ធ្លាប់ដែលសង្ស័យដែរទេថា តួឯកស្រីកូរ៉េមានអាថ៌កំបាំងមុខសស្អាតអ្វីដែរទៅហ្ន៎! មិនថាកន្លងទៅប៉ុន្មានឆ្នាំ លេងរឿងប៉ុន្មានរឿង មុខនៅស ស្អាត ហើយថែមទាំងក្មេងរហូត។ ថ្ងៃនេះមិត្តនារីរូបណាចង់ដឹង ត្រយងសូមបង្ហាញជូន អាថ៌កំបាំងមុខស្អាតនិងក្មេងរបស់តួឯកស្រីកូរ៉េ ចំនួន៥រូប ដែលវិធីអនុវត្តងាយៗ អាចធ្វើតាមយ៉ាងស្រួល។ ចង់ដឹងថាមានវិធីអ្វីខ្លះសូមតាមដានអានខាងក្រោមនេះ៖
១. Park Min Young បិតម៉ាសមួយថ្ងៃ៣ដង ៖ សម្រាប់តួឯកស្រីមុខសថ្លា Park Min Young អាចនិយាយបានផ្ទុះខ្លាំងបំផុតពីភាពយន្តភាគជាស៊េរី «What’s Wrong With Secretary Kim»។ អាថ៌កំបាំងថែរក្សាមុខរបស់តារាស្រីរូបនេះពិតជាងាយខ្លាំងណាស់ ព្រោះតាមការប្រាប់ឱ្យដឹងពីម្ចាស់ខ្លួននាងបានប្រាប់ថា នាងជាមនុស្សដែលផាត់ម្សៅគ្រប់ពេលវេលា មួយថ្ងៃៗត្រូវតុបតែងផាត់មុខយូររហូតដល់ទៅ២០ម៉ោងក៏មាន ដូច្នេះពេលណាទំនេរភ្លាម នាងនឹងប្រញាប់លាងគ្រឿងសំអាងចេញហើយយកម៉ាសមកបិតលើមុខភ្លាម ដោយតារារូបនេះអាចនឹងបិតម៉ាស២ទៅ៣ដងក្នុងមួយថ្ងៃក៏មាន។ សម្រាប់នារីៗ ដែលចង់បានមុខស ស្អាត ក្មេងអាចពិចារណា បិតម៉ាសមុខជាប្រចាំរាល់ថ្ងៃ ឬអាចមួយថ្ងៃ ២ទៅ ៣ដង ដូច Park Min Young ក៏បាន ប៉ុន្តែការបិតម៉ាសត្រឹមមួយសប្ដាហ៍ ៤ទៅ ៥ដង ក៏អាចជួយឱ្យស្បែកមុខមានសំណើម ទោះជាឧស្សាហ៍ផាត់ម្សៅក៏មុខយើងមិនខូចដែរ។
២. Bae Suzy លាងមុខដោយតិចនិក៤២៤ ៖ តារាចម្រៀង-តារាសម្ដែងពីភាពយន្តភាគជាស៊េរី «Start Up» មានតិចនិកលាងមើលថែស្បែកមុខប្លែកខ្លាំងណាស់ គឺនាងប្រើប្រាស់វិធីលុបលាងមុខបែប ៤២៤ ឬការលាងមុខចេញដោយ Cleaning Oil ដើម្បីលាងគ្រឿងសំអាងចេញដោយប្រើពេលវេលា៤នាទី បន្តមកទៀតលាងមុខដោយ Cleanser ជា Foam ឬ Gel លុបលាងលើមុខដែលកំពុងសើមម្ដងទៀតដោយប្រើពេលវេលា២នាទី និងចុងក្រោយលាងមុខម្ដងទៀតដោយទឹកស្អាតថែម៤នាទីទៀត
