វិស័យទេសចរណ៍នឹងងើបឡើងវិញបន្ដិចម្ដងៗ ចាប់ពីខែធ្នូ ២០២១នេះ បន្ទាប់ពីប្រទេសកម្ពុជាបើកចំហទទួលអ្នកទេសចរវ៉ាក់សាំង ហើយភ្ញៀវទេសចរអន្ដរជាតិចាប់ផ្ដើមធ្វើដំណើរមកកម្សាន្តមកប្រទេសកម្ពុជា។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់សារព័ត៌មានត្រយងថា ភ្ញៀវទេសចរអន្ដរជាតិ ជាពិសេសភ្ញៀវទេសចរមកពីបណ្ដាប្រទេសជិតខាង និងអឺរ៉ុបក៏ចាប់ផ្ដើមធ្វើដំណើរមកប្រទេសកម្ពុជាបណ្ដើរ ប៉ុន្ដែនៅមិនទាន់ច្រើននៅឡើយ តែចាត់ទុកថា ខែធ្នូគឺជាខែក្ដីសង្ឃឹមនៃការងើបឡើងវិញនៃវិស័យទេសចរណ៍ នៅកម្ពុជា។
ការដាក់ក្ដីសង្ឃឹមនៃការងើបឡើងវិញនៃវិស័យទេសចរណ៍នេះ កើតមានបន្ទាប់ពីភ្នាក់ងារ ក៏ដូចជាក្រុមទេសចរណ៍ប្រមាណជា ៩០%បានបិទទ្វារ នៅអំឡុងផ្ទុះកូវីដ១៩ រយៈពេល២ឆ្នាំកន្លងមកនេះ។ ប៉ុន្ដែឥឡូវនេះ ភ្នាក់ងារ និងក្រុមហ៊ុនទេសចរណ៍ កំពុងត្រៀមបើកឡើងវិញបណ្ដើរៗ ដើម្បីផ្សព្វផ្សាយស្រូបយកភ្ញៀវទេសចរ។
លោកស្រី ឆាយ ស៊ីវលីន បានលើកឡើងទៀតថា ថ្វីបើខែធ្នូ ២០២១ ចាត់ទុកជាខែនៃក្ដីសង្ឃឹមទេសចរ ប៉ុន្ដែចង់ឲ្យវិស័យទេសចរណ៍ងើបឡើងវិញខ្លាំង យ៉ាងហោចត្រូវចំណាយពេលប្រមាណជា ៦ខែទៀត ព្រោះស្ទើរគ្រប់ផ្នែកត្រូវរៀបចំបើកដំណើរការក្រុមហ៊ុន និងការដាក់ចេញយុទ្ធសាស្រ្តផ្សព្វផ្សាយ ហើយភ្ញៀវទេសចរក៏ត្រូវត្រួតពិនិត្យអំពីផែនការ នៃការធ្វើដំណើរ ប្រកបដោយសុវត្ថិភាព។
យ៉ាងណាមិញ លោកស្រី ឆាយ ស៊ីវលីន ក៏បានជំរុញ និងលើកទឹកចិត្តដល់ក្រុមហ៊ុន ឬភ្នាក់ងារទេសចរទាំងអស់បន្ដអត់ធ្មត់ ក៏ដូចជាគ្រប់ភាគីពាក់ព័ន្ធដែលធ្វើការលើវិស័យបដិសណ្ឋារកិច្ច ត្រូវធ្វើឲ្យមានគុណភាព ជាទីសុវត្ថិភាពសម្រាប់ភ្ញៀវទេសចរ ដើម្បីស្រូបយកទេសចរមកកាន់ប្រទេសកម្ពុជា។ «អ្នកទេសចរនឹងមកកាន់តំបន់ទេសចរដែលមានគោលដៅសុវត្ថិភាព ហើយពួកគេមានភាពតានតឹងអស់រយៈពេល២ឆ្នាំមកនេះដោយសារតែស្ថានភាពជំងឺកូវីដ១៩ ដូច្នេះប្រសិនបើយើងជាគោលដៅទេសចរសុវត្ថិភាព គេនឹងមកកម្សាន្តច្រើនមិនខាង»។
សូមស្ដាប់កិច្ចសម្ភាសន៍ទាំងស្រុង រវាងអ្នកសារព័ត៌មានត្រយង និងលោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា លើប្រធានបទ «ខែធ្នូគឺជាក្ដីសង្ឃឹមការងើបឡើងវិញ នៃវិស័យទេសចរណ៍» ដូចខាងក្រោមនេះ ៖
ទាក់ទងទៅនឹងគោលដៅសុវត្ថិភាពទេសចរណ៍នោះ ក្រសួងទេសចរណ៍ ធ្លាប់បានដាក់ចេញនូវវិធានការបទដ្ឋានគតិយុត្ត ដើម្បីរក្សាបាននូវស្ថិរភាពអាជីវកម្ម និងធានបាននូវសុវត្ថិភាពជូនដល់ភ្ញៀវទេសចរជាតិ និងអន្ដរជាតិ។
ការដាក់ចេញវិធាននោះគឺ «ការធ្វើបច្ចុប្បន្នភាព នៃការអនុវត្តវិធានសុវត្ថិភាពទេសចរណ៍ និងនីតិវិធីស្ដង់ដាប្រតិបត្តិអប្បមរា (ហៅកាត់ថា SOP) តាមគន្លងប្រក្រតីភាពថ្មី» សម្រាប់អាជីវកម្មទេសចរណ៍ធំៗចំនួន៤ ដែលកំពុងធ្វើសកម្មភាព រួមមាន អាជីវកម្មសេវាកម្មស្នាក់នៅទេសចរណ៍ អាជីវកម្មភោជនីយដ្ឋាន-អាហារដ្ឋានទេសចរណ៍ រមណីយដ្ឋានទេសចរណ៍ និងសហគមន៍ទេសចរណ៍ និងអេកូទេសចរណ៍។
គួរបញ្ជាក់ថា រាជរដ្ឋាភិបាលកម្ពុជា បានប្រកាសបើកទទួលទេសចរអន្តរជាតិឡើងវិញចាប់ពីថ្ងៃទី៣០ ខែវិច្ឆិកា ក្រោមទម្រង់ជា «ទេសចរណ៍វ៉ាក់សាំង» ដោយចាប់ផ្តើមមុនគេ នៅក្រុងព្រះសីហនុ និងក្រុងកោះរ៉ុង ក្នុងខេត្តព្រះសីហនុ រួមទាំងនៅតារាសាគរ ក្នុងខេត្តកោះកុង។ តំបន់ទេសចរណ៍មាត់សមុទ្រដ៏ទាក់ទាញទាំង ៣កន្លែងនេះ មានជនជាតិចិនរស់នៅ និងវិនិយោគច្រើនជាងគេ។ ដូច្នេះនៅពេលបើកទទួលអ្នកទេសចរ ដែលចាក់វ៉ាក់សាំងរួច នៅបំណាច់ខែវិច្ឆិកានេះ អាចមានចិនធ្វើដំណើរតាមយន្តហោះ ចូលមកច្រើន៕