កាលពីថ្ងៃទី១៤ ខែវិច្ឆិកា ឆ្នាំ២០២១ តារាសម្ដែងម្ចាស់រហស្សនាមតារាទឹកភ្នែកកញ្ញា នី មុនីនាថ បានបង្ហោះសារមួយដែលធ្វើឱ្យមហាជនមានការចាប់អារម្មណ៍យ៉ាងខ្លាំង ព្រោះក្នុងសំណេរនោះបានបង្ហាញឱ្យឃើញថាតារាសម្ដែងរូបស្រស់ អ្នកនាង សារ៉ាយ សក្កណា បានមកដល់ព្រះរាជាណាចក្រកម្ពុជាហើយ ប៉ុន្តែមិនទាន់បានជួបគ្នាដោយសារតែអ្នកនាង សារ៉ាយ សក្កណា ជាប់ធ្វើចត្តាឡីស័ក។ នៅថ្ងៃទី១៥ ខែវិច្ឆិកា ឆ្នាំ២០២១ ប្រមុខរាជរដ្ឋាភិបាលបានប្រកាសឱ្យអ្នកដែលធ្វើដំណើរពីក្រៅប្រទេសមិនចាំបាច់ធ្វើចត្តាឡីស័កនោះទេ ប្រសិនបើធ្វើតេស្ដរកមិនឃើញមានវិជ្ជមានជំងឺ Covid-19 នោះ ទើបនៅថ្ងៃទី១៦ ខែវិច្ឆិកា ម្សិលមិញនេះ នៅលើបណ្ដាញសង្គម កញ្ញា នី មុនីនាថ បានបង្ហោះរូបថត និងវីដេអូជាមួយនឹងអ្នកនាង សារ៉ាយ សក្កណា ក៏ដូចជាកូនស្រីយ៉ាងសប្បាយរីករាយ។
ថ្វីត្បិតតែនៅក្នុងហ្វេសប៊ុករបស់អ្នកនាង សារ៉ាយ សក្កណា មិនបានផុសពីដំណើរមកដល់ប្រទេសកម្ពុជារបស់ខ្លួន ក៏ដូចជាសកម្មភាពផ្សេងរបស់គ្រួសារក្ដី ប៉ុន្តែបើមើលតាមហ្វេសប៊ុកមិត្តភក្ដិជិតស្និទ្ធរបស់អ្នកនាង មានហ្វេសប៊ុករបស់កញ្ញា នី មុនីនាថ ក៏ដូចជាលោក ហេង នរៈកក្កដា ក្ដីបានបង្ហោះវីដេអូដែលបង្ហាញវត្តមានអ្នកនាង សារ៉ាយ សក្កណា និងកូនស្រីដ៏ស្រស់ស្អាតរបស់អ្នកនាងនៅក្នុងនោះដូចគ្នា។
តាមរយៈវីដេអូរបស់អ្នកនាង នី មុនីនាថ ដែលបាន Live កាលពីថ្ងៃម្សិលមិញនេះ ក្រៅពីវត្តមានសាមីខ្លួន និង អ្នកនាង គឹម លីហ្សាហើយនោះ ហ្វេននៅសង្កេតនិងចាប់អារម្មណ៍ឃើញមានវត្តមានអ្នកនាង សារ៉ាយ សក្កណា និងកូនស្រីដ៏ស្រស់ស្អាតរបស់អ្នកនាងនៅក្នុងវីដេអូនោះផងដែរ។ ក្រៅពីនោះក៏នៅមានវីដេអូថតជុំគ្នារវាងកញ្ញា នី មុនីនាថ អ្នកនាង សារ៉ាយ សក្កណា និងលោក ហេង នរៈកក្កដា ដែលបានបង្ហោះនៅក្នុងគណនីហ្វេសប៊ុករបស់តារាសម្ដែងរូបស្រស់ នី មុនីនាថ ហើយវីដេអូនោះក៏ត្រូវបានលោក ហេង នរៈកក្កដា បង្ហោះចែកចាយបន្តនៅលើ Wall គណនីហ្វេសប៊ុករបស់លោកដែរ។
តាមការសង្កេតឃើញថា អ្នកនាង សារ៉ាយ សក្កណា ដូចជាមិនបានបង្ហោះចែករំលែកពីដំណើរមកដល់ស្រុកខ្មែររបស់ខ្លួន ដូចសព្វមួយដងឡើយដោយបង្ហោះលើ Facebook ចុងក្រោយគឺនៅថ្ងៃទី១១ ខែវិច្ឆិកា ជាវីដេអូច្រៀងនៅក្នុង App Tiktok ជាមួយនឹងកូនស្រីច្បង និងមានវត្តមានកូនប្រុសពៅរបស់អ្នកនាងនៅក្នុងនោះដែរ។
វត្តមានរបស់អតីតតារាសម្ដែងសំបុរស្រអែមស្រស់រូបនេះ ទទួលបាននូវការសាទរយ៉ាងច្រើនពីសំណាក់សាធារណជន មិត្តសិល្បករ ពិសេសហ្វេនដែលនៅតែនឹកនឹងគាំទ្រស្នាដៃសម្ដែងរបស់កញ្ញានាពេលកន្លងមក។
ក្រុមការងារសារព័ត៌មានត្រយងបានធ្វើការទំនាក់ទំនងទៅកាន់អ្នកនាង សារ៉ាយ សក្កណា ដើម្បីសាកសួរព័ត៌មានបន្ថែមឱ្យកាន់តែជាក់ច្បាស់ថែមទៀតពីគោលបំណងរបស់អ្នកនាង ប៉ុន្តែមិនទាន់មានចម្លើយតបណាមួយឡើយ ចំពោះដំណើរមកកាន់ប្រទេសកំណើតរបស់អ្នកនាង និងក្រុមគ្រួសារលើកនេះ៕