៣. វិធីសាស្ត្រធ្វើឱ្យមុខសថ្លារបស់ Yoon Eun Hye ៖ តារាឯកស្រីរូបនេះមិនថាបង្ហាញវត្តមានសម្ដែងក្នុងរឿងណានោះទេ សម្រស់ស្បែកមុខនៅតែស្អាតនិងក្មេងរហូត។ សម្រាប់ Yoon Eun Hye មានវិធីសាស្ត្រសាមញ្ញព្រោះក្រោយពីលុបលាងមុខហើយនាងរមែងយកកន្សែងដែលជ្រលក់ទឹកក្ដៅអ៊ុនៗមកគ្របលើមុខមួយសន្ទុះដើម្បីបើករន្ធរោម ហើយក្រោយពីយកកន្សែងក្ដៅចេញពីមុខហើយ នាងនឹងជូតមុខម្ដងទៀតដោយ Toner ហើយម៉ាស្សាមុខស្រាលៗដោយម្រាមដៃ ដោយ Toner នឹងជួយឱ្យសម្រួលដល់ស្រទាប់ស្បែក ចំណែកការម៉ាស្សាស្រាលៗដោយម្រាមដៃនឹងជួយឱ្យរន្ធរោមរួមតូច។
៤.ម៉ាសបិតមុខបែប DIY តាមវិធីសាស្ត្រ Song Hye Kyo ៖ សម្រាប់អាថ៌កំបាំងមុខសស្អាត និងក្មេងគ្រប់ពេលវេលារបស់ Song Hye Kyo គឺជាវិធីសាស្ត្របែប DIY (ធ្វើបានដោយដៃ) មានលក្ខណៈងាយៗ ដោយប្រើប្រាស់ពងទាផ្នែកពណ៌សមកផ្សំជាមួយនឹងទឹកឃ្មុំរួចហើយយកមកបិតលើមុខ ទុកចោលរហូតដល់ស្ងួតរួចហើយលាងចេញ។ រូបមន្តបិតម៉ាសនេះជួយឱ្យស្បែកមុខទន់ល្មើយហើយក្មេងជាងវ័យ។ ចំណែករូបមន្តមួយទៀតគឺនាងយកទឹកឃ្មុំមកផ្សំជាមួយនឹងទឹកស្អាតតាមបែប ១:២ (១ភាគ២) ហើយយកមកម៉ាស្សាលើស្បែកមុខរួចហើយលាងចេញ រូបមន្តនេះនឹងជួយឱ្យមុខកាត់បន្ថយស្នាមជ្រីវជ្រួញបានយ៉ាងល្អ ជាពិសេស Song Hye Kyo នៅណែនាំឱ្យអ្នកចង់មានមុខស្អាតម៉ាសមុខដោយវិធីដូចនាង រៀងរាល់ពាក់កណ្ដាលខែម្ដងទៀតផង។
៥. Lee Ji Eun ឬ IU ថែរក្សាស្បែកមុខដោយ Toner និង Oil ៖ ចង់ឱ្យស្បែកមុខនៅតែក្មេងដូចជាតារាចម្រៀង-តារាសម្ដែង IU ពីភាពយន្តភាគជាស៊េរី Hotel Del Luna ដែរទេ? បើសិនជាអ្នកចង់សូមធ្វើតាមវិធីសាស្ត្រនេះ ដោយ IU បានចែករំលែកឱ្យដឹងថានាងរមែងប្រើប្រាស់វិធីចាក់ Toner ទៅលើសំឡីបន្ទាប់មកចាក់ Oil ថែរក្សាស្បែពីរតំណក់បន្ថែម រួចយកសំឡីដែលទទឹកជោគដោយ Toner និង Oil មកបិតជាម៉ាសលើមុខឱ្យពេញមុខតុកចោលប្រហែល៥នាទី វិធីសាស្ត្រនេះក្រៅពីធ្វើឱ្យស្បែកមុខភ្លឺថ្លាហើយថែមទាំងផ្ដល់សំណើមដល់ស្បែកមុខថែមទៀតផង។
ទស្សនាវីដេអូព័ត៌មានអាថ៌កំបាំងមុខស្អាតតារាស្រីកូរ៉េខាងក្រោមនេះ៖