សមាជិកចំនួន៣នាក់ហើយនៃក្រុមចម្រៀង K-Pop ដ៏ពេញនិយមរបស់កូរ៉េខាងត្បូង BTS បានតេស្ដរកឃើញមានវិជ្ជមានជំងឺកូវីដ-១៩ នេះបើយោងតាមសេចក្ដីប្រកាសរបស់ក្រុមហ៊ុន BIGHIT Music។
សមាជិកទាំងអស់នៅក្នុងក្រុមទើបតែត្រលប់មកប្រទេសកូរ៉េវិញក្រោយក្រុមនេះបញ្ចប់បេសកកម្មការប្រគំតន្ត្រីទេសចរណ៍នៅអាមេរិក ក្រោយខកខានអស់រយៈពេល២ឆ្នាំដោយសារតែការផ្ទុះរីករាលដាលនៃជំងឺកូវីដ-១៩។
នៅក្នុងចំណោមសមាជិកទាំង៣ដែលវិជ្ជមាន Covid-19 គឺ Suga ដោយតារាចម្រៀងរូបនេះបានធ្វើតេស្ដ PCR កាលពីថ្ងៃព្រហស្បត្តិសប្ដាហ៍មុន ហើយរកឃើញលទ្ធផលវិជ្ជមាននៅថ្ងៃសុក្រពេលព្រឹក។ មកដល់ទឹកដី suga មិនបានជួបសមាជិកណាម្នាក់នោះទេ ព្រោះប្រទេសនេះមានច្បាប់រឹតបន្តឹងខ្លាំង ដូច្នេះមកដល់ប្រទេសភ្លាមលោកត្រូវធ្វើចត្តាឡីស័កភ្លាមៗ។
ងាកមកសមាជិកម្នាក់ទៀតដែលវិជ្ជមាន Covid-19 ដែរនោះគឺ RM ប្រធានក្រុម BTS ផ្ទាល់តែម្ដង។ លោកបានធ្វើតេស្ដ PCR កាលពីថ្ងៃទី១៧ ខែធ្នូ ឆ្នាំ២០២១ ដោយលទ្ធផលដែលទទួលបានកាលណោះគឺអវិជ្ជមាន ប៉ុន្តែនៅថ្ងៃសៅរ៍កន្លងមក ពោលគឺនៅមុនពេលដែលលោកបញ្ចប់ការធ្វើចត្តាឡីស័ក លោកធ្វើតេស្ដម្ដងទៀតទើបឃើញថាលោកមានវិជ្ជមាន Covid-19 នេះបើតាមការប្រកាសរបស់ផលិតកម្ម ប៉ុន្តែមកទល់នឹងថ្ងៃសៅរ៍ដែលរកឃើញវិជ្ជមាន RM មិនមានចេញអាការៈណាមួយឡើយ
ចំណែកប្រុសស្អាត Jin វិញ ក៏បានឆ្លងកាត់ការធ្វើតេស្ដ PCR ដែរហើយក៏រកឃើញមានវិជ្ជមាននៅថ្ងៃសៅរ៍ដូចគ្នានឹង RM ដែរ ដោយការតេស្ដនេះធ្វើឡើងបន្ទាប់ពីលោកមានអាការៈផ្ដាសាយ តែអាការៈលោកមានកម្រិតស្រាល ដូចជាក្ដៅខ្លួនតិចតួចប៉ុណ្ណោះ។ ក្រោយលោកមកដល់ប្រទេសកូរ៉េវិញ Jin បានធ្វើតេស្ដ PCR ចំនួន២ដង ទីមួយកាលពីថ្ងៃទី៦ ខែធ្នូ ពេលលោកមកដល់ប្រទេសកូរ៉េភ្លាមៗនិងមួយទៀតមុនពេលបញ្ចប់ការធ្វើចត្តាឡីស័ក។
សមាជិកទាំង៣នាក់សុទ្ធតែចាក់វ៉ាក់សាំងគ្រប់ទាំង២ដូស ហើយខណៈនេះអ្នកទាំង៣ក៏កំពុងតែសំរាកព្យាបាលនៅផ្ទះទៅតាមសេចក្ដីណែនាំរបស់ក្រសួងសុខាភិបាល។ ប្រទេសកូរ៉េបានកំណត់ច្បាប់ឱ្យអ្នកដំណើរមកពីក្រៅប្រទេសទាំងអស់ត្រូវធ្វើចត្តាឡីស័កចំនួន១០ថ្ងៃ ទោះជាបានចាក់វ៉ាក់សាំងរួចក្ដី បន្ទាប់មកអ្នកទាំងអស់ត្រូវតែធ្វើតេស្ដ PCR ចំនួន២ដងទើបអាចបញ្ចប់ចត្តាឡីស័កនិងដើរហើរដោយសេរីវិញ។
សមាជិក BTS ទាំងអស់ទទួលបានការឈប់សំរាករយៈពេលវែងក្រោយពីពួកគេបានបញ្ចប់ការងារទៅតាមកាលកំណត់ដូចជាកម្មវិធី BTS Permission to dance on Stage, LA និង 2021 Jingle Ball Tour នេះបើតាមការឱ្យដឹងពីផលិតកម្ម BITHIT Music៕
