ដោយមានការជួយជ្រោមជ្រែងពីលោក ខេមរៈ សិរីមន្ត តារាចម្រៀងនៅផលិតកម្មហង្សមាស និងលោក ខេមរៈ ភារុណ អ្នកនិពន្ធបទចម្រៀងល្បី ទើបប្អូនស្រីជីទួតមួយដែលមានឈ្មោះ អ៊ិត ជូលីណា អាចបោះជំហ៊ានចូលវិថីសិល្បៈ រហូតដល់មានការចាប់អារម្មណ៍ខ្លាំងពីអ្នកគាំទ្រ រួមទាំងហ្វេនរបស់តារាស្រី ខេមរៈ ស្រីពៅ។ អ្នកគាំទ្របានលើកឡើងថា តារាចម្រៀងស្រីវ័យក្មេងរូបនេះទឹកដមសម្លេងផ្អែមពីរោះដូចកញ្ញា ខេមរៈ ស្រីពៅ ដោយសារតែមានជាប់សាច់ឈាមនឹងគ្នា។
អ៊ិត ជូលីណា បានលើកឡើងថា កន្លងមកពិតជាទទួលបានការពោលបែបនោះមែន តែកញ្ញាបានបញ្ជាក់ថា ការពិតទៅការប្រើស្ទាយក្នុងច្រៀង គឺពិតជាបានយកស្ទាយខ្លះពីបងស្រី ខេមរៈ ស្រីពៅ ដែលជាម្ចាស់បទដើម ក៏ប៉ុន្តែភាគច្រើនគឺកញ្ញាប្រើស្ទាយរបស់ខ្លួនឯងច្រើនជាងនៅពេលបកស្រាយបទចម្រៀង។ រហូតមកទល់ឆ្នាំ២០២២នេះ កញ្ញា អ៊ិត ជូលីណា បានបញ្ចេញបទចម្រៀងរបស់ខ្លួនបានជាច្រើនបទមកហើយ នៅក្នុងនោះគេចាប់អារម្មណ៍ឃើញមានបទល្បីៗដូចជា «ទុកពេលឱ្យបងកែខ្លួន» «គេកូនអ្នកមានសាច់ឈាមមិនដូចបងទេ» «សមមុខហើយដែលអូនក្បត់បង» និងមានបទចម្រៀងជាច្រើនទៀត ដែលសុទ្ធសឹងជាបទ Original។
ក្រៅពីមានសមត្ថភាពច្រៀងពីរោះហើយនោះ គេក៏បានកត់សម្គាល់ឃើញថា កញ្ញា អ៊ិត ជូលីណា មានទេពកោសល្យដែលអាចនិពន្ធបទចម្រៀង និងMelody ចម្រៀងបានថែមទៀតផង។ អ៊ិត ជូលីណា បានប្រាប់ពីបំណងទៅថ្ងៃអនាគតរបស់ខ្លួនថា កញ្ញាមានមហិច្ឆតាក្នុងចិត្តចង់ក្លាយជាតារាចម្រៀងល្បីឈ្មោះដូចជាលោក ខេមរៈ សិរីមន្ត និងដូចជាតារាចម្រៀង ខេមរៈ ស្រីពៅ ដែរ។ ហើយប្រសិនបើមានឱកាសល្អ កញ្ញាចាប់អាជីពផ្សេងក្រៅពីសិល្បៈ ដែលជាអាជីពបន្ទាប់បន្សំ តែក៏មិនចោលអាជីពចម្រៀងជាដាច់ខាត៕
