ម្ចាស់បទ «Time To Rise» លោក ម៉ាន់ វណ្ណដា ធ្លាប់បានបង្ហើបឱ្យដឹងពីលក្ខណៈសម្បត្តិនារីក្នុងក្ដីស្រមៃរបស់ខ្លួននៅក្នុងកម្មវិធីមួយ។ តើនារីនៅក្នុងក្ដីស្រមៃរបស់តារាចម្រៀង Original ដ៏ល្បីប្រចាំកម្ពុជានេះត្រូវមានលក្ខណៈសម្បត្តិអ្វីខ្លះ?
តារាចម្រៀង Rap ដែលមាន Style តុបតែងខ្លួននិងសិល្បៈតែងនិពន្ធទំនុកច្រៀងចាក់ដោតត្រូវចំណង់ចំណូលចិត្តយុវវ័យសម័យថ្មីនេះ គឺជាបុរសសង្ហាដែលមាននារីៗជាច្រើនប៉ងប្រាថ្នាធ្វើជាម្ចាស់ចិត្តក្ដោបបានបេះដូងរបស់គេ។ ប៉ុន្តែមកដល់បច្ចុប្បន្ននេះគេនៅមិនទាន់ឃើញថា មាននារីរូបណានៅឡើយអាចក្រសោបបេះដូងរបស់ម្ចាស់បទ «Solo again»។
ងាកមករឿងស្នេហា វណ្ណដា ធ្លាប់បានឡើងជាតារាកិត្តិយសរបស់កម្មវិធី Cellcard Play ដែលមានស្រីស្អាត Mina គឺជាពិធីការិនីសម្របសម្រួលកម្មវិធី។ នៅក្នុងកម្មវិធី Mina បានសួរទៅកាន់វណ្ណដាថា «តើនារីក្នុងក្ដីស្រមៃរបស់បងវណ្ណដា ជាមនុស្សបែបណាដែរ សម្រាប់អនាគត?»
ចំពោះសំនួរនេះ វណ្ណដា បានឆ្លើយតបថា នារីនៅក្នុងក្ដីស្រមៃលោកត្រូវតែ ជាមនុស្សឆ្លាត អាចជួយការងារលោកបានខ្លះៗ ជួយធ្វើឱ្យលោកសប្បាយរីករាយ ធ្វើម្ហូបឆ្ងាញ់ មិនចេះរករឿងច្រើន យល់ពីការងាររបស់លោក ហើយពេលខ្លះអាចសម្របខ្លួនតាមលោក និងចេះគិតគូពីសុខភាព មានចំណុចទាំងអស់នេះគឺលោកទទួលយកបានហើយ។
ដូចតារាចម្រៀង វណ្ណដា បានលើកឡើងខាងលើ បើសិនជានារីរូបណា ចង់ក្លាយជាម្ចាស់បេះដូងរបស់កំពូលតារាចម្រៀងវ័យក្មេងម្នាក់នេះ ឱ្យតែមានចំណុចទាំងអស់ដូចរៀបរាប់ខាងលើ នឹងអាចក្លាយជាបេក្ខនារីដណ្ដើមបេះដូងរបស់ វណ្ណដា បានហើយ៕
