ប្រជាជនកូរ៉េខាងត្បូងបានចាប់ផ្ដើមបង្ហាញក្ដីបារម្ភក្រោយពីចំនួនតារាចម្រៀង K-Pop ដែលបានឆ្លងជំងឺកូវីដ-១៩ ក្នុងសប្ដាហ៍នេះមានការកើនឡើងខ្ពស់យ៉ាងគំហុក។
យោងតាមការផ្សាយពីសារព័ត៌មានក្នុងស្រុកបានចុះផ្សាយជាបន្តបន្ទាប់ពីករណីជំងឺឆ្លងដ៏កាចសាហាវមួយនេះ ដោយកាលពីថ្ងៃទី១៩ ខែមករា ឆ្នាំ២០២២ សមាជិកក្រុម EPEX ចំនួន៣រូបរួមមាន Wish, A-Min និង Jeff បានឆ្លងជំងឺកូវីដ នេះបើតាមបញ្ជាក់ពីផលិតកម្មគ្របគ្រងលើតារាទាំង៣ដួងនេះ។
បន្តមកទៀតផលិតកម្ម Lebel SJ បានចេញមកប្រកាសថាសមាជិកក្រុមចម្រៀង Super Junior មួយរូបគឺ Eunyuk ក៏តេស្ដវិជ្ជមានដូចគ្នាដែរ។ បន្ថែមលើនោះតារាចម្រៀងជាច្រើនដួងទៀតស្ថិតក្នុងផលិតកម្ម YG Entertainment ក៏តេស្ដវិជ្ជមានកូវីដ-១៩ដែរ។
ឈានចូលដល់ថ្ងៃទី២៣ ខែមករា សមាជិកក្រុមចម្រៀង iKON ចំនួន៣រូបក៏បានបញ្ជាក់ថាបានឆ្លងជំងឺកូវីដ-១៩ដូចគ្នាដែរ ក្នុងនោះមាន Jihwan, Yunhyeong និង Donghyuk។ ថ្ងៃបន្ទាប់ (២៤ មករា) Lee Seung Hoonសមាជិកម្នាក់របស់ក្រុម Winner បានធ្វើតេស្ដដោយខ្លួនឯងតាមរយៈឧបករណ៍តេស្ដជាលទ្ធផលលរូបគេក៏មានវិជ្ជមានកូវីដ-១៩ដូចគ្នាដែរ។
ពីរក្រោយមកទៀត ពោលគឺនៅថ្ងៃទី២៥ខែមករា សមាជិកក្រុមចម្រៀងពីររួមមាន iKon (Koo Jun Hoe)និង TREASURE (Yoshi) ក៏ប្រកាសឆ្លងជំងឺកូវីដ-១៩ដូចគ្នា។ សមាជិក iKON តារាចម្រៀង Chanwoo និងសមាជិកទាំង៣របស់ក្រុម TREASURE គឺ Hyunsuk, Junkyu និង Mashiho សុទ្ធតែបញ្ជាក់ថាមានវិជ្ជមានជំងឺកូវីដ-១៩។ ក្នុងថ្ងៃជាមួយគ្នានេះដែរ សមាជិកចម្រៀងក្រុម Wei ចំនួន៣នាក់ក៏គេចមិនផុតពីគ្រោះអាក្រក់ដែរព្រោះក្រោយពីធ្វើតេស្ដម៉ាស៊ីន PCR រួចលទ្ធផលសុទ្ធតែវិជ្ជមាន ដោយសមាជិកទាំង៣នោះមាន Kim Dong Han , Yoo Yong Ha និង Kang Seok Hwa។
មិនទាន់អស់តែប៉ុណ្ណឹងនោះទេព្រោះសមាជិកក្រុម The Boyz គឺ Eric ក៏បានប្រកាសដែរថាខ្លួនវិជ្ជមានកូវីដ-១៩។ មួយថ្ងៃក្រោយមកផលិតកម្ម IST Entertainment ក៏បានចេញសេចក្ដីប្រកាសដែរថាសមាជិកក្នុងក្រុម The Boyz ចំនួនពីរនាក់ទៀតមាន Younghoon និង Hyunjae ក៏វិជ្ជមានជំងឺកូវីដ-១៩ដូចគ្នា។
ខណៈដែលផលិតកម្ម Bridge បានចេញសេចក្ដីប្រកាសថាតារាចម្រៀងទោលរបស់ផលិតកម្មខ្លួនគឺ Hyolyn ក៏ឆ្លងជំងឺកូវីដ-១៩ដូចគ្នា។
នៅថ្ងៃទី២៨ ខែមករា សមាជិកចំនួន២រូបរបស់ក្រុម Kep1er គឺ Chaehyun និង Youngeun ក្រោយតេស្ដម៉ាស៊ីន PCR ក៏បញ្ជាក់ថាអ្នកទាំងពីរវិជ្ជមានដែរ។ បើតាមការបញ្ជាក់ពីផលិតកម្ម Wake One បានឱ្យដឹងថាតារាចម្រៀងទាំងពីរដួងក្នុងផលិតកម្មខ្លួននេះសុទ្ធតែបានចាក់វ៉ាក់សាំងបង្ការរួចរាល់ហើយ។
បន្ថែមលើនោះអតីតសមាជិកក្រុម IZ*ONE គឺ Kwon Eun Bi និង សមាជិកក្រុម Weekly គឺJaehee សុទ្ធតែបានឆ្លងជំងឺកូវីដ-១៩។
ក្រោយផ្ទុះដំណឹងតារាចម្រៀងវ័យក្មេងជាច្រើនដួងបានឆ្លងជំងឺកូវីដ-១៩ សាធារណជនបានបង្ហាញក្ដីបារម្ភចំពោះការរីករាលដាលនៃជំងឺនេះ ខណៈដែលអ្នកគាំទ្ររបស់តារាចម្រៀងទាំងអស់បានចេញមកជូនពរឱ្យអាយដលសំណព្វចិត្តខ្លួនទាំងអស់ឆាប់ជាសះស្បើយឡើងវិញ៕
