កីឡដ្ឋានបាល់ទាត់ក្នុងខេត្តកំពង់ស្ពឺ ដែលគ្រោងប្រើប្រាស់ថវិកាអស់ប្រមាណ២លានដុល្លារអាមេរិក ពេលនេះសាងសង់បានប្រហែល៥០%ហើយគិតត្រឹមដើមខែវិច្ឆិកា ឆ្នាំ២០២១ នេះ ខណៈតាមតាមផែនការនឹងបញ្ចប់ដំណាក់កាលទី១ នៅឆ្នាំ២០២២ ខាងមុខ។
កីឡដ្ឋានបាល់ទាត់លក្ខណៈស្តង់ដារនេះ ស្ថិតនៅតាមបណ្ដោយផ្លូវជាតិលេខ៤៤ ចម្ងាយប្រមាណ៤គីឡូម៉ែត្រ ពីផ្លូវជាតិលេខ៤ នៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ដែលសាងសង់លើផ្ទៃដីជាង៤ហិកតា។ ក្លិបបាល់ទាត់ណាហ្គាវើល សមាជិកពានរង្វាន់លីគកំពូលកម្ពុជា មានផែនការប្រើប្រាស់កីឡដ្ឋាននេះធ្វើជាទឹកដីប្រកួតរបស់ខ្លួនក្នុងប្រកួតនានា ក្នុងពេលខាងមុខ។
កន្លងមកឯកឧត្តម វ៉ី សំណាង អភិបាលខេត្តកំពង់ស្ពឺ ធ្លាប់បានបញ្ជាក់ថាការកសាងកីឡដ្ឋាននេះយ៉ាងហោចណាស់ចំណាយពេលវេលា យ៉ាងតិច១៥ខែ ចាប់ពីថ្ងៃបុកគ្រឹះពីថ្ងៃទី២១ ខែកុម្ភៈ ឆ្នាំ២០២១ កន្លងមក។ ឯកឧត្តម ហ៊ុន ម៉ានី ប្រធានគណៈកម្មការ អប់រំ យុវជន កីឡា កិច្ចការសាសនា វប្បធម៌ និងទេសចរណ៍ នៃរដ្ឋសភា និងជាអ្នកតំណាងរាស្រ្ដមណ្ឌលកំពង់ស្ពឺ បានអញ្ជើញចូលក្នុងពិធីក្រុងពាលីបើកការដ្ឋានសាង នៅគ្រានោះផងដែរ។
កីឡដ្ឋានស្តង់ដារអន្តរជាតិនេះ ក្រោមជំនួយឧបត្ថម្ភទឹកប្រាក់ប្រមាណជាង ២លានដុល្លារអាមេរិកពីមូលនិធិណាហ្គាវើល និងសប្បុរសជននានា ដែលគ្រោងនឹងបញ្ចប់ការសាងសង់ទាំងមូលឱ្យទាន់ពេលវេលាដែលកម្ពុជា ធ្វើជាម្ចាស់ផ្ទះកីឡាស៊ីហ្គេម ឆ្នាំ២០២៣។
