អ្នកចាំទី អ៊ុំ វិចិត្រ ត្រូវបានក្លិបបាល់ទាត់ជើងឯក៧សម័យកាលនៃលីគកំពូលកម្ពុជា គឺក្រុមភ្នំពេញក្រោន ប្រកាសចែកផ្លូវគ្នាហើយ នៅព្រឹកថ្ងៃទី២ ខែ ធ្នូ ឆ្នាំ២០២១ នេះនៅលើហ្វេសប៊ុកផ្លូវការរបស់ក្លិប។
សេចក្ដីប្រកាសរបស់ក្លិបបញ្ជាក់ថា៖«ក្លិបបាល់ទាត់ភ្នំពេញក្រោន បានសម្រេចចែកផ្លូវគ្នាជាមួយអ្នកចាំទី អ៊ុំ វិចិត្រ ក្រោយរូបគេបានចូលរួមជាមួយក្លិបក្នុងរយៈពេលពីររដូវកាលកន្លងមកនេះ។ យើងសូមជូនពរឲ្យវិចិត្រ បានទទួលជោគជ័យបន្ថែមទៀតសម្រាប់អាជីពជាកីឡាករបាល់ទាត់របស់ខ្លួន»។
កីឡាករ អ៊ុំ វិចិត្រ បានចាប់អាជីពជាកីឡាករ ដោយចូលរួមជាមួយក្រុម Tiffy Army FC ចន្លោះឆ្នាំ២០០៨ ដល់២០១៩ ហើយនៅឆ្នាំ២០១៩ ដល់២០២១ បានចូលរួមជាមួយក្រុមភ្នំពេញក្រោន។
នៅមិនទាន់មានសេចក្ដីប្រកាសផ្លូវការណាមួយថា អ៊ុំ វិចិត្រ នឹងចូលរួមក្រុមណាមួយនៅឡើយនោះទេ ប៉ុន្តែបើតាមដំណឹងក្រៅផ្លូវការលេចឮថាទំណងត្រឡប់ទៅកាន់ក្លិបចាស់ Tiffy Army FC៕
