សិស្សវិទ្យាល័យម្នាក់ត្រូវតុលការកាត់ទោសឱ្យជាប់ពន្ធនាគាររហូតដល់ទៅ ១៤ឆ្នាំក្រោយរូបគេត្រូវចាប់ខ្លួនបានថាលបលួចមើលរឿងកូរ៉េខាងត្បូងរឿង «the Man From Nowhere» រយៈពេល៥នាទីនៃសាច់រឿងប៉ុណ្ណោះ។
យោងតាមសារព័ត៌មាន Daily NK ដែលជាកាសែតអនឡាញមួយរបស់កូរ៉េខាងជើងបានចេញផ្សាយកាលពីពេលថ្មីៗនេះបានឱ្យដឹងថា សិស្សវិទ្យាល័យម្នាក់ដែលរស់នៅ ខេត្ត Yanggang-Do ត្រូវបានកាត់ទោសឱ្យជាប់ពន្ធនាគារដោយសារតែរូបគេលបលួចមើលរឿងរបស់ប្រទេសកូរ៉េខាងត្បូង។ ខ្លឹមសារក្នុងសារព័ត៌មានខាងលើបានសរសេរថា៖ «កាលពីថ្ងៃទី៧ ខែវិច្ឆិកា ឆ្នាំ២០២១ សិស្សវិទ្យាល័យម្នាក់មានអាយុ១៤ឆ្នាំ រស់នៅ ក្រុង Hyesan ត្រូវបានតុលការកាត់ទោសឱ្យជាប់ទោសនិងរងទណ្ឌកម្មពលកម្មធ្ងន់ធ្ងរក្នុងពន្ធនាគារចំនួន១៤ឆ្នាំ ដោយសារតែគេបានលួចមើលរឿងកូរ៉េ the Man From Nowhere ចំនួន៥នាទី»
កាលពីឆ្នាំមុន កូរ៉េខាងជើងបានបង្កើតច្បាប់ថ្មីមួយ ដែលអ្នកប្រព្រឹត្តិខុសអាចជាប់ពន្ធនាគារ និងរងទណ្ឌកម្មពលកម្មធ្ងន់ធ្ងររហូតដល់១៥ឆ្នាំ ឬប្រហារជីវិតប្រសិនបើចាប់បានថាបាននាំចូល ចែកចាយ វីដេអូ និង មាតិកាផ្សេងៗពីប្រទេសកូរ៉េខាងត្បូង។
ទោះបីជាច្បាប់នេះមិនបានបញ្ជាក់ថាបង្កើតឡើងដើម្បីដាក់ទណ្ឌកម្មចំពោះយុវវ័យ ប៉ុន្តែបណ្ដាញសារព័ត៌មានបានផ្សាយថា អាជ្ញាធរកូរ៉េខាងជើងបានព្យាយាមផ្ញើសារថាពួកគេមិនបន្ធូរបន្ថយទោសទណ្ឌដោយសារតែអ្នកប្រព្រឹត្តិខុសគឺជាយុវជននោះឡើយ ប៉ុន្តែសិស្សសាលាដែលធ្វើខុសត្រូវរងពិន័យដូចជាមនុស្សចាស់ទទួលដូចគ្នា។
សារព័ត៌មានដដែលបានចង្អុលបង្ហាញដែរថា ការដែលសិស្សសាលារងទោសទណ្ឌ ដោយគ្រាន់តែមើលរឿងត្រឹម៥នាទីនោះ គឺជាសញ្ញាណមួយដែលអាជ្ញាធរកំពុងតែព្យាយាមបង្កើតបរិយាកាសបំភ័យតាមរយៈការរឹតបន្តឹងច្បាប់ ក្រោយពេលទទួលដឹងថាភាពយន្តភាគ និងភាពយន្តកូរ៉េកំពុងតែក្លាយជាទីពេញនិយមក្នុងចំណោមយុវជនកូរ៉េខាងជើង។
ច្បាប់ថ្មីនេះមិនត្រឹមតែដាក់ទោសចំពោះសិស្សសាលានិងយុវជនដែលប្រពឹត្តិខុសនោះទេ ប៉ុន្តែឪពុកម្ដាយក៏ត្រូវទទួលទោសដូចជាកូនៗរបស់គេដែរ ព្រោះឪពុកម្ដាយខ្វះទំនួលខុសត្រូវក្នុងការអប់រំកូនៗរបស់ខ្លួនដូច្នេះ ឪពុកម្ដាយនឹងត្រូវពិន័យជាទឹកប្រាក់មួយសែនវ៉ុនដល់ពីរសែនវ៉ុន (ប្រមាណ៨៥ ទៅ ១៧០ ដុល្លារអាមេរិក)
យ៉ាងណាមិញប្រជាជនកូរ៉េខាងជើងបានសម្ដែងក្ដីបារម្ភចំពោះវាសនាឪពុកម្ដាយដែលមានកូនប្រព្រឹត្តិខុសថាអាចនឹងត្រូវបណ្ដេញចេញពីប្រទេសឬបញ្ជូនទៅ ជំរុំគុកនយោបាយ ជាជាងគ្រាន់តែផាកពិន័យជាប្រាក់តាមធម្មតា។ ក្នុងន័យនេះឪពុកម្ដាយអាចនឹងត្រូវរងទារុណកម្មធ្ងន់ធ្ងរដែរប្រសិនបើកូនរបស់ពួកគេល្មើសនឹងច្បាប់ធ្ងន់ធ្ងរ៕