លោក មាស សំអឿន គ្រូបង្វឹកក្រុមអគ្គីសនីកម្ពុជា បានប្រកាសចែកផ្លូវជាមួយក្រុមនៅតំបន់ទួលសង្កែ ដែលជាសមាជិកពានរង្វាន់លីគកំពូលកម្ពុជា មួយនេះនៅរសៀលថ្ងៃអង្គារ ទី២៣ ខែវិច្ឆិកា ឆ្នាំ២០២១ ពោលគឺអស់បេសកកម្មទាំងក្នុងរដូវកាលឆ្នាំ២០២១ នេះ។
អតីតគ្រូបង្វឹកក្រុមបៀលប្រាយយូណាយធីត វេស្ទើនភ្នំពេញ រូបនេះបានបញ្ជាក់ថា៖«ពេលនេះខ្ញុំបាទ មាស សំអឿន បានបញ្ចប់កុងត្រាជាមួយក្រុមអគ្គីសនីកម្ពុជា ហើយ។ ខ្ញុំសូមថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំក៏ដូចជាកីឡាករនិងគ្រូរួមក្រុមទាំងអស់ សូមជួបតែពុទ្ធពរទាំង៤ប្រកាសនិងជៀសឆ្ងាយពីជំងឺកូវីដ-១៩គ្រប់ៗគ្នា។ ជាចុងក្រោយខ្ញុំសូមជូនពរឱ្យក្រុមអគ្គីសនីកម្ពុជា នឹងមានការរីកចម្រើនទៅអនាគត»។
ក្រុមអគ្គីសនីកម្ពុជា ជាក្រុមតែមួយគត់ដែលប្រើប្រាស់កីឡាករក្នុងស្រុកសុទ្ធ ហើយក្រុមនេះបានបញ្ចប់ត្រឹមចំណាត់ថ្នាក់លេខ១១ ក្នុងចំណោមសមាជិកទាំង១៣ក្រុម ក្នុងលីគកំពូលកម្ពុជារដូវកាលឆ្នាំ២០២១ ក្រោយប្រកួតបាន១៦លើក ឈ្នះបាន៣លើក ស្មើ៤លើក និងចាញ់៩លើក មាន១៣ពិន្ទុ។ ចំណែកឯក្នុងពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ចេញត្រឹមវគ្គ៨ក្រុមចុងក្រោយ ដោយថ្វីជើងភ្នំពេញក្រោន លទ្ធផល ១-០៕