មុននេះបន្ដិច នៅលើបណ្ដាញសង្គមហ្វេសប៊ុក បានបង្ហោះឱ្យឃើញថា តារាកំប្លែងជើងចាស់ លោក តាចេក ក្រឡាក់រ៉ឺម៉កកង់បី ខណៈដឹកបន្លែផ្លែឈើទៅលក់នៅលើភ្នំគីរីរម្យ។ លោកតា ត្រូវរបួសបែកក្បាល ហើយនៅក្នុងនោះក៏មានចៅ២នាក់ទៀត បានរួមដំណើរជាមួយ។
បើតាមប្រភពនៃការបង្ហោះរបស់នាយធុង នៅថ្ងៃទី៤ ខែមករា ឆ្នាំ២០២២នេះ បានរៀបរាប់ថា «ព្រះអើយជួយឪចេកបើកដឹកបន្លែផ្លែឈើទៅលក់នៅគីរីរម្យព្រឹកមិញ បណ្ដាលឱ្យក្រឡាប់របួសបែកក្បាលរួមចៅពីរនាក់ទៀតសូមបងប្អូនសប្បុរសជនជួយគាត់ផងហេតុតែជីវភាព ខ្វះខាត ☎️012-70-43-72/081-72-21-44 សូមបងប្អូនមេត្តាជួយគាត់ផងនិងសូមអរគុណទុកជាមុន 🙏 🙏 🙏»។
គួររំលឹកដែរថា តារាកំប្លែងវ័យចំណាស់ លោកតាចេក ជាអតីតកូនក្រុមកំប្លែងនាយកុយ បានបាត់វត្តមានពីកញ្ចក់ទូរទស្សន៍ក្នុងកម្មវិធីកំប្លែងផ្សេងៗមួយរយៈធំហើយ ដោយលោកបានរសាត់អណ្ដែតទៅ ជួលតូបប្រកបមុខរបរលក់ផ្លែឈើ និងគ្រឿងភេសជ្ជៈបន្តិចបន្តួច គ្រាន់ចិញ្ចឹមជីវិត នៅតាមផ្លូវឡើងរមណីយដ្ឋានភ្នំគិរីរម្យ។
ចុចអាន៖ តាចេក៖ពោលថាជីវិតនេះកើតមកដើម្បីសិល្បៈ និងសូមអំពាវនាវបានត្រលប់មកលេងកំប្លែងឡើងវិញ! (វីដេអូ)
លោកតាធ្លាប់ប្រាប់អ្នកសារព័ត៌មានត្រយងថា អំឡុងពេលកូវីដ១៩ លោកបានសម្រេចចិត្តទៅជួលតូបលក់បន្លែឱ្យភរិយានៅផ្សារត្រែងត្រយឹងវិញ ព្រោះនៅលើភ្នំគីរីរម្យហាក់លក់មិនដាច់។ តែថ្មីៗនេះលោកបានវិលទៅលក់នៅលើភ្នំពេញ ស្របពេលដែលទេចរណ៍កំពុងកំរើកឡើងវិញ៕
