រហូតមកទល់ពេលនេះ អ្នកលេងបណ្ដាញសង្គមថៃនៅមិនទាន់បាត់ក្ដៅស្លឹកត្រចៀកនៅឡើយទេ ចំពោះរឿងឈុតតំណាងជាតិ Miss Universe Cambodia ឈុត «វប្បការិកា ចត្វានិមិត្ត» ដែលមានទម្រង់ល្ខោនខោល ខ្មុកទសមុខ យកទៅបង្ហាញនៅឆាកអន្ដរជាតិ Miss Universe International 2021 នាពេលខាងមុខឆាប់ៗនេះ។
បើងាកមកមើលអ្នកស្នេហាវប្បធម៌ខ្មែរឯណេះវិញ ហាក់ដូចជាមិនបានបញ្ចេញកំហឹងតបតក្នុងរឿងនេះទេ បែបជាពោលពាក្យពេចន៍មួយចំនួនឱ្យអ្នកគាំទ្រខ្មែរស្ងប់ចិត្តទៅវិញ។ យោងតាមការបង្ហោះរបស់ហ្វេសប៊ុកផេកឈ្មោះ «វប្បធម៌ខ្មែរ Khmer culture» បានបង្ហោះសារថា ៖ «អ្នកកាន់តែនិយាយនោះស្តែងថាអ្នកកាន់តែបង្ហាញភាពល្ងង់ពកថ្ងាសរបស់អ្នកទៅកាន់ពិភពលោកក្រុងរាពណ៌ ឬទសមុខជាតួឯកធំមួយហើយក៏ជាតួ១ក្នុងចំណោមតួទាំង៤ នាយរោង នាង យក្ស ស្វាសំខាន់ៗនៃទម្រង់សិល្បៈបុរាណខ្មែរ របាំព្រះរាជទ្រព្យឬល្ខោនហ្លួង និងល្ខោនខោល »។
ប្រភពដដែរបានបន្ដថា «យើងពុំគួរតវ៉ាឬប្រើសំដីជេរប្រមាថគេឡើយ ព្រោះរឿងបែបនេះមិនមែនជារឿងកើតឡើងលើកទី១ឡើយ។ផ្ទុយទៅវិញយើងគួរដឹងថា ទម្រង់សិល្បៈបុរាណនេះពុំដូចគ្នាឡើយ ដោយទម្រង់ល្ខោនហ្លួងរាំដោយនាដកា និងទម្រង់ល្ខោនខោលរាំដោយសិល្បៈករ ការសម្តែងក្បាច់ក្រឡា ខ្នាតខុសគ្នា មួយពោល មួយច្រៀងខុសគ្នា។ជាមោទនភាពដ៏មហាអស្ចារ្យទម្រង់របាំព្រះរាជទ្រព្យត្រូវបានដាក់បញ្ចូលកាលពី ថ្ងៃទី៧ ខែ វិច្ឆិកា ឆ្នាំ ២០០៣ នៅទីក្រុងអ៊ីស្គន់ប៊ុលប្រទេសតួគី ដោយស្នាព្រះហត្តដ៏ថ្លាថ្លៃនៃសម្តេចព្រះរៀមជាអម្ចាស់។និងទម្រង់ល្ខោនខោលវត្តស្វាយអណ្តែត ដែលជាខោលទម្រង់ដើមត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិនាថ្ងៃទី ២៨ ខែ វិច្ឆិកាឆ្នាំ ២០១៨ នៅទីក្រុងព័រល្វី សាធារណរដ្ឋម៉ូរីស រួចរាល់អស់ហើយ»។
ជាចុងក្រោយប្រភពនេះបានអះអាងថា «ដូច្នេះការលាបពណ៌ជេរប្រទិចរបស់គាត់គ្មានន័យឡើយសម្រាប់យើង អ្នកណាជាម្ចាស់ដើមពិតប្រាកដពិភពលោកបានដឹងជាក់ស្តែងគ្មានក្រឡៃឡើយ។ផ្ទុយទៅវិញយើងគួរតែខិតខំស្រវ៉ាស្រទិញសិក្សារៀនសូត្រ ស្រាវជ្រាវ រក្សាការពារ លើកតម្កើនអោយតម្លៃនៃសិល្បៈជាតិយើងអោយក្លាវក្លាអោយពិភពលោកបានដឹងនិងស្គាល់អោយកាន់តែច្បាស់នោះគឺគ្រប់គ្រាន់ហើយ»។
យ៉ាងណាមិញ អ្នកគាំទ្រខ្មែរ ក៏បានចូល Comment គាំទ្រចំនុចដែលបានលើកឡើងនេះថា «កុំខ្វល់ពាក់ឡើងឆាកទៅ ខ្ញុំចាំគាំទ្រ»។ ខ្លះទៀតថា «ត្រឹមត្រូវណាស់អេតមីន»។ អ្នកគាំទ្រកញ្ញា ងិន ម៉ារ៉ាឌី នៅបន្ដជំហរគាំទ្រចំពោះការនាំឈុតតំណាងជាតិមួយនោះទៅលើឆាកអន្ដរជាតិ និងជូនពរឱ្យកញ្ញាទទួលបានភាពជោគជ័យថែមទៀតផង៕