តារាសម្ដែងនិងជាពិធីការិនីល្បីប្រចាំកម្មវិធី 3Fun អ្នកនាង គង់ ចាន់ស្រីមុំ បានធ្វើឱ្យអ្នកគាំទ្របារម្ភមិនតិចនោះទេ ក្រោយពេលដែលអ្នកនាងបានចែករំលែករូបភាពគេងឆ្អើរភ្លើង ភ្ជាប់ដោយសំនេរខ្លីថា ព្យាបាលតាមបែបបុរាណខ្មែរវិញម្ដង។
នៅក្នុងថ្ងៃទី១៤ ខែមីនា វេលាម៉ោងប្រមាណ ១២ជាងថ្ងៃត្រង់ អ្នកម៉ាក់កូនមួយរូបនេះបានបង្ហោះរូបភាពរបស់ខ្លួនជាច្រើនសន្លឹកនៅលើបណ្ដាញសង្គមហ្វេសប៊ុក ដោយសរសេរភ្ជាប់ជាមួយនឹងអត្ថន័យថា «មកព្យាបាលតាមបែបបុរាណខ្មែរយើងម្តងមើល!» ដោយសាមីខ្លួនបានទាំងបង្ហាញ Location ទៀតថានៅខេត្តតាកែវ។
ថ្វីត្បិតតែមិនបានបញ្ជាក់ពីអាការៈជំងឺរបស់ខ្លួននិងប្រភេទជំងឺឱ្យអ្នកគាំទ្របានដឹងក្ដី ប៉ុន្តែបើមើលតាមស្ថានភាពរបស់កញ្ញាមានអ្នកគាំទ្រខ្លះបានវិភាគថា កញ្ញាអាចនឹងទាស់សរសៃព្រោះកាលដែលកញ្ញាទម្ងន់កូនស្រី ម៉ូម៉ូ នោះ កញ្ញាព្យាយាមរកស៊ីមិនហ៊ានសំរាកនោះទេ ខណៈដែលអ្នកខ្លះទៀតលើកឡើងថា ជំងឺទាស់សរសៃមិនមែនជារឿងលេងសើចនោះឡើយ។
ក្រៅពីមានអ្នកគាំទ្របារម្ភចំពោះជំងឺអ្នកនាង ហើយនាំគ្នាសាកសួរព្រោងព្រាតតើអ្នកនាងកើតអី? តើអ្នកនាងឈឺអី? ក៏នៅមានអ្នកមួយចំនួនទៀត យល់ឃើញថាអ្នកនាងអាចនឹងត្រូវមន្តអាគមន៍ផ្លូវងងឹតក៏ថាបានដែរ ឱ្យប្រញាប់រកគ្រូដោះអំពើជាដើម។
យ៉ាងណាមិញសារព័ត៌មានត្រយង កំពុងតែព្យាយាមទំនាក់ទំនងទៅកាន់អ្នកនាង គង់ ចាន់ស្រីមុំ ដើម្បីសួរលម្អិតថាតើអ្នកនាងមានបញ្ហាអ្វី ឬក៏ឈឺជំងឺអ្វីដែរ ទើបបានជាអ្នកនាងធ្វើដូច្នោះ ប៉ុន្តែលេខទូរសព្ទរបស់នាងដែលទំនាក់ទំនងទៅជាប់រវល់រហូត៕
ប្រភព៖ Facebook Kong chansreymom
