នៅយប់ថ្ងៃទី ២៧ ខែធ្នូ ឆ្នាំ២០២១នេះ គេបានឃើញវត្តមានតារាសម្តែងប្រុសស្រីល្បីឈ្មោះជាច្រើនរូបបានបង្ហាញវត្តមានក្នុងកម្មវិធីជប់លៀងបុគ្គលិកប្រចាំឆ្នាំរបស់ស្ថានីយកងយុទ្ធពលខេមរភូមិន្ទទូរទស្សន៍ប៉ុស្តិ៍លេខ៥ ឬ Pool Party TV5។ សិល្បករដែលមានវត្តមានក្នុងកម្មវិធីនោះ មានដូចជាក្រុមបវរកញ្ញា Miss Grand Cambodia កញ្ញា ព្រះកាយច័ន្ទ កញ្ញា រចនា រ៉ាវ៉ាឌី កញ្ញា ផាត់ ផាន់ណា កញ្ញា អាង សុជាតា លោក សេង មង្គល លោក ជា លាងឈែ លោក មុំ សុធារ៉ា លោក ឆឹម សក្កដា និងសិល្បករជាច្រើនរូបទៀត ។
ក្រៅពីតារាសិល្បៈដែលបានចូលរួមហើយនោះ គេក៏ឃើញមានបុគ្គលិកប្រចាំស្ថានីយទាំងខ្មែរ និងថៃ រួមទាំងអ្នកសារព័ត៌មានជាច្រើននាក់ បង្កបរិយាកាសឱ្យកាន់តែសប្បាយរីករាយ ថែមទាំងរឹតចំណងទំនាក់ទំនងរវាងគ្នា និងគ្នាឱ្យកាន់តែប្រសើរ។ សម្រាប់តែតារាដែលបានចូលរួម គឺសុទ្ធតែសម្ដែងក្នុងរឿងកន្លងៗមករបស់ប៉ុស្ដិ៍លេខ៥ និងធ្លាប់ចូលរួមច្រៀង រាំលើឆាកតន្ត្រីរបស់ប៉ុស្តិ៍ បានវិលមកជួបជុំគ្នាសារជាថ្មីម្ដងទៀត ក្រោយពីមានការរក្សាគម្លាតសង្គមពីគ្នា នាអំឡុងពេលកូវីដ១៩។
លោក ស៊ុផាឆ័យ វីរៈភុជង្គ ប្រធានក្រុមហ៊ុនថៃណាខន ផាត់ថៈណា និងស្ថានីយវិទ្យុ និងទូរទស្សន៍កងយោធពលខេមរភូមិន្ទប៉ុស្តិ៍លេខ៥ បានរៀបរាប់នៅក្នុងកម្មវិធីទាំងមូលថា ស្ថិតនៅក្នុងស្ថានភាពដ៏លំបាកនៃការរីករាលដាលនៃជំងឺកូវីដ១៩ នេះ បុគ្គលិករបស់ស្ថានីយទូរទស្សន៍ប៉ុស្តិ៍លេខ៥ បានខិតខំពុះពារគ្រប់បែបយ៉ាងនៃបែបផែនការងារប្រចាំថ្ងៃ និងដើម្បីបន្ដការបម្រើដល់អារម្មណ៍របស់មហាជនតាមរយៈកម្មវិធីកម្សាន្ដដែលមានក្នុងស្ថានីយ។ ការជប់លៀងតំណាច់ឆ្នាំនេះ គឺជាការវិលត្រឡប់មកវិញ បន្ទាប់ពីកូវីដ១៩ បានធូរស្បើយបន្ដិចនៅក្នុងប្រទេសកម្ពុជា។ លោកថា ទោះជាយ៉ាងក៏ដោយ ក៏យើងគ្រប់គ្នាមិនភ្លេចការការពារខ្លួនពីជំងឺកូវីដ១៩ និងវីរ៉ុសបំប្លែងថ្មី តាមការណែនាំរបស់ក្រសួងសុខាភិបាលឡើយ។
នាឱកាសជិតដល់ឆ្លងចូលឆ្នាំ២០២២នេះ លោក ស៊ុផាឆ័យ វីរៈភុជង្គ ក៏បានជូនពរដល់បុគ្គលិកក្រុមការងារ និងតារាសិល្បៈ ព្រមទាំងអ្នកចូលរួមទាំងអស់ ជួបប្រទះតែភាពជោគជ័យ រីកចម្រើនទៅមុខ និងសុខភាពល្អគ្រប់ៗគ្នា៕
