តារាចម្រៀងបរទេសមានឈ្មោះល្បី ជាការកត់សម្គាល់តែងតែមានអង្គរក្សដើរតាមការពារអមឆ្វេងអមស្ដាំជាប់ជានិច្ចគឺជារឿងធម្មតា ជាពិសេសនៅពេលឡើងច្រៀងឬសម្ដែងក្នុងឆាកកម្មវិធីតន្ត្រីធំៗ និងក្នុងកម្មវិធីជំនួបហ្វេនជាដើម។ តែនៅ បច្ចុប្បន្ននេះ អ្នកគាំទ្រខ្មែរបានចាប់អារម្មណ៍ និងសង្កេតឃើញតាមរយៈការបង្ហោះរបស់ តារាចម្រៀង ខេមរៈ សិរីមន្ដ នៅលើបណ្ដាញសង្គមហ្វេសប៊ុក គឺតែងតែមានអង្គរក្សតាមអមការពារជានិច្ច។
ជាក់ស្ដែងថ្មីៗនេះ អ្វីដែលហ្វេនចាប់អារម្មណ៍នោះគឺ កំពូលតារាចម្រៀង ខេមរៈ សិរីមន្ដ បានឈប់រថយន្ដចាក់សាំងនៅស្ថានីយ៍ប្រេងឥន្ទនៈមួយ និងមួយទៀត គឺលោកបានបង្ហោះវីដេអូធ្វើដំណើរតាមផ្លូវនៅ ម្ដុំស្រុក ព្រៃជ្រូក មានទិសដៅ ពី ប៉ោយប៉ែត ទៅ កាន់ សៀមរាប ស្ដែងឱ្យឃើញក្នុងវីដេអូនោះគឺមានអង្គរក្ស២នាក់ តាមការពារលោកជាប់ជាប្រចាំ ហើយបើកទ្វាររថយន្ដ Rolls Royce ឱ្យលោកចេញចូលថែមទៀត មិនតែប៉ុណ្ណោះលោកក៏មានតៃកុងឡានផ្ទាល់ខ្លួនផងដែរ។ លោក ខេមរៈ សិរីមន្ដ បានបង្ហោះសារថា «ថ្ងៃនេះសុំប្រូម៉ូតលៀសហាល នៅ ព្រៃជ្រូក លើផ្លូវប៉ោយប៉ែត ទៅ សៀមរាប ជាតិណាស់បងប្អូន»។
គួរបញ្ជាក់ផងដែរថា លោក ខេមរៈ សិរីមន្ដ ចាប់ផ្ដើមបង្ហាញជីវិតឯកជន បែបហ៊ឺហារលំដាប់អភិជន និងមានអង្គរក្សហែរហមដំណើរបែបនេះ គឺចាប់ពីពេលដែលលោកផ្ដើមបញ្ចេញគម្រោងពុះដីឡូតិ៍លក់។ យ៉ាងណាមិញ កំពូលតារាចម្រៀងរូបនេះ ក៏នៅ មានជំនួញក្នុងដៃជាមួយភរិយាផ្សេងទៀតដែរ ដែលលោកជាអ្នកគ្រប់គ្រងផ្ទាល់គឺ ផលិតផលទឹកអប់នាំចូលពីប្រទេសបារាំងដោយផ្ទាល់ ដោយមានរូបលោកជាតំណាងឱ្យផលិតផលនេះផងដែរ៕
សូមទស្សនាវីដេអូខាងក្រោមនេះ ៖
