យោងតាមការផ្សាយរបស់ស្ថាប័នព័ត៌មានដ៏ធំ CNN បានឱ្យដឹងថាចំនួនមានមនុស្ស៨នាក់ស្លាប់និងរាប់រយនាក់ទៀតរងរបួសក្នុងការប្រគំតន្ត្រី Astroworld ខណៈអាជ្ញាធរកំពុងតែធ្វើការស៊ើបអង្កេតរកឱ្យឃើញមូលហេតុដែលបណ្ដាលឱ្យមានសោកនាដកម្មដ៏អាក្រក់នេះកើតឡើង។
កម្មវិធីបុណ្យតន្ត្រី Astrowold ដែលរៀបចំដោយតារាចម្រៀង Rap លោក Travis Scott បានផ្ទុកមនុស្សចូលទស្សនាច្រើនដែលបណ្ដាលឱ្យមានការរុញច្រានគ្នាទៅមុខឆាក រហូតបណ្ដាលឱ្យមានការដួលសង្កត់គ្នាហើយក៏ជាកត្តាបណ្ដាលឱ្យមានបញ្ហាពិបាកដកដង្ហើមនិងសន្លប់ព្រោះតែថប់ដង្ហើម។
អ្នកទៅចូលរួមក្នុងការប្រគំតន្ត្រីនិងស្ថិតក្នុងហេតុការណ៍បានប្រាប់បណ្ដាញសារព័ត៌មានឱ្យដឹងថា៖ «គ្មានអ្នកណាម្នាក់អាចកំរើកខ្លួនបាននោះទេ ខណៈដែលមនុស្សចាប់ផ្ដើមប៉ះទង្គិចគ្នាហើយក៏មានអ្នកដួលសង្កត់លើគ្នា។»
ជនរងគ្រោះដែលបានស្លាប់បាត់បង់ជីវិតមានយុវជនអាយុ១៤ឆ្នាំម្នាក់,១៦ឆ្នាំម្នាក់,២១ឆ្នាំ២នាក់,២៣ឆ្នាំ២នាក់,២៧ឆ្នាំម្នាក់និងម្នាក់ទៀតមិនទាន់ដឹងអាយុ។ មនុស្សជាង៣០០នាក់ដែលរងបួសស្រាលត្រូវបានព្យាបាលនៅកន្លែងកើតហេតុ ខណៈមនុស្សដែលមានរបួសធ្ងន់២៥នាក់ផ្សេងទៀតត្រូវបានបញ្ជូនទៅសំរាកព្យាបាលនៅមនុស្សពេទ្យក្បែរនោះ។ ក្នុងចំណោមអ្នករបួសទាំងអស់មានអាយុតិចជាងគេបំផុត១០ឆ្នាំ នេះបើតាមការឱ្យដឹងពីអាជ្ញាធរមានសមត្ថកិច្ច៕