បើនិយាយដល់ឈ្មោះ ឧកញ៉ា ម៉ុង ឬទ្ធី ប្រជាជនកម្ពុជាប្រាកដជាស្គាល់យ៉ាងច្បាស់ ព្រោះឧកញ៉ារូបនេះគឺជាអ្នកជំនួញដែលលេចធ្លោលើវិស័យកសិកម្ម។ យ៉ាងណាមិញថ្មីៗនេះរឿងរ៉ាវស្នេហារវាងលោកនិងភរិយាកំពុងតែមានការចាប់អារម្មណ៍ខ្លាំងដូចគ្នានៅពេលលោកឧកញ៉ាចេញមកទម្លាយថា អាពាហ៍ពិពាហ៍លោកកើតឡើងពីការចាប់បង្ខំដោយខ្មែរក្រហមកាលពីឆ្នាំ១៩៧៨។
លោកឧកញ៉ា គឺជាបុគ្គលមួយរូបដែលមានភាពជោគជ័យខ្លាំងក្នុងវិស័យជំនួញ មិនតែប៉ុណ្ណោះលោកតែងតែឆ្លៀតពេលទំនេរចែករំលែកចំណេះដឹង ការអប់រំល្អៗនៅលើបណ្ដាញសង្គមហ្វេសប៊ុក ដែលទង្វើដ៏ប្រពៃនេះទទួលបានការគោរពស្រលាញ់និងប្រជាប្រិយភាពពីអ្នកគាំទ្រយ៉ាងច្រើន។
ងាកមកនិយាយពីជីវិតគ្រួសារវិញ លោកឧកញ៉ា ម៉ុង ឬទ្ធី ចាត់ទុកបានថាជាបុរសមានស្នេហ៍ស្មោះ ហើយតែងតែបង្ហាញភាពផ្អែមល្ហែមជាមួយនឹងភរិយាសំណព្វជារឿយៗ ឧទាហរណ៍ដូចជាកាលពីថ្ងៃទី១៥ ខែកុម្ភៈ ឆ្នាំ២០២២ លោកឧកញ៉ា បានបណ្ដើរភរិយាទៅទទួលអាហារតែពីរនាក់ ដើម្បីអបអរសាទរខួបកំណើតវ័យ៦៤ឆ្នាំ និងរំលឹកខួបអាពាហ៍ពិពាហ៍៤៤ឆ្នាំរវាងលោកឧកញ៉ា និងលោកជំទាវថែមទៀតផង។
ជាមួយនឹងរូបភាពផ្អែមល្ហែមគួរឱ្យកោតស្ញប់ស្ញែងចំពោះស្នេហាពិតដ៏បរិសុទ្ធនេះ លោកឧកញ៉ាបានភ្ជាប់នូវសំណេរដែលបង្ហាញឱ្យដឹងថា អាពាហ៍ពិពាហ៍របស់លោកឧកញ៉ាផ្ដើមចេញពីការផ្គូផ្គងចាប់គូរបស់ពួកខ្មែរក្រហមកាលពីឆ្នាំ១៩៧៨ ប៉ុន្តែស្នេហាដ៏បរិសុទ្ធដែលលោកឧកញ៉ាមានចំពោះឧត្តមភរិយាធ្វើឱ្យចំណងអាពាហ៍ពិពាហ៍ចៃដន្យនេះនៅតែរឹងមាំនិងប្រកបដោយសេចក្ដីសុខសុភមង្គលជានិច្ច។
ខាងក្រោមនេះគឺជាសំនេរទាំងស្រុងដែលដកស្រង់ចេញពី Status ដែលបង្ហោះនៅលើផេករបស់ ឯកឧត្តមបណ្ឌិត ម៉ុង ឬទ្ធី៖
«ថ្ងៃទី១៥ ខែកុម្ភៈ ឆ្នាំ១៩៥៨ – ១៥ ខែកុម្ភៈ ឆ្នាំ២០២២ = ៦៤ឆ្នាំ ជាថ្ងៃគំរប់ខួប ៦៤ឆ្នាំ ដែលប្រពន្ធសំឡាញ់បានឃើញពន្លឺព្រះអាទិត្យ និងជាថ្ងៃគំរប់ខួប១៩៧៨-២០២២=៤៤ឆ្នាំ នៃថ្ងៃដែលខ្មែរក្រហម បានចាប់បង្ខំអោយយើងរៀបអាពាហ៍ពិពាហ៍១៣គូ នៅខាងជើង មាត់ត្រពាំងស្ដុក លើទឹកដីភ្នំជីសូរ ឃុំរវៀង ស្រុកសំរោង ខេត្តតាកែវ។រយៈពេល៤៤ ដែលយើង បានរួមរស់ជាមួយគ្នា បង្កើតបានកូនបានប្រុសស្រីចំនួន ៥នាក់ និងចៅៗប្រុសស្រីចំនួន១៨នាក់ យើងពិតជា មិនដែលបានឈ្លោះប្រកែកគ្នា គួរអោយកត់សម្គាល់ម្តងណាទេ គឺតែងតែអត់អោន រាល់កំហុសឆ្គងអោយគ្នាទៅវិញទៅ មកជានិច្ច ចំពោះកូនចៅ យើងតែងតែ រួមគ្នាណែនាំអប់រំដោយអហិង្សាជារៀងរហូតមក ដល់សព្វថ្ងៃនេះ ដើម្បីជាគំរូទុកអោយកូនចៅអនុវត្តតាមតទៅអនាគត ។ដោយសារតែវិបត្តិកូវីដ១៩ ខ្ញុំមិនហ៊ានធ្វើពិធីធំដុំពេកទេ ហើយក៏មិនអោយកូនចៅញាតិមិត្ត មកចូលរួម អោយសមទៅនិងគុណូបការគុណ ដែលប្រពន្ធសំឡាញ់ បានធ្វើមកលើប្តី ចាប់តាំងពីយើងបានរួមរស់ ស៊ីអត់ ស៊ីឃ្លាន ជាមួយគ្នាអស់រយៈពេល៤៤ឆ្នាំកន្លងមកនេះទេ។»
ប្រភព៖ ឯកឧត្តមបណ្ឌិត ម៉ុង ឫទ្ធី