ថ្មីៗនេះមានសាព័ត៌មានមួយចំនួនបានផ្សព្វផ្សាយថា កំពូលតារាទឹកភ្នែកកញ្ញា នី មុនីនាថ បានកែកុនច្រមុះ ដើម្បីលើកទម្រង់មុខឱ្យស្អាតប្លែកជាងមុន រហូតធ្វើឱ្យមហាជនកត់សម្គាល់ឃើញ ទម្រង់មុខតារាស្រី នី មុនីនាថ ហាក់ប្លែកខុសពីពេលធម្មតាជាខ្លាំង។ មិនតែប៉ុណ្ណោះ ក៏មានការលើកឡើងប្រៀបធៀបជាមួយសិល្បការិនីមួយចំនួន ដែលកែសម្រស់ស្ទើតែគ្រប់គ្នានាសម័យទំនើបនេះ។
ការផ្សព្វផ្សាយព័ត៌មាននោះបានលើកឡើងថា តារាស្រីរូបនេះប្លែកត្រង់ខ្ទង់ច្រមុះតែម្តង ព្រោះកាលពីពេលមុនៗ ច្រមុះកញ្ញាមិនសូវអំណោយផលខ្ទង់ខ្ពស់បែបនេះទេ គ្រាន់តែក្រឡេកក៏ដឹងច្បាស់ថា តារាស្រីរូបនេះប្រែចិត្តមកចាប់អារម្មណ៍រឿងកែសម្ភស្សលើកសម្រស់ មិនខុសប្លែកពីសិល្បការិនីផ្សេងៗទៀតឡើយ។ តែយ៉ាងណាមិញ កញ្ញា នី មុនីនាថ បានបដិសេធ និងច្រានចោលចំពោះការផ្សព្វផ្សាយព័ត៌មាននេះ កញ្ញាចាត់ទុកថា ជារឿងមិនពិតនោះទេ។
បកស្រាយប្រាប់អ្នកសារព័ត៌មានត្រយង កញ្ញា នី មុនីនាថ បានអះអាងថា «ខ្ញុំមិនធ្លាប់បានឃើញព័ត៌មានដែលថាខ្ញុំកែកុនច្រមុះនោះទេ។ តែមហាជនឃើញមុខខ្ញុំប្លែក ក៏ដោយសារតែសព្វថ្ងៃខ្ញុំកំពុងឈឺ សាច់មុខខ្ញុំក៏ស្រកខ្លាំងជាងមុនដែរ ដូច្នោះហើយទើបធ្វើឱ្យឃើញមុខខ្ញុំស្គមជាងមុន»។ កញ្ញាបន្ដថា «ការពិតទៅ មុខខ្ញុំគឺគ្មានការកែកុនអ្វីនោះទេគឺមុខគឺនៅដដែរ គ្រាន់តែពេលនេះ ខ្ញុំស្រកទម្ងន់អស់ ៤គីឡូហើយនៅពេលនេះ។ គ្រូពេទ្យបានប្រាប់ថា ឱ្យខ្ញុំសម្រាកឱ្យបានច្រើន ហើយខ្ញុំក៏បានផ្អាកការងារសិល្បៈអស់ច្រើនហើយ ដើម្បីថែទាំសុខភាពឡើងវិញ។ ធម្មតានៅវ័យនេះ គឺងាយនឹងស្រកសាច់មុខណាស់ នៅពេលឈឺម្ដងៗ»។
កញ្ញា នី មុនីនាថ បានបញ្ជាក់ថា កញ្ញាមិនចង់ស្រកទម្ងន់ទេ តែនៅពេលនេះគឺកញ្ញាកំពុងមានជំងឺប្រចាំកាយ ដូច្នោះទើបធ្វើឱ្យកញ្ញាស្រកគីឡូលឿនមែនទែនក្នុងរយៈពេលខ្លី ដែលនេះជាការព្រួយបារម្ភមែនទែនចំពោះសុខភាព៕
ទស្សនាវីដេអូ Big News៖