តារាសម្ដែងជើងចាស់ហុងកុងលោក Wayne Lai (តួអង្គ ជ្រូក ប៉ាចេ) បានឆ្លើយតបទៅ កាន់អ្នកគាំទ្ររបស់ខ្លួន កុំឱ្យមានក្ដីបារម្ភចំពោះលោក ក្រោយផ្ទុះដំណឹងចចាមអារ៉ាមថាលោកកំពុងតែតស៊ូក្នុងជីវិតយ៉ាងលំបាក ថែមទាំងធ្លាក់ខ្លួនទៅ លក់របស់តាមចិញ្ចើមថ្នល់។
កាលពីថ្ងៃទី១ ខែធ្នូ ឆ្នាំ២០២១ តារាសម្ដែងជើងចាស់វ័យ ៥៧ឆ្នាំ បានផុសវីដេអូនៅ លើបណ្ដាញសង្គម Douyin (App ក្នុងស្រុករបស់ចិនដែលមានលក្ខណៈស្រដៀងគ្នានឹង Tiktok) ដោយក្នុងវីដេអូននោះគេឃើញលោកកំពុងតែលេងហ្គីតា។ សារព័ត៌មានបានយកវីដេអូរបស់លោកទៅ ផុសឡើងវិញ បន្ថែមដោយសំណេរថាខណៈនេះអតីតតួអង្គជ្រូកប៉ាចេ កំពុងតែធ្លាក់ខ្លួនក្រ គ្មានការងារធ្វើ ថែមទាំងលក់របស់តាមចិញ្ចើមផ្លូវដើម្បីចិញ្ចឹមជីវិត។
ដំណឹងនេះបានធ្វើឱ្យមហាជន ពិសេសអ្នកគាំទ្ររូបលោកបានផ្ដោតការចាប់អារម្មណ៍យ៉ាងខ្លាំង ដោយមានមនុស្សជាច្រើនបាននាំគ្នាសំរុកចូលទៅ បញ្ចេញមតិនៅ ខាងក្រោមវីដេអូរបស់លោក ដើម្បីសាកសួរសុខទុក្ខ និងចង់ដឹងពីស្ថានភាពរស់នៅ បច្ចុប្បន្នរបស់លោក។ តារារូបនេះបានឆ្លើយតបទៅ កាន់អ្នកគាំទ្រជាច្រើនវិញ ដោយផ្ដល់ដំបូន្មានចំពោះអ្នកទាំងអស់នោះកុំឱ្យយកចិត្តទុកដាក់ទៅ លើពាក្យចចាមអារ៉ាមច្រើនពេក។ ក្នុងនោះមានអ្នកមើលវីដេអូម្នាក់បានសួរលោកថា៖ «តើលោកច្រៀងផងនិងលក់របស់ផងក្នុងពេលតែមួយមែនទេ? អ្នកទិញច្បាស់ជាទៅ តម្រង់ជួរគ្នាទិញពេញផ្សារនោះមិនខាន» ហើយលោកបានឆ្លើយតបវិញថា «ប្រហែលជាអត់ទេ»
យោងតាមសារព័ត៌មានស៊ីនចូវ តារាសម្ដែងរូបនេះបច្ចុប្បន្នកំពុងតែនៅ ក្នុងប្រទេសចិនដីគោក ពេលនោះលោកបានឆ្លងកាត់ផ្សាររាត្រី រួចលោកបានស្នើសុំអ្នកលក់ឱ្យលោកខ្ចីហ្គីតាមកដេញលេងកម្សាន្ត។ តួអង្គជ្រូក ប៉ាចេ គឺជាតារាជើងចាស់ដែលធ្លាប់មានស្នាដៃសម្ដែងរឿងជាច្រើនឆ្នាំដូច្នេះលោកច្បាស់ជាមានអចលនទ្រព្យមានតម្លៃជាច្រើន ជាងនោះទៀតលោកគឺជាមនុស្សដែលឈ្លក់វង្វេងនឹងរថយន្ត លោកមានរថយន្ត Supercars យ៉ាងហោចណាស់ចំនួន៤ ចំណែកកូនប្រុសរបស់លោកបច្ចុប្បន្នកំពុងសិក្សានៅ សហរដ្ឋអាមេរិក ហើយតាមដឹងកូនប្រុសរបស់លោកក៏ជាមនុស្សឈ្លក់វង្វេងនិងចូលចិត្តលេងរថយន្តដូចជាឪពុករបស់ខ្លួន។
លោក Wayne Lai ហៅ ជ្រូកប៉ាចេ ចាប់ផ្ដើមអាជីពជាតារាសម្ដែងចាប់តាំងពីឆ្នាំ ១៩៨៦ ហើយធ្លាប់ឈ្នះពានរង្វាន់ «TVB Best Actor award» ចំនួន៣ដង។ រឿងដែលធ្វើឱ្យលោកមានឈ្មោះបោះសំឡេងនិងល្បីល្បាញខ្លាំងមានដូចជា «Journey to the west» ដែលលោកសម្ដែងជាតួអង្គជ្រូកប៉ាជេ ខណៈដែលបច្ចុប្បន្នលោកបានសម្ដែងរឿងភាគឱ្យ TVB រឿង «The Ringmaster» ជាតួអង្គឯក៕