ក្លិបបាល់ទាត់ វិសាខា ម្ចាស់ជើងឯកពានសម្តេចតេជោ ២សម័យកាលបានប្រកាសបន្តកិច្ចសន្យាថ្មីជូនអ្នកចាំទីដៃទី១ កែវ សុខសិលា រហូតដល់ឆ្នាំ២០២៥ នារសៀលថ្ងៃសុក្រ ទី២៨ ខែមករា ឆ្នាំ២០២២។
កីឡាករវ័យ ២៤ឆ្នាំ រូបនេះគឺជាថ្នាលយុវជនរបស់ក្លិបបាល់ទាត់ ភ្នំពេញក្រោន ហើយត្រូវបានដំឡើងមកកាន់ឈុតធំនៅឆ្នាំ ២០១៥ លុះដល់ឆ្នាំ ២០១៨ កែវ សុខសិលា សម្រេចផ្លាស់ទៅកាន់ វិសាខា រហូតដល់ពេលបច្ចុប្បន្ន។
សម្រាប់ក្រុមជម្រើសជាតិកម្ពុជា កែវ សុខសិលា ធ្លាប់ជាប់តាំងពីឈុត U19, U22, U23 និង ឈុតធំ ដោយបង្ហាញខ្លួនសរុប ២២ប្រកួត៕
