អ្នកលេងគុនចម្រុះ Murad Ramazanov សង្ឃឹមទទួលបានជ័យជម្នះលើកីឡាករ Zebaztian Kadestam ដើម្បីទទួលបានឱកាសទៅប្រកួតដណ្តើមខ្សែក្រវាត់ពិភពលោក ONE Welterweight។
អ្នកទាំងពីរត្រូវប្រឈមមុខគ្នានៅសមរភូមិប្រយុទ្ធ ONE: WINTER WARRIOS II នាថ្ងៃសុក្រ ទី១៧ ខែធ្នូ នេះ ហើយប្រសិនបើ Ramazanov ទទួលបានជ័យជម្នះ រូបគេមានប្រវត្តិឈ្នះ៣ដងក្នុងចំណោមឡើងប្រកួត៣ដងនៅស្ថាប័ន ONE និងជាស្ថិតប្រកួត១១ដង ឈ្នះទាំងអស់ ដោយមិនទាន់ស្គាល់បរាជ័យក្នុងអាជីពប្រដាល់ឡើយ។
គោលដៅរបស់ Ramazanov គឺសម្លឹងឃើញខ្សែក្រវាត់ពិភពលោករបស់អធិរាជសង្វៀនបច្ចុប្បន្ន Kiamrian Abbasov។ រូបគេបានឲ្យដឹងថា ៖«បើខ្ញុំឈ្នះ ខ្ញុំជាបេក្ខភាពលេចធ្លោជាងគេដែលអាចទៅដណ្តើមខ្សែក្រវាត់បាន។ ខ្ញុំខំប្រឹងហាត់ខ្លាំងណាស់ ហើយរឹតតែហាត់ទ្វេឡើង ដូច្នេះខ្ញុំសមទទួលបានឱកាសមាសហើយ»។
កីឡាកររុស្ស៊ីម្នាក់នេះទើបលេចមុខប្រកួតនៅសង្វៀន ONE ពីរដងប៉ុណ្ណោះ ប៉ុន្តែឈ្នះទាំងពីរដងក្នុងនោះឈ្នះ Bae Myung Ho និង Hiroyuki Tetsuka។ ប៉ុន្តែដើម្បីយកឈ្នះ ករ Zebaztian Kadestam មិនមែនជាការងាយស្រួលទេ ពីព្រោះដៃគូម្នាក់នេះជាអតីតជើងឯកពិភពលោកដែលមានសមត្ថភាពខ្ពស់។
Ramazanov និយាយថា ៖«ខ្ញុំមិនចង់ធ្វើជាកីឡាករល្អទេ តែខ្ញុំចង់ធ្វើជាកីឡាករឆ្នើមបំផុត។ ហើយរាល់ពេលឡើងប្រកួត ខ្ញុំមិនចង់ឈ្នះពិន្ទុទេ តែខ្ញុំចង់ឈ្នះដោយផ្តួលដៃគូពាក់កណ្តាលផ្លូវ»។
សម្រាប់ Kadestam មិនមែនជាកីឡាករដែលងាយយកឈ្នះទេ ពីព្រោះការឡើងប្រកួត៤លើកកន្លងមកគឺឈ្នះទាំងអស់គិតចាប់ពីឆ្នាំ២០១៨មក។
Ramazanov បានវិភាគពីសមត្ថភាពរបស់ Kadestam ថា ៖«ភាពខ្លាំងរបស់គាត់គឺជំនាញមួយថៃ តែខ្ញុំអត់បារម្ភអំពីភាពខ្លាំង និងភាពខ្សោយរបស់គាត់ទេ។ ខ្ញុំបារម្ភតែខ្លួនឯង ហើយធ្វើយ៉ាងណាឲ្យឈ្នះប៉ុណ្ណោះ»។
«គោលដៅចម្បងរបស់ខ្ញុំក្នុងការប្រកួតនេះគឺត្រូវមានល្បឿនលឿន។ ផែនការប្រកួតរបស់ខ្ញុំគឺចាប់ផ្តើមភ្លាមដាក់សម្ពាធ និងគ្រប់គ្រងការប្រកួត។ ខ្ញុំមិនត្រឹមតែចង់បញ្ឈប់គាត់ពាក់កណ្តាលផ្លូវប៉ុណ្ណោះទេ តែខ្ញុំចង់បង្ហាញពីការប្រកួតដ៏អស្ចារ្យ»៕
