មហាជនទូទៅបានស្គាល់ច្បាស់ពីស្នាដៃលោក ឯម រាម ជុំវិញការតុបតែងខ្លួនស្ទាយប្លែកៗ ជាគំនិតច្នៃប្រឌិតបែបសហសម័យដោយខ្លួនឯង មិនចម្លងពីបរទេស។ កន្លងមក ក៏មានមហាជនមួយចំនួនតូចបានយល់ថា សិល្បកររូបនេះ គឺជាមនុស្សឆ្កួត ដែលបញ្ចេញស្នាដៃមកចម្លែកៗមើលមិនចូលភ្នែក និងមានខ្លះទៀតថាលោកជាអ្នកបំផ្លាញវប្បធម៌ប្រពៃណីជាតិ ជាពិសេសគឺការច្នៃម៉ូដដែលដកស្រង់ពីសិល្បៈបុរាណ។ តែលោក ឯម រាម ក៏ត្រូវបានមហាជនមួយចំនួនដែលស្គាល់ និងយល់ច្បាស់ពីសិល្បៈសហសម័យ ឱ្យតម្លៃលើស្នាដៃរបស់ជាពិសេសតែម្ដង។
នៅថ្ងៃកម្មវិធីតាំងពិព័រណ៍សិល្បៈសហសម័យនៅកម្ពុជា ដើម្បីអបអរសាទរការដាក់បញ្ចូល ទីក្រុងសៀមរាប ជាទីក្រុងវប្បធម៌អាស៊ាន នាពេលថ្មីៗនេះ បណ្ឌិតម៉ូដ ឯម រាម ក៏បាននាំស្នាដៃដ៏អច្ចារ្យប្លែកភ្នែកមួយយកមកតាំងបង្ហាញ និងឱ្យឈ្មោះថា «នាដការី» ។ លោក ឯម រាម បានផ្ដល់បទសម្ភាសន៍ប្រាប់អ្នកសារព័ត៌មានត្រយងថា លោកបានដកស្រង់គំនិតធ្វើចម្លាក់បង្គុំនេះ ចេញពីរូបភាពឈុតស្បៃធំរបស់នាដកាម្នាក់ ឈររាំត្រដាងដៃនៅមុខប្រាសាទអង្គរ ដែលជារូបភាពមានអាយុរាប់រយឆ្នាំមកហើយ។ លោកថា សិល្បៈរបស់លោកមួយនេះ ត្រូវបានគេហៅថាជា Art Concept ជាសិល្បៈបែបសហសម័យ ដោយប្រមូលផ្ដុំសម្ភារៈពីសំណល់ឈើចាស់ៗ និងកម្ទេចកម្ទីដែកចាស់ៗ មកបង្គុំគ្នា ដើម្បីរំលេចរូបរាងចម្លាក់បង្គុំទំនើបនេះឡើង។
លោក ឯម រាម ប្រាប់ថា ចម្លាក់នេះបានបង្កើតឡើងតាំងពីឆ្នាំ២០១៩មកម្លេះ ហើយបានធ្វើដំណើរទៅឈរតាំងបង្ហាញនៅមណ្ឌលវប្បធម៌បារាំង វិចិត្រសាលឯមរាម និងបានតាំងបង្ហាញនៅសារមន្ទីខ្លែងនេះតែម្ដង។ លោកបន្ដទៀតថា លោកតែងប្រមូលគំនិតថ្មីៗ ដែលមានជាភ័ស្តុតាងប្រវត្តិសាស្ត្រ និងជីវភាពរបស់នៅរបស់ប្រជាជនទៅតាមសម័យកាល។ ស្នាដៃរបស់លោកក៏ទទួលបានពីការគាំទ្រតាមរយៈតារាសិល្បៈល្បីឈ្មោះ និងផលិតកម្មមួយចំនួនផងដែរ។ ជាក់ស្ដែងថ្មីៗនេះ លោកក៏បានសហការជាមួយតារាចម្រៀងស្រី ទេព បូព្រឹក្ស ក្នុងការច្នៃម៉ូដសម្លៀកបំពាក់ប្លែកភ្នែកចំនួន ២ឈុតរួមមាន ឈុតស្បៃធំ ដែលច្នៃចេញពីស្បែកគោ និងឈុតគ្រុឌ ដែលច្នៃចេញពីកន្ទុយគោជាដើម។ បណ្ឌិតម៉ូដរូបនេះ ក៏បានអះអាងប្រាប់អ្នកសារព័ត៌មានត្រយងទៀតថា ភាគច្រើនដែលជាស្នាដៃរបស់លោក គឺជាការប្រមូលរបស់របរសម្ភារៈចាស់ៗដែលឈប់ប្រើ យកមកច្នៃឱ្យមានតម្លៃឡើងវិញ។ រាល់ការច្នៃម៉ូដរបស់លោកគឺតែងតែមានការប៉ះពាល់ដល់អារម្មណ៍របស់មហាជនមួយចំនួន ដោយសារតែពួកគាត់នៅមិនទាន់យល់ពីអ្វីទៅជាសិល្បៈច្នៃម៉ូដសហសម័យ។
យ៉ាងណាមិញ សម្រាប់មហាជនអ្នកស្រឡាញ់ការច្នៃម៉ូដ និងហ្វេសសិនបែបសហសម័យ ក៏អាចអញ្ជើញទៅទស្សនាការដាក់តាំងបង្ហាញស្នាដៃជាច្រើនរបស់លោក ឯម រាម និងសិល្បករខ្មែរ រួមទាំងបរទេស នៅបរិវេណសារមន្ទីរខ្លែង ដែលពិព័រណ៍នេះនឹងបិទបញ្ចប់នៅថ្ងៃទី១១ ខែមករា ឆ្នាំ២០២២ខាងមុខនេះ។ មានស្នាដៃសិល្បករជាច្រើនដែលបានដាក់តាំងបង្ហាញនៅទីនោះ គឺសុទ្ធសឹងតែជាស្នាដៃដែលមានតម្លៃថ្លៃខ្ពស់រហូតដល់ខ្ទង់ម៉ឺនដុល្លារឯណេះ៕
