តារាចម្រៀងស្អកជ្រកក្រោមទ្រនំកាឡាក់ស៊ីណាវ៉ាត្រា លោក ខេម កន្លងមកតែងតែបិទបាំងពីទំនាក់ទំនងស្នេហាជាមួយនារីម្នាក់ ប៉ុន្តែស្រាប់តែ ថ្មីៗនេះតារាចម្រៀងប្រុសរូបនេះបង្កភាពភ្ញាក់ផ្អើលខ្លាំងមែនទែនដល់ហ្វេនអ្នកគាំទ្រ ក្រោយពីដាច់ចិត្តទម្លាយរូបថត ជាមួយនារីជាគូស្នេហ៍ មានកាយវិការកៀកកើយយ៉ាងជិតស្និទ្ធ។
បើតាមគេដឹង លោក ខេម មិនធ្លាប់បង្ហើបពីអត្តសញ្ញាណគូស្នេហ៍របស់ខ្លួនឱ្យទស្សនិកជនបានស្គាល់ឡើយ តែគេដឹងថា នាងជានារីខ្មែរ រស់នៅប្រទេសបារាំង។ ខេម បានប្រកាសនិងទទួលស្គាល់ថាខ្លួនមានគូស្នេហ៍រួចហើយ ដោយបង្ហោះសារនៅលើហ្វេសប៊ុកខ្លួនថា «ខ្ញុំមានស្នេហាហើយអូខេ ស្រាយចង្ងល់ពុកម៉ែ បងប្អូន បងបង សារព័ត៌មាន ច្បាស់ឬនៅប៉ុណ្ណឹង គាត់នេះហើយតែងតែផ្តល់ស្នាមញញឹមនឹងយោបល់ដល់ខ្ញុំគ្រប់ពេលវេលា ៥ឆ្នាំហើយ»។
បើទោះមកទល់ពេលនេះចំណងស្នេហ៍លោក ខេម មានរយៈពេលជាង ៥ ឆ្នាំមកហើយ តែលោកនៅពុំទាន់មានគម្រោងរៀបការនិងគ្នានៅឡើយទេ លោក ខេម ធ្លាប់លើកឡើងប្រាប់អ្នកសារព័ត៌មានថា ២ ឬ ៣ ឆ្នាំទៀតទើបលោក សម្រេចិត្តរៀបការដោយសារលោកចង់ទុកពេលដើម្បីរកប្រាក់ចំណូលឱ្យបានច្រើនសិន ។ មួយវិញទៀត នៅក្នុងពេលនេះគឺស្ថិតនៅក្នុងស្ថានភាពលំបាកនៃជំងឺកូវីដនៅឡើយ៕
