ខ្សែការពារ ហុង ផេង របស់ក្រុមបឹងកេត បានប្រកាសពីការព្យូរស្បែកជើងរបស់ខ្លួនពីអាជីពកីឡាករបាល់ទាត់ ក្រោយចំណាយពេល១០ឆ្នាំលើទីលាន ខណៈការប្រកាសនេះគឺធ្វើឡើងនៅក្នុងប្រកួតបើកឆាករដូវកាលឆ្នាំ២០២២ នៃពានរង្វាន់លីគកំពូលកម្ពុជា Cambodian Premier League 2022 ពេលក្រុមបឹងកេត បើកទ្វាទទួលក្រុមណាហ្គាវើល រសៀលថ្ងៃសៅរ៍ ទី ៥ ខែមីនា ឆ្នាំ២០២២។
កីឡាករ ហុង ផេង បានចាយពេលរស់នៅជាមួយបឹងកេត ជាង៧ឆ្នាំ បន្ទាប់ពីចាកចេញពីភ្នំពេញក្រោន នៅឆ្នាំ២០១៤។ រូបគេក៏ធ្លាប់ជាសមាជិកក្រុមជម្រើសជាតិកម្ពុជា ចន្លោះឆ្នាំ២០១៤ដល់២០២០ ផងដែរ។
កីឡាករដែលមានស្រុកកំណើតនៅខេត្តបាត់ដំបង រូបនេះបានចូលរួមបំពេញការសិក្សាគ្រូបង្វឹកកម្រិត AFC B License កាលពីពេលថ្មីៗផងដែរ ក្រោយខ្លួនឈានដល់វ័យ៣២ឆ្នាំ។ យ៉ាងណាក្ដីរូបគេត្រូវបានក្លិបបឹងកេត ផ្ដល់ទំនុកចិត្តដឹកនាំក្រុមបាល់ទាត់ឈុតយុវជនក្រោមអាយុ១៥ឆ្នាំផងដែរ។
ក្រោយចូលនិវត្តន៍កីឡាកររូបនេះបានលើកឡើងថា៖«រយះពេល៧ឆ្នាំជាមួយក្លិបបឹងកេត ពិតជាទទួលបានអារម្មណ៍កក់ក្ដៅពីបងស្រីប្រធានក្លិប ថ្នាក់ដឹកនាំ ក្រុមការងារ លោកគ្រូ គ្រូពេទ្យ និងកីឡាករបឹងកេតទាំងអស់ប៉ុន្តែដោយសារបញ្ហារបួសធ្វើអោយរូបខ្ញុំមិនអាចបន្តអាជីបនេះបានទៀតជូនពរអោយក្លិបបឹងកេតទទួលបានជ័យជំនះនិងលទ្ធផលល្អហើយក៏អរគុណពុកម៉ែបងប្អូនអ្នកគាំទ្រក្លិបបឹងកេត អ្នកគាំទ្ររូបខ្ញុំ អ្នកគាំទ្រវិស័យបាល់ទាត់ដែលតែងតែចំណាយពេលវេលានិងថវិកាដើម្បីចូលរួមគាំទ្រវិស័យមួយនេះជូនពរពុកម៉ែបងប្អូនសុខភាពល្អនិងប្រកបការងារជោគជ័យគ្រប់ភារះកិច្ចហើយក៏សង្ឃឹមថាពុកម៉ែបងប្អូននៅតែបន្តគាំទ្រក្លិបបឹងកេតនិងវិស័យនេះបន្តទៀត»៕