២ប្រកួតមុនគេក្នុងពានរង្វាន់រង្វាន់លីគកំពូលកម្ពុជា Cambodian Premier League 2022 បានបញ្ចប់ទៅហើយនៅថ្ងៃបើកឆាករសៀលថ្ងៃសៅរ៍ ទី៥ ខែមីនា ឆ្នាំ២០២២ ខណៈក្រុមវិសាខា និងបឹងកេត បានជ័យជម្នះដូចគ្នា។
ចំពោះក្រុមវិសាខា បានយកឈ្នះលើក្រុមម្ចាស់ផ្ទះអង្គរថាយហ្គឺរ ដោយលទ្ធផល ៣ទល់១ លើទីលានកីឡដ្ឋានហនុមាន។ គ្រាប់បាល់ជ័យជម្នះរបស់វិសាខា រកបានដោយកីឡាករកូរ៉េខាងត្បូង Lee Jae Gun, ច្រឹង ពលរដ្ឋ និង កែវ សុខផេង ហើយគ្រាប់បាល់វាយបករបស់អង្គរថាយហ្គឺរ រកបានដោយកីឡាករ ជិន ណារៈ។
ចំណែកក្រុមម្ចាស់ផ្ទះបឹងកេត វិញបានយកឈ្នះលើក្រុមណាហ្គាវើល ដោយលទ្ធផល ៣ទល់១ ដូចគ្នា ស្របពេលដែលក្រុមណាហ្គាវើល រកគ្រាប់បាល់នាំមុខមុននៅនាទី១៩ ដោយកីឡាករប្រេស៊ីល Eliel da Cruz ប៉ុន្តែត្រូវក្រុមបឹងកេត វាយបក៣គ្រាប់វិញដោយកីឡាករ ម៉ាត់ ណូរ៉ុន ២គ្រាប់និងកីឡាករ សៀង ចន្ធា ១គ្រាប់។
សម្រាប់ប្រកួតបន្ទាប់ក្រុមកងយោធពលខេមរភូមិន្ទ បើកទ្វាកីឡដ្ឋានខ.ភ.ម របស់ខ្លួនទទួលក្រុមជើងឯកឆ្នាំចាស់ភ្នំពេញក្រោន នៅវេលាម៉ោង៦:៣០នាទីល្ងាចថ្ងៃជាមួយគ្នា ស្របពេលគូប្រកួតរវាងព្រះខ័នរាជស្វាយរៀង ជាមួយគីរីវង់សុខសែនជ័យ នៅកីឡដ្ឋានខេត្តស្វាយរៀង ប្តូរទៅធ្វើនៅថ្ងៃ៨មីនា ២០២២ ដោយសារពាក់ព័ន្ធនឹងកូវីដ-១៩៕
