ក្លិបកីឡាបាល់ទាត់ វិសាខា របស់កម្ពុជា បានចុះអនុស្សារណៈយោគយល់គ្នា (MOU) ជាមួយក្លិប Dewa United FC របស់ឥណ្ឌូណេស៊ី នារសៀលថ្ងៃទី១៧ ខែកុម្ភៈ ឆ្នាំ២០២២ នៅកីឡដ្ឋានព្រីនស៍ ក្រោមវត្តមានលោកជំទាវ កែ សួនសុភី ប្រធានក្លិបកីឡាបាល់ទាត់ វិសាខា និងថ្នាក់ដឹកនាំក្លិប Dewa United FC រួមទាំងក្រុមការងារនៃក្លិបទាំងពីរផងដែរ។
លោកជំទាវ កែ សួនសុភី បានមានប្រសាសន៍ថា៖«នាងខ្ញុំក៏សង្ឃឹមថា ក្លិបទាំងពីរ នឹងជំរុញអោយមានការប្រកួតមិត្តភាព និងដកស្រង់បច្ចេកទេស រវាងក្រុមឈុតធំ និងឈុតធំ និងរវាងក្រុមយុវជន និងយុវជន ដើម្បីទាក់ទាញពីមជ្ឈដ្ឋានក្នុងស្រុក និងក្រៅស្រុក សម្រាប់ជាប្រយោជន៍របស់ក្លិបទាំងពីរ ក្នុងការផ្សព្វផ្សាយលើភាព នៃការអភិវឌ្ឍ និងរឹតចំណងមិត្តភាព រវាងក្លិប និងក្លិប ក៏ដូចជារវាងប្រទេស និងប្រទេសផងដែរ»។
ប្រធានក្លិបឈ្នះជើងឯកពានរង្វាន់សម្តេចតេជោ ហ៊ុន សែន ២សម័យកាលបន្ថែមថា៖«តាមរយៈការចុះ MOU ជាមួយក្លិប Dewa United FC នាងខ្ញុំសង្ឃឹមថា នឹងផ្ដល់នូវកិច្ចសហប្រតិបត្តិការមួយដ៏ល្អ ក្នុងការផ្លាស់ប្ដូរបទពិសោធន៍ បច្ចេកទេស ការគ្រប់គ្រង ការអភិវឌ្ឍ ទាំងធនធានមនុស្ស និងហេដ្ឋារចនាសម្ព័ន្ធ រួមទាំងជំនាញផ្សេងៗ ដូចជាជំនាញទីផ្សារ ជំនាញពេទ្យ និងការផ្សព្វផ្សាយជាដើម ដើម្បីជំរុញការអភិវឌ្ឍក្លិបទាំងពីរ អោយកាន់តែរីកចម្រើន និងទទួលបានជោគជ័យនាថ្ងៃអនាគត» ។
«នេះគឺជាកិច្ចសហប្រតិបត្តិការលក្ខណៈអន្ដរជាតិថ្មីមួយទៀត របស់ក្លិបយើង ក្រោយបង្កើតឡើង កាលពីឆ្នាំ២០១៦ ហើយកន្លងមកក្លិបរបស់យើង ក៏ធ្លាប់សហការជាមួយបណ្ដាក្លិបមួយចំនួន ដូចជានៅថៃ និងជប៉ុន ដើម្បីផ្លាស់ប្ដូរបទពិសោធន៍ ការគ្រប់គ្រង និងការអភិវឌ្ឍនេះផងដែរ»។ លោកជំទាវប្រធានក្លិបបន្ថែម៕
