នៅយប់ថ្ងៃទី ៧ ខែកុម្ភៈ ឆ្នាំ២០២២ អគ្គនាយកស្ថានីយទូរទស្សន៍លេខ៥ និងជាប្រធានគណៈទ្រទ្រង់ សមាគមបាល់ទាត់កងយោធពលខេមរភូមិន្ទ (Tiffy Army FC) លោកបណ្ឌិត ស៊ុផាឆ័យ វីរៈភុជង្គ ព្រមទាំងក្រុម ការងារក្រុមកីឡាករទាំងអស់ បានមកជួបជុំគ្នានាឱកាសពិធីជប់លៀងប្រចាំឆ្នាំ នៅភោជនីយដ្ឋាន La Coupole ក្នុងសណ្ឋាគារសូហ្វីតែលភូគីត្រា ភ្នំពេញ។
នាឱកាសដ៏វិសេសវិសាលនេះ លោកបណ្ឌិត ស៊ុផាឆ័យ វីរៈភុជង្គ បានមានប្រសាសន៍ផ្ដែផ្ដាំដល់កីឡាករទាំងអស់ ដោយពោលពាក្យពេចន៍លើកទឹកចិត្តថា ក្នុងនាមជាកីឡាករ យើងត្រូវប្រកួតដោយស្មារតីជាក្រុម យើងប្រកួតប្រកបដោយភាពជោគជ័យ មិនមែនជាការប្រកួតដោយប្រើស្មារតីតែចង់ឈ្នះចង់ចាញ់នោះទេ។ កីឡាករត្រូវបង្កើតសមត្ថភាពប្រកួតរបស់ខ្លួន និងវិវឌ្ឍន៍ខ្លួនឱ្យក្លាយជា Superstar ដែលអាចយកឈ្នះចិត្តរបស់មហាជនអ្នកទស្សនាបាន ឱ្យពួកគាត់បានកត់សម្គាល់ និងចងចាំពីសមត្ថភាពពិតរបស់យើង។
លោកក៏បានសង្កត់ធ្ងន់ថា «ការឈ្នះធ្វើឱ្យយើងសប្បាយចិត្តតែរយៈពេល ៥នាទី ការចាញ់ក៏ធ្វើឱ្យយើងពិបាកចិត្តតែ៥នាទី ប៉ុន្ដែយើងត្រូវស្វែងរកកំហុសនៃការលេង ចេញពីបទពិសោធន៍បរាជ័យរបស់យើង ដើម្បីឱ្យយើងបានឆ្ពោះទៅគោលដៅដែលយើងជោគជ័យនៅថ្ងៃក្រោយ។ យើងត្រូវលេងដោយសុវជីធម៌នៃអាជីពកីឡាករ»។
យ៉ាងណាមិញ លោក ខូវ ឆាយ អគ្គលេខាធិការសមាគមបាល់ទាត់ Tiffy Army ក៏បានឱ្យដឹងបន្ថែមថា «ប្រធានសមាគមកីឡាករ និងក្រុមការងារទាំងអស់ ត្រូវដឹងថា ក្រុមរបស់យើងមិនមែនលេងដោយចង់ឈ្នះការប្រកួតនោះទេ គឺយើងត្រូវលេងឱ្យឈ្នះចិត្តមហាជនអ្នកគាំទ្រជាមុនសិន។ មួយវិញទៀត យើងទាំងអស់គ្នាតំណាងឱ្យយោធពលខេមរភូមិន្ទ និងកងពលទ័ពទាំងមូល យើងត្រូវប្រកាន់ភ្ជាប់នូវវិន័យជាចំបង។ យើងមិនចង់ទទួលយកជ័យជំនះដោយការគ្រប់គ្រងចិត្តមិនបាននៅពេលប្រកួតនោះទេ។ យើងគប្បីត្រូវគោរពគោលការជាកីឡាករអាជីព និងសម្លឹងទៅរកការគិតរបស់កីឡាករល្បីៗរបស់ពិភពលោកដែលពួកគេបានជោគជ័យរួចមកហើយ»។
បន្ទាប់ពីមានប្រសាសន៍សំណេះសំណាលនិងលើកទឹកចិត្តដល់កីឡាករទាំងអស់រួចហើយ លោកបណ្ឌិត ស៊ុផាឆ័យ វីរៈភុជង្គ ក៏បានបង្ករភាពសប្បាយរីករាយ ជាការញាំងកម្មវិធីទាំងមូលឱ្យកាន់តែអធឹកអធមថែមទៀត ដោយលោកបានបកស្រាយចម្រៀងមួយបទដែលមានចំណងជើងថា «ឆ្នាំមុន» និងផ្ដល់កិត្តិយសចែករង្វាន់លើកទឹកចិត្តដល់កីឡាករទាំងអស់គ្នា រួមទាំងក្រុមការងារទាំងអស់ផងដែរ៕