ឆ្នាំនេះប្រហែលជាឆ្នាំមួយស៊យសម្រាប់វេទិកា Miss Grand International ព្រោះមានរឿងអាស្រូវកើតមានឡើងជាបន្តបន្ទាប់ មិនថាជារឿងអាស្រូវរបស់ម្ចាស់ជ័យលាភីបវរកញ្ញា វៀតណាម ឬក៏វេទិកាប្រកួតផ្ទាល់នោះឡើយ។ រឿងហេតុលើកនេះមិនទាន់ចាត់ទុកថាធំ តែក៏មិនតូចពេកដែរព្រោះមានផេកគាំទ្រការប្រកួតបវរកញ្ញាមួយដេលមានឈ្មោះថា Miss Universe Missosology បានចេញមកបង្ហោះនិងបង្ហាញគោលជំហរមិនពេញចិត្តយ៉ាងខ្លាំងចំពោះលោក NAWAT ដែលជាម្ចាស់កម្មវិធី Miss Grand International ថែមទាំងមានការបបួលឱ្យអ្នកគាំទ្រដែលយល់ស្របចំពោះការលើកឡើងរបស់ខ្លួនជួយនាំគ្នា Unfollow ឬ Unlike កម្មវិធី MGI នៅ លើបណ្ដាញសង្គម facebook និង IG ជាដើម។
យោងតាមការបកប្រែមិនផ្លូវការស្ដីពីការរៀបរាប់របស់ផេកគាំទ្រខាងលើបានលើកឡើងថា «កម្មវិធី Miss Grand របស់លោក Nawat ផ្ដោតសំខាន់តែលើចំនួន Like លើ Page របស់កម្មវិធីប៉ុណ្ណោះ ជាជាងគិតគូររកវិធីសាស្ត្រអ្វីផ្សេងៗទៀត ដើម្បីផ្ដល់មកុដដល់ម្ចាស់ជ័យលាភី ដែលនេះជាទង្វើមួយលេងសើចចំពោះបេក្ខនារីផ្សេងៗ មិនសូវមានការគាំទ្រពីប្រជាជនថៃ។ នៅ ពេលនេះគ្រប់គ្នាមិនពេញចិត្តយ៉ាងខ្លាំងចំពោះកម្មវិធី Miss Grand International ហើយក៏ដឹងពីមូលហេតុដែរថាហេតុអ្វីទើបនារីមកពីវៀតណាមឈ្នះមកុដជ័យលាភី ប៉ុន្តែនិយាយនេះគឺមិនបានស្ដីបន្ទោសឱ្យបវរកញ្ញាវៀតណាមដែលប្រឹងប្រែងតស៊ូដើម្បីសម្រេចក្ដីសុបិនជាបវរកញ្ញារបស់ខ្លួនដែរ ដូច្នេះសូមឱ្យប្រជាជនវៀតណាមកុំចាញ់ល្បែងទាញយកប្រជាប្រិយភាពនេះ បវរកញ្ញារបស់វៀតណាមស័ក្ដិសមនឹងទទួលបានការគោរព។»
នៅ ខាងក្រោមផុសនោះ មានអ្នកគាំទ្រមួយចំនួនបានចូលមកជជែកពិភាក្សានិងវែកញែកគ្នាទាក់ទងនឹងរឿងរ៉ាវខាងលើនេះ ដោយម្នាក់ៗយល់ស្របចំពោះការលើកឡើងខាងលើ ហើយគ្រប់គ្នាសុទ្ធតែមានទស្សនៈតែមួយថាគ្រប់យ៉ាងគឺជា Game ដែលម្ចាស់ MGI បង្កើតឡើងដើម្បីទាមទារការចាប់អារម្មណ៍ជាពិសេសគឺចំនួន follower លើ IG៕