មហាជនអ្នកគាំទ្រភាពយន្ដខ្មែរធ្លាប់ទស្សនាមកហើយនូវភាពយន្ដខ្នាតធំរឿង «មរណមាតា» ដែលជាវណ្ណកម្មរបស់ផលិតកម្ម SSB និងដឹកនាំរឿងដោយលោក ហ្វៃ សំអាង។ ភាពយន្ដនេះ មហាជនអ្នកគាំទ្របានឃើញសមត្ថភាពនៃការសម្ដែងរបស់តារាស្រី លី ចាន់សីហា ជាតួអង្គពីរមនុស្សតែមួយ ឬហៅថាតួភ្លោះ។ កាលពី១០ឆ្នាំមុន អ្នកនាង លី ចាន់សីហា បានសម្ដែងជាតួមានចរិតឆ្នាស់ឆ្នើម (តួនាងចាន់ណី) និងជាតួស្លូតបូតសុភាពរៀបសា (តួមរណមាតា) ធ្លាប់ទទួលបានការកោតសរសើរពីមហាជនយ៉ាងខ្លាំង។
យ៉ាងណាមិញ នៅដើមឆ្នាំ២០២២នេះ គេបានឃើញនាងតូច កែវ ទិត្យផល្លី ក៏លេចចេញនូវការសម្ដែងជាតួភ្លោះ តាមគន្លងអ្នកនាង លី ចាន់សីហា វិញម្ដង។ កែវ ទិត្យផល្លី បានសម្ដែងជាតួឆ្នាស់មួយ និងស្លូតមួយ នៅក្នុងរឿង «ដើមរលួសមាស»ដែលជារឿងតំណាលបុរាណដកស្រង់ចេញពីរឿងព្រេងនិទានខ្មែរភាគទី៧។ គ្រាន់តែបានទម្លាយវីដេអូ Tailer នៅលើបណ្ដាញសង្គមហ្វេសប៊ុកភ្លាម កែវ ទិត្យផល្លី បានធ្វើឱ្យងាកមហាជនចាប់អារម្មណ៍ចង់ទស្សនាការសម្ដែងរបស់នាង ក្នុងរឿងនេះភ្លែតតែម្ដង។
គួរឱ្យដឹងដែរថា រឿង «ដើមរលួសមាស» នឹងមានផ្សាយជូនទស្សនានៅថ្ងៃទី៣ នេះ វេលាម៉ោង ៨ យប់នៅកញ្ចក់ទូរទស្សន៍ CTN។ រឿងនេះដែរ ក៏មានការចូលរួមសម្ដែងពីសំណាក់តារាល្បីៗដូចជា កញ្ញា ពេជ្រ ចរណៃ (សម្ដែងជាតួ កាឡី) លោក តេង វាសនា (ជាតួកុដុម្ពី ) លោក លោក ឡៅ បញ្ញា(តួព្រះរាជា) កញ្ញា សាន កុសមៈ (តួចាន់ណី និងមរណមាតា) នាងតូច កែវ ទិត្យផល្លី (តួចាន់ណី និងមរណមាតា) និងតារាកិត្តិយសជាច្រើនរូបទៀត។
ចង់ដឹងថា នាងតូច កែវ ទិត្យផល្លី ទាក់ទាញកម្រិតណានេះការសម្ដែងជាតួអង្គភ្លោះ ក្នុងរឿង «ដើមរលួសមាស» ទស្សនាវីដេអូខាងក្រោមនេះ៖