មកទល់សព្វថ្ងៃនេះ ជំនឿដែលពាក់ព័ន្ធជាមួយមន្តអាគម«កូនក្រក» គឺនៅតែដក់ជាប់ក្នុងផ្នត់គំនិតមនុស្សនាសម័យនេះមិនសាបសូន្យ។ តាំងពីបុរាណកាលមកម្ល៉េះ គ្រូមន្តអាគមតែងតែមានជំនឿយ៉ាងមុតមាំចំពោះអាគម «កូនក្រក» ជាវត្ថុស័ក្ដិសិទ្ធិអាចការពារសត្រូវមិនឱ្យមកបៀតបៀនខ្លួនបាន។
គ្រូមន្តអាគមបានតំណាលតៗគ្នាអំពីអាគម«កូនក្រក»ឱ្យបានដឹងថា ដើម្បីមន្ដអាគមកូនក្រកកាន់តែពូកែស័ក្ដិសិទ្ធខ្លាំងក្លានោះ សូម្បីតែប្រពន្ធហ៊ានសម្លាប់ លូកខ្វេះ ឬវះពោះយកកូន ទៅឆ្អើរបង្កើតជាកូនក្រក រុំអំបោះឆៅរួចសែកមន្ដគាថាសង្កត់ព្រលឹងផងដែរ។ បើតាមសៀវភៅមន្តអាគមខ្មែរ ក៏បានរៀបរាប់ដែរថា «កូនក្រក» គឺជាទារកក្នុងផ្ទៃម្ដាយ ទើបបាន៣ខែ ទៅ៥ខែ ហើយត្រូវម្តាយយល់ព្រមប្រគល់ឱ្យដោយប្រើវិធីវះកាត់យក។ អ្នកកាន់កូនក្រកបើថែរក្សាថ្នាក់ថ្នមកូនក្រកនោះបានល្អ ក៏ត្រូវបានកូនក្រកស្រលាញ់តបវិញ តែប្រសិនមិនបានថែរក្សាថ្នាក់ថ្នម ឬទុកកូនក្រកនោះចោល កូនក្រកនឹងធ្វើទុក្ខទោសដល់អ្នកប្រើនោះវិញ។
យ៉ាងណាមិញ គេក៏បានសម្គាល់ឃើញថា មានហេតុការណ៍ពិតមួយចំនួនដែលល្បីរន្ទឺនៅសង្គម ដោយមានការប្រើប្រាស់មន្តអាគម «កូនក្រក» ក្នុងផ្លូវងងឹត រហូតដល់មានផលិតករភាពយន្ត លើកយកព្រឹត្តិការណ៍នោះ មកផលិតជាខ្សែភាពយន្ត។ ថ្ងៃនេះសារព័ត៌មានត្រយងនឹងនាំអារម្មណ៍អ្នកគាំទ្រមកដឹងពីភាពយន្ដរន្ធត់២រឿង ដែលបានផ្អែកលើរឿងពិតបង្ហាញពីជំនឿមន្ដអាគម «កូនក្រក»។
១.ភាពយន្ដ«កូនក្រក» ទាក់ទងនឹងព្រឹត្តិការណ៍មេចោរ «រ៉ាស្មាច់»
កាលពីថ្ងៃទី ០៧ ខែតុលា ឆ្នាំ ២០១៨ ផលិតកម្ម LD Picture បានបញ្ចេញភាពយន្ដមួយមានចំណងជើងថា «កូនក្រក» ដែលបានលាតត្រដាងសាច់រឿងទាក់ទងនឹងការប្រើប្រាស់កូនក្រកគឺមេចោរចាប់ជំរិតក្នុងអំឡុងទសវត្សរិ៍ទី៩០ ឈ្មោះអារ៉ាស្មាច់ មានឈ្មោះល្បីល្បាញខ្លាំង នឹងការប្រើកូនក្រកនេះ ក៏ប៉ុន្តែអ្នកដឹកនាំរឿងបានអះអាងថា រឿងនេះមិនមែនជារឿងពិតរបស់មេចោរចាប់ជំរិតរូបនេះនោះទេទាំងស្រុងនោះទេ ។ សាច់រឿងគឺមានការជាប់ទាក់ទងតែនឹងអបិយជំនឿរបស់ខ្មែរដែលនិយាយពីកូនក្រកដែលប្រើប្រាស់ជីវិតកូននិងប្រពន្ធដើម្បីបំពេញមហិចតាខ្លួនឯង ។
