ថ្មីៗមានរឿងក្ដៅគគុកមួយបានកើតឡើងនៅលើបណ្ដាញសង្គមប្រទេសកូរ៉េ ដោយសារតែតារាចម្រៀងសញ្ជាតិចិននៅក្នុងក្រុមចម្រៀងកូរ៉េម្នាក់មិនព្រមលត់ជង្គង់ជូនពរអ្នកគាំទ្រជនជាតិកូរ៉េ រហូតធ្វើឱ្យអ្នកលេងអ៊ិនធឺណិតចូលមកបណ្ដេញកញ្ញាចេញពីប្រទេសប៉ុន្តែសម្រាប់អ្នកគាំទ្រជនជាតិបែរជាកោតសរសើរកញ្ញាដែលប្រកាន់គោលជំហរជូនពរតាមបែបប្រពៃណីចិន។
រឿងហេតុដែលបង្កឱ្យកើតមានបញ្ហាចម្រូងចម្រាសនេះកើតនៅក្នុងកម្មវិធី Meet and Greet ជូនពរឆ្នាំថ្មីរវាងក្រុមចម្រៀង Everglow និងអ្នកគាំទ្រ។ ខណៈដែលសមាជិកក្រុមទាំងអស់លុតជង្គង់ហើយឱនក្បាលដល់ដីដើម្បីជូនពរឆ្នាំថ្មីដល់ហ្វេនៗតាមទំនៀមទំលាប់កូរ៉ កញ្ញា Wang Yiren សមាជិកសញ្ជាតិចិនគឺជាសមាជិកតែម្នាក់បែរជាឈរហើយក្ដោបដៃដើម្បីជូនពរអ្នកគាំទ្រដែលសកម្មភាពរបស់កញ្ញាគឺធ្វើទៅតាមទំនៀមទំលាប់ជនជាតិចិន។ ទង្វើរបស់ស្រីស្រស់រូបនេះត្រូវបានជនជាតិកូរ៉េរិះគន់យ៉ាងខ្លាំង។
យោងតាមការផ្សាយរបស់សារព័ត៌មាន South China Morning Post បានចេញផ្សាយកាលពីថ្ងៃទី១០ ខែមករា ឆ្នាំ២០២២ ថាការលុតជង្គង់ចាត់ទុកជាទង្វើទន់ភ្លន់ដាក់ខ្លួនក្នុងវប្បធម៌ចិនប៉ុន្តែបច្ចុប្បន្នការលុតជង្គង់មិនត្រូវបានគេចាត់ទុកជាវិធីសាស្ត្រមួយស័ក្តិសមនោះទេប៉ុន្តែជនជាតិកូរ៉េនៅប្រើប្រាស់វិធីលុតជង្គង់ដើម្បីគោរពរាក់ទាក់និងសម្ដែងសេចក្ដីដឹងគុណនៅឡើយ។
វិធីសាស្ត្រជូនពរឆ្នាំថ្មីរបស់ Yiren ត្រូវបានជនជាតិចិនសរសើរតែកញ្ញារងនូវការវាយប្រហារនិងរិះគន់ខ្លាំងពីសំណាក់អ្នកលេងអ៊ិនធឺណិតរបស់ប្រទេសកូរ៉េដោយមានអ្នក Comment បែបបណ្ដេញកញ្ញាចេញពីប្រទេសដូចជា«ត្រលប់ទៅចិនវិញទៅ» និង«កុំមករកលុយនៅក្នុងប្រទេសកូរ៉េ»។ ខណៈដែលនៅលើវែបសាយ Allkpop ដែលជាវែបសាយផ្សព្វផ្សាយពីសិល្បៈកូរ៉េជាភាសាអង់គ្លេសដ៏ធំក៏មានអ្នក Comment រិះគន់ចំពោះកញ្ញាដែរថា«ទង្វើនេះបង្ហាញឱ្យឃើញថាជនជាតិចិនអឿនិងមិនគោរពចំពោះវប្បធម៌ជាតិសាសន៍ដទៃ» «ឈប់រកលុយនៅប្រទេសកូរ៉េហើយត្រលប់ទៅចិនវិញទៅ» ។
ទោះជារងនូវការរិះគន់យ៉ាងចាស់ដៃប៉ុន្តែជនជាតិចិនបែរជាលើកសរសើរនូវការហ៊ានបង្ហាញគោលជំហររបស់ Yiren ហើយចេញមកការពារតារាស្រីរូបនេះនៅ Weibo ដោយ Comment ជនជាតិចិនមានដូចជា«ជនជាតិចិនមិនលុតជង្គង់» និង«ខ្ញុំមានមោទកភាពចំពោះតារាចម្រៀងម្នាក់នេះដែលរក្សាប្រពៃណីរបស់ចិន» ជាដើម។
ប៉ុន្តែក៏មានអ្នកខ្លះចេញមកបង្ហាញចំណាប់អារម្មណ៍ចំពោះករណីនេះថា កត្តាវប្បធម៌ខុសគ្នាធ្វើឱ្យតារាចម្រៀងរូបនេះធ្លាក់ទៅក្នុងស្ថានភាពដ៏លំបាក ដោយគេបានលើកឡើងថា «បើតារាចម្រៀងរូបនេះលុតជង្គង់នឹងត្រូវជនជាតិចិនវាយប្រហាររិះគន់ថាភ្លេចកំណើត ប៉ុន្តែបើកញ្ញាមិនលុតជង្គង់នឹងត្រូវជនជាតិកូរ៉េយល់ថាកញ្ញាមិនគោរពវប្បធម៌ប្រពៃណីរបស់កូរ៉េ» គិតទៅការធ្វើជាតារាចម្រៀងពិតជាលំបាកណាស់។
យ៉ាងណាមិញក្រោយផ្ទុះរឿងចម្រូងចម្រាសផ្អើលបណ្ដាញសង្គមទាំងពីរប្រទេសនេះកើតឡើង ទាំងកញ្ញា Wang Yiren និងផលិតកម្ម Yeu Hua Entertainment ដែលគ្រប់គ្រងលើកញ្ញានៅតែរក្សាភាពស្ងៀមស្ងាត់ ហើយមិនបានចេញមកពន្យល់ឬបកស្រាយចំពោះករណីខាងលើនេះនោះទេ។
មួយវិញទៀតក្រោយផ្ទុះរឿងរ៉ាវនេះឡើង មកដល់ពេលនេះ Yiren បានព្យួរការងារទាំងអស់របស់ខ្លួននៅក្នុងប្រទេសកូរ៉េហើយបន្តការសិក្សានៅក្នុងប្រទេសកំណើតរបស់ខ្លួនសិន។
