ក្លិបបាល់ទាត់ភ្នំពេញក្រោន នៅរាត្រីថ្ងៃអង្គារ ទី២២ ខែកុម្ភៈ ឆ្នាំ២០២២ បានប្រកាសថាខ្សែការពារ កុក បូរី ត្រូវបានក្លិបបាល់ទាត់ Sarawak United FC សមាជិកលីគកំពូលនៃប្រទេសម៉ាឡេស៊ី Malaysia Super League ខ្ចីជើង១រដូវកាល ខណៈរូបគេជាកីឡាករកម្ពុជា ដំបូងគេចេញទៅប្រកួតអាជីពនៅក្រៅប្រទេសក្នុងឆ្នាំ២០២២ នេះ។
កុក បូរី ជាកីឡាករខ្មែរទី៥ហើយ ដែលចេញទៅប្រកបអាជីពក្នុងទីផ្សារកីឡាករអាស៊ាន ក្នុងលីគកំពូលម៉ាឡេស៊ី បន្ទាប់ពីកីឡាករ ចាន់ វឌ្ឍនា, ប្រាក់ មុន្នីឧត្តម, កែវ សុខផេង និងធារី ចន្ថាប៊ីន នាពេលកន្លងទៅ។
ក្លិប Sarawak United FC មានមូលដ្ឋាននៅរដ្ឋ Sarawak មានឈ្មោះចូលរួមលីគកំពូលម៉ាឡេស៊ី ដំបូងនៅឆ្នាំ២០២២ នេះតែម្តង ក្នុងនាមជាក្រុមជើងឯករងនៃពានរង្វាន់លីគលំដាប់ទី២របស់ម៉ាឡេស៊ី Malaysia Premier League រដូវកាលឆ្នាំ២០២១។
បូរី ជាកូនខ្មែរមកពីប្រទេសបារាំង ដែលវីរៈបុរសកម្ពុជាលោកគ្រូ ប៉ែន ផាត នាំមកឡង់សេនៅកម្ពុជា ចន្លោះឆ្នាំ២០១២ ហើយរូបគេជាកីឡាករមួយរូបក្នុងចំណោម៤ ដែលត្រូវបានក្លិបនៅកម្ពុជា ចុះកិច្ចសន្យាយក ដោយកាលនោះមាន ធារី ចន្ថាប៊ីន, គួច ដានី, កុក បូរីស ចូលរួមភ្នំពេញក្រោន និង ប៉ែន ស្តេហ្វេន (កូនប្រុសលោកប៉ែន ផាត) ចូលរួមក្រុមណាហ្គាវើល។
បូរី ជាកីឡាករបរទេសទី៣ នៅក្នុងក្រុម Sarawak United FC បន្ទាប់ពីកីឡាករនីហ្សេរីយ៉ា Uche Agba និងកីឡាករតុងហ្គាFrancis Koné៕