យ៉ាងណាក្ដី នៅពេលបញ្ចេញ Trailer ដំបូងនៃភាពនេះ គឺបានបង្ហាញភាពសាហាវភ័យរន្ធត់ខ្លាំងពេក ឬបណ្ដាលឱ្យប្រព័ន្ធផ្សព្វផ្សាយយូធូប បិទមិនឱ្យវីដេអូ Trailer រឿងនេះមានមហាជនទស្សនាឡើយ។ ផលិតកម្ម LD Picture ក៏បានបញ្ចេញ Trailer ថ្មីៗមួយទៀត ដោយបានកាត់ប្លង់សំខាន់ៗចេញ។ ភាពយន្ដនេះត្រូវបានដឹកនាំសម្ដែងដោយ នាយ ពែកមី។
២.ភាពយន្ដវៀតណាម THẤT SƠN TÂM LINH (Kumanthong)2019
ភាពយន្ដនេះបានផ្អែកទៅលើរឿងដែលកើតឡើងពិតក្នុងខេត្តមួយនៃប្រទេសវៀតណាម។ ទាក់ទងនឹងស្រីគម្នាក់ ដែលនាងបានរៀបការជាមួយបុរសជាគ្រូអាគមដែលជាទាយាទបន្ដវេនរបស់គ្រូអាគមកូនក្រក។ គ្រូអាគមនេះទើបតែមកស្នាក់នៅក្នុងភូមិនេះថ្មីៗ តាំងពីពេលហ្នឹងមកមានតែរឿងអាក្រក់កើតឡើងទាក់ទិនអាគមផ្លូវងងឹត ហើយគ្រូម្នាក់នេះគាត់តែងតែព្យាយាមសុំកូនពីមនុស្សស្រី និងចង់សម្លាប់មនុស្សស្រីយកក្បាលទុកពិធីកម្មបន្ដវេនទាយាទ ដើម្បីធ្វើជាកូនក្រកបម្រើគាត់រហូតទៅនិងដើម្បីធ្វើឱ្យព្រលឹងម្ដាយខ្លួនឯងវិលមកជាកូនក្រកដើម្បីនៅជាមួយគាត់ជារៀងរហូត។
អំពើអាក្រក់ទាំងអស់នោះ ត្រូវបានស្រីគជាប្រពន្ធដឹង ហើយរត់ទៅប្ដឹងប៉ូលីស តែទីបំផុតនៃរឿងនាងក៏ត្រូវប្ដីប្រុងសម្លាប់កាត់ក្បាលយកមកធ្វើពិធីកម្មជំនួស។ លុះផ្អើលអស់អ្នកភូមិបានដឹងពីរឿងនេះ ប៉ូលីសចាប់ខ្លួនគ្រូអាគមនេះបាន និងស្រីមេបនម្នាក់ទៀត ដែលតែងនាំស្រីៗឱ្យគ្រូនោះបញ្ចុះមន្ដស្នេហ៍ ព្រមទាំងរកឃើញសាកសពមនុស្សស្រីជាច្រើននាក់នៅក្រោមផ្ទះគ្រូអាគមនោះទៀតផង។
ភាពយន្ដរន្ធត់ទាំងពីរនេះ ប្រសិនបើបានទស្សនាហើយ សូមប្រើវិចារណញ្ញាណក្នុងការទស្សនា មិនគប្បីយកទង្វើនេះទៅប្រព្រឹត្តិនៅក្នុងសង្គមឡើយ៕