ថ្មីៗនេះ មហាជនអ្នកគាំទ្រការប្រកួត MGI ( Miss Grand International ) បានជ្រាបមកហើយ បេក្ខភាពបវរកញ្ញាតំណាងប្រទេស កម្ពុជា កញ្ញា ប៉ូ គីមថេងសុតធីតា បានធ្វើដំណើរចាកចេញពីអាកាសយានដ្ឋានអន្តរជាតិភ្នំពេញ ឆ្ពោះទៅកាន់ខេត្តភូកេតក្នុងប្រទេសថៃ ដើម្បីត្រៀមចូលរួមប្រកួតនៅលើឆាកអន្ដរជាតិ កាលពីពេលថ្មីៗនេះ។ មហាជនបានផ្ដោតការចាប់អារម្មណ៍ជាពិសេសចំពោះបវរកញ្ញាឆ្នាំនេះ ព្រោះរៀមច្បង លីវ ជីលី បវរកញ្ញា MGC ឆ្នាំ២០២០ ធ្វើបានយ៉ាងល្អនៅលើវេទិកាប្រកួតមួយនេះ ដូច្នេះគេចមិនផុតនោះទេដែលមហាជនរំពឹងទុកខ្ពស់ថា សុតធីតា MGC ២០២១ នឹងធ្វើបានលទ្ធផលល្អដូចជារៀមច្បងឆ្នាំ២០២០។
យ៉ាងណាមិញ បវរកញ្ញាសម្បុរស្រអែមកំពស់១.៧៥សង់ទីម៉ែត្ររូបនេះ មានវាសនាល្អ សម្រេចទទួលបានភាពជោគជ័យមួយតង់បាត់ទៅហើយ ដោយកញ្ញាបានជាប់នៅក្នុង Top 5 តាមរយៈការបោះឆ្នោត។ នៅក្នុងចំណោមនេះរួមមាន វៀតណាម កម្ពុជា ឥណ្ឌូនេស៊ី ហ្វីលីពីន និងប្រទេសហ្គូតិម៉ាឡា ។ សុតធីតា ក៏តែងតែបានសកម្មភាពយ៉ាងសកម្មមួយចំនួននៅពេលទៅដល់ប្រទេសថៃ ដូចជានាពេលជួបជុំអាហារល្ងាច ខាងអ្នករៀបចំកម្មវិធីបាន Live video សម្ភាសកញ្ញា ដែលធ្វើឱ្យហ្វេនអ្នកគាំទ្រនៅកម្ពុជា និងប្រជាជនថៃ មានការភ្ញាក់ផ្អើល និងចូលរួមអបអរដល់សុតធីតា ទាំងមិនទាន់បានឈានឡើងលើឆាកធំប្រជែងតែម្ដង។
ទន្ទឹមគ្នានោះដែរ ហ្វេនអ្នកគាំទ្ររបស់ កញ្ញា ប៉ូ គីមថេងសុធីតា នៅរង់ចាំចោលក្រសែភ្នែកតាមមើលសកម្មភាពនាងគ្រប់ពេលវេលា។ គ្រប់គ្នាកំពុងតែរំពៃមើលថា តើសុតធីតា មានភាពក្លាហ៊ាន អង់អាច ដើម្បីវាយបំបែកឧបសគ្គ ក្នុងសមរភូមិបវរកញ្ញាដ៏ក្ដៅគគុកនេះ បានកម្រិតណា បើធៀបជាមួយ លីវ ជីលី ដែលត្រឡប់មកវិញដោយ ជ័យជម្នះនិងមោទកភាពជាតិ ទោះមិនបានគ្រងមកុដ MGI ២០២០ ក្ដី។
គួររំលឹកដែរថា បើទោះមិនបានគ្រងមកុដ បវរកញ្ញា លីវ ជីលី ធ្លាប់បានឈ្នះបានពានរង្វាន់ «Grand Pageant’s Choice Award» នៅលើឆាក MGI ដោយទទួលបានការបោះឆ្នោតគាំទ្រច្រើនជាងគេបង្អស់ក្នុងចំណោម Miss Grand ទាំង៦៣ប្រទេស។ មួយទៀតគឺ ការឈ្នះការប្រកួត Challenge ឬហៅថា Challenge «Queen with the Golden Crown» បានជាប់ចំណាត់ថ្នាក់លេខ១ ក្នុងការប្រកួត Challenge «Queen with the Golden Crown»នេះ នៅក្នុងចំណោម Top 5 ផងដែរ។
ជាមួយគ្នានោះ មហាជនខ្មែរ ក៏បានចូលរួមអបអរសាទរគ្រប់គ្នាផងដែរ ហើយក៏បន្តការជួយបោះឆ្នោត ក៏ដូចជាការផ្ដល់កម្លាំងចិត្ត និងលើកទឹកចិត្ត ដល់ កញ្ញា ប៉ូ គីមថេងសុធីតា ព្រមទាំងជូនពរឱ្យនាងទទួលបានជ័យជំនះនៅក្នុងវគ្គបន្តបន្ទាប់ទៀត រហូតឈានដល់វគ្គផ្ដាច់ព្រ័ត្រដែលប្រារព្ធនៅថ្ងៃទី៤ ខែធ្នូ ឆ្នាំ២០២១ ខាងមុខនេះហើយ៕