ឃើញរបស់សាធារណជន ក៏ដូចជាអ្នកលេងបណ្ដាញសង្គម បន្ទាប់ពីបានទស្សនាបទចម្រៀងបានកែសម្រួលថ្មីនេះ៕
